Ahmedabad NEWS: અમદાવાદના સરસપુર વિસ્તારમાં આવેલી અમદાવાદ મ્યુનિસિપલ કોર્પોરેશન સંચાલિત શારદાબેન હોસ્પિટલ ફરી એકવાર વિવાદમાં આવી છે. હોસ્પિટલમાં ડિલિવરી માટે દાખલ કરાયેલી ગર્ભવતી મહિલાના સારવાર દરમિયાન મોત થતાં પરિવારજનોએ તબીબી બેદરકારીના ગંભીર આક્ષેપો કર્યા છે. મહિલાના મૃત્યુ સાથે નવજાત બાળકનું પણ મોત થયાનું પરિવારજનોએ જણાવ્યું છે. સમગ્ર ઘટનાને પગલે હોસ્પિટલ ખાતે મોટી સંખ્યામાં સગા-સંબંધીઓ અને સ્થાનિક લોકો એકત્ર થતાં તંગદિલીનો માહોલ સર્જાયો હતો.
પ્રાથમિક માહિતી મુજબ બાપુનગર વિસ્તારના સંજયનગર છાપરામાં રહેતી 35 વર્ષીય પ્રિયાબેન પટણી ગર્ભવતી હતા અને તેમની સારવાર અગાઉ ખાનગી હોસ્પિટલમાં ચાલી રહી હતી. જોકે પ્રસૂતિની પીડા શરૂ થતાં પરિવારજનો તેમને સારવાર માટે સરસપુરની શારદાબેન હોસ્પિટલમાં લઈ ગયા હતા. ગઈકાલે બપોરે હોસ્પિટલમાં દાખલ કરાયેલી મહિલાની સારવાર શરૂ કરવામાં આવી હતી, પરંતુ થોડા કલાકોમાં જ સમગ્ર ઘટનાએ દુઃખદ વળાંક લીધો હતો.
આ પણ વાંચો: 3 દિવસથી દીકરીની રાહ જોતા પરિવાર પર તૂટી પડ્યું આભ : નર્મદા કેનાલમાંથી મળ્યો દિવ્યાનો મૃતદેહ
મોડી રાત્રે તબિયત લથડ્યાનો પરિવારનો આક્ષેપ
પરિવારજનોના જણાવ્યા અનુસાર હોસ્પિટલમાં દાખલ થયા બાદ શરૂઆતમાં સ્થિતિ સામાન્ય હતી. જોકે મોડી રાત્રે પ્રિયાબેનની તબિયત અચાનક બગડવા લાગી હતી. પરિવારના સભ્યોએ હોસ્પિટલ સ્ટાફને અનેકવાર જાણ કરી હોવા છતાં પૂરતું ધ્યાન આપવામાં આવ્યું નહોતું એવો આક્ષેપ કરવામાં આવ્યો છે.
વહેલી સવારે આશરે 4:30 વાગ્યે ડિલિવરી દરમિયાન મહિલાની સ્થિતિ વધુ ગંભીર બની હતી. ત્યારબાદ સારવાર દરમિયાન મહિલાનું મૃત્યુ થયું હોવાનું હોસ્પિટલ તરફથી પરિવારને જણાવાયું હતું. બાળક પણ બચી શક્યું ન હોવાનું સામે આવ્યું છે. આ સમાચાર મળતા જ પરિવારજનો પર દુઃખનો પહાડ તૂટી પડ્યો હતો.
હોસ્પિટલના ડોક્ટરોએ પરિવારજનોને પ્રાથમિક રીતે જણાવ્યું હતું કે મહિલાના ધબકારા અચાનક વધી ગયા હતા અને ત્યારબાદ તે બેભાન થઈ જતા સારવાર દરમિયાન તેમનું મૃત્યુ થયું હતું. જોકે પરિવારજનો આ સ્પષ્ટીકરણથી સંતુષ્ટ નથી અને સમગ્ર ઘટનામાં બેદરકારી થઈ હોવાનો આરોપ લગાવી રહ્યા છે.
ડોક્ટર ફોન પર સૂચના આપતા હતા હોવાનો આરોપ
મૃતક મહિલાના પરિવારજનોએ હોસ્પિટલ સ્ટાફ અને તબીબો સામે ગંભીર આક્ષેપો કર્યા છે. તેમના જણાવ્યા મુજબ ડિલિવરી દરમિયાન જવાબદાર ડોક્ટર સ્થળ પર હાજર નહોતા અને ફોન પર હોસ્પિટલ સ્ટાફને સૂચનાઓ આપી રહ્યા હતા. પરિવારનું કહેવું છે કે સ્ટાફ દ્વારા કરવામાં આવેલી કાર્યવાહી અને સમયસર યોગ્ય તબીબી નિર્ણય ન લેવાતા મહિલાનું જીવન બચાવી શકાયું નહીં.
પરિવારજનોનું માનવું છે કે જો સમયસર અનુભવી ડોક્ટર દ્વારા સારવાર આપવામાં આવી હોત તો માતા અને બાળક બંનેને બચાવી શકાય તેમ હતું. આક્ષેપોને લઈને હોસ્પિટલ પ્રશાસન તરફથી હજુ સુધી કોઈ સત્તાવાર નિવેદન જાહેર કરવામાં આવ્યું નથી. ઘટના બાદ હોસ્પિટલમાં ભારે હોબાળો મચી ગયો હતો. પરિવારજનોએ હોસ્પિટલ સંચાલન સામે રોષ વ્યક્ત કર્યો હતો અને જવાબદાર તબીબો સામે કાર્યવાહી કરવાની માંગ ઉઠાવી હતી.
પોસ્ટમોર્ટમ અને પોલીસ તપાસની માંગ
પરિવારજનો દ્વારા સમગ્ર મામલે પોલીસને જાણ કરવામાં આવી છે. મૃતક મહિલાના સગાઓએ ઘટનાની નિષ્પક્ષ તપાસ માટે પોસ્ટમોર્ટમ કરાવવાની માંગ કરી છે. તેમનું કહેવું છે કે પોસ્ટમોર્ટમ રિપોર્ટથી મૃત્યુનું ચોક્કસ કારણ સામે આવશે અને જો કોઈ પ્રકારની તબીબી બેદરકારી થઈ હશે તો તે પણ બહાર આવશે.
પોલીસે સમગ્ર ઘટનાની પ્રાથમિક માહિતી મેળવી છે અને પરિવારજનોના નિવેદનો નોંધવાની પ્રક્રિયા શરૂ કરી છે. પોસ્ટમોર્ટમ રિપોર્ટ આવ્યા બાદ આગળની કાર્યવાહી અંગે નિર્ણય લેવામાં આવશે. જો રિપોર્ટમાં બેદરકારી અથવા અન્ય કોઈ ગંભીર બાબત સામે આવશે તો કાયદેસરની કાર્યવાહી હાથ ધરવામાં આવી શકે છે.
સરકારી હોસ્પિટલોમાં સારવાર વ્યવસ્થા ફરી ચર્ચામાં
શારદાબેન હોસ્પિટલમાં બનેલી આ ઘટનાએ સરકારી હોસ્પિટલોમાં ઉપલબ્ધ સારવાર વ્યવસ્થા અને દર્દીઓની સુરક્ષા અંગે ફરી પ્રશ્નો ઊભા કર્યા છે. ખાસ કરીને માતૃત્વ અને પ્રસૂતિ સેવાઓમાં પૂરતી દેખરેખ, તબીબોની ઉપલબ્ધતા અને ઇમરજન્સી મેનેજમેન્ટ જેવા મુદ્દાઓ પર ચર્ચા શરૂ થઈ છે.
