અમદાવાદ: શહેરમાં લાંબા સમયથી વિવિધ ગુનાઓમાં ફરાર રહેલા આરોપીઓ સામે અમદાવાદ પોલીસે વ્યાપક અભિયાન હાથ ધરીને મોટી સફળતા મેળવી છે. ડીસીપી ઝોન-7ના માર્ગદર્શન હેઠળ ચલાવવામાં આવેલા 'ઓપરેશન ક્લીન સ્વીપ' દરમિયાન માત્ર 24 કલાકની વિશેષ ડ્રાઇવમાં કુલ 190 ફરાર આરોપીઓને ઝડપી લેવામાં આવ્યા છે. આ આરોપીઓ શહેરના આઠ પોલીસ સ્ટેશનમાં નોંધાયેલા વિવિધ ગુનાઓમાં વર્ષોથી વોન્ટેડ હતા.
ખાસ વાત એ છે કે ધરપકડ કરાયેલા આરોપીઓમાં કેટલાક છેલ્લા એક વર્ષથી ફરાર હતા તો કેટલાકે બે દાયકા સુધી પોલીસને ચકમો આપ્યો હતો. પોલીસે રાજ્યની બહાર સુધી ટીમો મોકલીને આ કાર્યવાહી હાથ ધરી હતી. શહેરમાં કાયદો અને વ્યવસ્થાની સ્થિતિ વધુ મજબૂત બનાવવા તેમજ રથયાત્રા દરમિયાન કોઈ અનિચ્છનીય ઘટના ન બને તે હેતુથી આ વિશેષ અભિયાન ચલાવવામાં આવ્યું હોવાનું પોલીસ સૂત્રોએ જણાવ્યું છે.
આ પણ વાંચો: રામ મંદિરમાં ₹500ની બે નોટોથી શરૂ થયો હતો આખો ખેલ! : કેવી રીતે કેસ પહોંચ્યો કરોડોમાં? ચોંકાવનારા ખુલાસા આવ્યા સામે
350થી વધુ પોલીસ કર્મચારીઓ જોડાયા અભિયાનમાં
અમદાવાદ પોલીસ દ્વારા શહેરમાં જૂના ગુનાઓમાં ફરાર આરોપીઓ, તડીપારના હુકમનો ભંગ કરનારા તેમજ પેરોલ જમ્પ કરનારા આરોપીઓ સામે 'ઓપરેશન ક્લીન સ્વીપ' શરૂ કરવામાં આવ્યું છે. આ અભિયાનના ભાગરૂપે ડીસીપી ઝોન-7 હેઠળ આવતા આઠ પોલીસ સ્ટેશનોમાં નોંધાયેલા તમામ વોન્ટેડ આરોપીઓની યાદી તૈયાર કરવામાં આવી હતી.
ત્યારબાદ સ્થાનિક પોલીસ સ્ટેશનો, ઝોન-7 સ્ક્વોડ અને લોકલ ક્રાઇમ બ્રાન્ચ (LCB) સહિત આશરે 350 જેટલા પોલીસ અધિકારીઓ અને કર્મચારીઓની અલગ-અલગ ટીમો બનાવીને રાજ્યના વિવિધ વિસ્તારો તેમજ અન્ય રાજ્યોમાં સર્ચ ઓપરેશન હાથ ધરવામાં આવ્યું હતું. સતત 24 કલાક સુધી ચાલેલી આ કાર્યવાહીમાં કુલ 190 આરોપીઓને ઝડપી લેવામાં આવ્યા હતા.
20 વર્ષથી પોલીસને ચકમો આપતા આરોપીઓ પણ ઝડપાયા
આ અભિયાન દરમિયાન પોલીસે છેતરપિંડી, હત્યાના પ્રયાસ, અપહરણ, નકલી ચલણી નોટોના ઉપયોગ, મંદિર ચોરી સહિતના ગંભીર ગુનાઓમાં સંડોવાયેલા આરોપીઓને કાયદાના શિકંજામાં લીધા છે.
