AI Impact Expo 2026 : ભારત ટેકનોલોજીના ક્ષેત્રમાં એક નવો ઈતિહાસ રચવા જઈ રહ્યું છે. નવી દિલ્હીના પ્રતિષ્ઠિત 'ભારત મંડપમ' ખાતે 'AI ઇમ્પેક્ટ એક્સ્પો 2026' નું આયોજન કરવામાં આવ્યું છે. આ કાર્યક્રમ માત્ર એક્સિબિશન નથી, પરંતુ આર્ટિફિશિયલ ઇન્ટેલિજન્સ (AI) ની પાવર અને તેના ભવિષ્યના રોડમેપનું જીવંત પ્રદર્શન છે. વડાપ્રધાન નરેન્દ્ર મોદી આજે સાંજે આ ભવ્ય ઇવેન્ટનું ઉદ્ઘાટન કરીને ભારતને વૈશ્વિક AI નકશા પર મજબૂત રીતે સ્થાપિત કરશે.
PM મોદી દ્વારા શુભારંભ
વડાપ્રધાન નરેન્દ્ર મોદી આજે એટલે કે, 16 ફેબ્રુઆરી, 2026 ના રોજ સાંજે 5:00 વાગ્યે આ એક્સ્પોનું ઉદ્ઘાટન કરશે. આ પાંચ દિવસીય કાર્યક્રમ 20 ફેબ્રુઆરી સુધી ચાલશે. આ ઇવેન્ટમાં વિશ્વભરના દેશોના વડાઓ અને ટેકનોલોજી જગતના દિગ્ગજ CEO હાજરી આપવાના છે, જે તેને ખરા અર્થમાં વૈશ્વિક સમિટ બનાવે છે.
એક્સ્પોનું કદ અને વ્યાપ
આ એક્સ્પો 70,000 ચોરસ મીટર કરતાં વધુ વિશાળ વિસ્તારમાં ફેલાયેલો છે, જેને 10 અલગ-અલગ એરેનામાં વહેંચવામાં આવ્યો છે. તેમાં 300 થી વધુ એક્ઝિબિશન પેવેલિયન અને લાઈવ ડેમો હશે. આ એક્સ્પોની ખાસ થીમ 'પીપલ (લોકો), પ્લેનેટ (ગ્રહ) અને પ્રોગ્રેસ (પ્રગતિ)' રાખવામાં આવી છે, જે ટેકનોલોજીને માનવ કલ્યાણ સાથે જોડે છે.
સ્ટાર્ટઅપ્સ અને આંતરરાષ્ટ્રીય સહભાગિતા
આ કાર્યક્રમમાં 600 થી વધુ હાઇ-પાવર સ્ટાર્ટઅપ્સ તેમના ઇનોવેશન રજૂ કરશે. આ ઉપરાંત, વિશ્વના 13 દેશો જેવા કે, ઓસ્ટ્રેલિયા, જાપાન, રશિયા, યુકે, ફ્રાન્સ, જર્મની, અને આફ્રિકાના દેશોએ પોતાના ખાસ પેવેલિયન બનાવ્યા છે. આ પ્લેટફોર્મ પર વૈશ્વિક કંપનીઓ અને શૈક્ષણિક સંસ્થાઓ એકસાથે જોવા મળશે.
ચર્ચાઓ અને મુલાકાતીઓ
આ પાંચ દિવસ દરમિયાન 500 થી વધુ સત્રો યોજાશે, જેમાં 3,250 થી વધુ વક્તાઓ AI ના ઉપયોગ અને તેના ફાયદાઓ વિશે ચર્ચા કરશે. આ કાર્યક્રમમાં આંતરરાષ્ટ્રીય પ્રતિનિધિઓ સહિત 2.5 લાખથી વધુ મુલાકાતીઓ આવવાની સંભાવના છે. આનાથી આવનારા સમયમાં AI ક્ષેત્રે નવી ભાગીદારી અને રોજગારની તકો ઉભી થશે.