ધરપકડ કરાયેલા આરોપીઓમાં 22 આરોપીઓ એવા હતા, જે એક વર્ષથી વધુ સમયથી ફરાર હતા. જ્યારે બે આરોપીઓ છેલ્લા 20 વર્ષથી પોલીસની પકડથી દૂર રહ્યા હતા. લાંબા સમયથી ફરાર રહેલા આવા આરોપીઓને પકડવા માટે અમદાવાદ પોલીસે ગુજરાતના વિવિધ જિલ્લાઓ ઉપરાંત રાજસ્થાન, મહારાષ્ટ્ર, મધ્યપ્રદેશ અને ઉત્તરાખંડમાં પણ વિશેષ ટીમો મોકલી હતી.
પોલીસ તપાસ દરમિયાન એક આરોપી પાસેથી નકલી ચલણી નોટો પણ મળી આવી હતી. પ્રાથમિક તપાસમાં સામે આવ્યું છે કે આરોપી આ નોટોનો ઉપયોગ વિવિધ પેટ્રોલ પંપ પર ચૂકવણી માટે કરતો હતો. હવે પોલીસે નકલી ચલણી નોટોના સ્ત્રોત અને તેમાં સંડોવાયેલા અન્ય લોકો અંગે વધુ તપાસ શરૂ કરી છે.
આ પણ વાંચો: મહારાષ્ટ્રમાં વરસાદનો મહાકહેર : મુંબઈમાં 10 ઈંચ વરસાદ, વર્ક ફ્રોમ હોમ, શાળા-કોલેજો બંધ, 13 લોકોનાં મોત
રથયાત્રા પૂર્વે સુરક્ષા વ્યવસ્થા વધુ કડક
અમદાવાદમાં યોજાનારી ભગવાન જગન્નાથજીની રથયાત્રાને ધ્યાનમાં રાખીને શહેર પોલીસ દ્વારા સુરક્ષા વ્યવસ્થા વધુ સઘન બનાવવામાં આવી છે. આ જ અભિયાનના ભાગરૂપે અમદાવાદ ક્રાઇમ બ્રાન્ચે અગાઉ ગંભીર ગુનાઓમાં સંડોવાયેલા 200થી વધુ હિસ્ટ્રીશીટર અને શંકાસ્પદ આરોપીઓની પૂછપરછ કરી હતી.
આ ઉપરાંત અલગ કાર્યવાહીમાં ગેરકાયદે હથિયારો સામે પણ અભિયાન ચલાવવામાં આવ્યું હતું, જેમાં નવ ગેરકાયદે હથિયારો સાથે પાંચ આરોપીઓની ધરપકડ કરવામાં આવી હતી. પોલીસનું માનવું છે કે આવા પૂર્વ-સાવચેતીના પગલાંથી રથયાત્રા દરમિયાન કાયદો અને વ્યવસ્થા જાળવવામાં મદદ મળશે.
આ પણ વાંચો: શેરબજારમાં ફરી તેજીનો ધમાકો! : નિફ્ટી 24,450ની ઉપર, ટાઇટનના શેરમાં જોરદાર ઉછાળો; ટ્રેન્ટમાં 10%નો મોટો ઝટકો
શહેરભરમાં અભિયાન ચાલુ રહેશે
અમદાવાદ પોલીસના જણાવ્યા મુજબ 'ઓપરેશન ક્લીન સ્વીપ' માત્ર એક દિવસની કાર્યવાહી નહીં પરંતુ સતત ચાલતું અભિયાન રહેશે. શહેરમાં વર્ષોથી ફરાર રહેલા આરોપીઓ સામે કાર્યવાહી ચાલુ રહેશે અને કાયદાથી બચી રહેલા તમામ આરોપીઓને ઝડપી પાડવા માટે વિવિધ ઝોનમાં આવી વિશેષ ડ્રાઇવ હાથ ધરવામાં આવશે. પોલીસે નાગરિકોને પણ અપીલ કરી છે કે જો કોઈ વોન્ટેડ અથવા શંકાસ્પદ વ્યક્તિ અંગે માહિતી હોય તો નજીકના પોલીસ સ્ટેશન અથવા પોલીસ હેલ્પલાઇન પર જાણ કરે, જેથી ગુનાખોરી પર અસરકારક નિયંત્રણ લાવી શકાય.
