Ahmedabad News: શહેરમાં ખાદ્યપદાર્થોની ગુણવત્તા અને સ્વચ્છતાને લઈને વધુ એક ગંભીર અને ચોંકાવનારો કિસ્સો સામે આવ્યો છે. શહેરના એક જાણીતા આઉટલેટ “છાસવાલા” દ્વારા પીરસવામાં આવતા મિલ્ક શેકમાંથી જીવતો વંદો નીકળવાની ઘટનાએ ગ્રાહકોમાં ભારે આક્રોશ જગાવ્યો છે.
શું છે સમગ્ર મામલો?
મળતી માહિતી અનુસાર, એક ગ્રાહકે ઓનલાઈન ફૂડ ડિલિવરી એપ દ્વારા “છાસવાલા” આઉટલેટમાંથી મિલ્ક શેકનો ઓર્ડર આપ્યો હતો. ગ્રાહક જ્યારે આ મિલ્ક શેક પી રહ્યા હતા, ત્યારે તેમને અંદર કંઈક અજુગતું લાગ્યું. જ્યારે તેમણે નજીકથી તપાસ કરી તો હોશ ઉડી ગયા હતા, કારણ કે પીણાની અંદર એક વંદો જોવા મળ્યો હતો.
ગુજરાતમાં પરિવર્તનના મંડાણ! : નર્મદામાં 'AAP'ની ઐતિહાસિક જીત બાદ કેજરીવાલનો રાજપીપલામાં ભવ્ય રોડ-શો
ગ્રાહકોની સુરક્ષા પર ગંભીર સવાલ
આ ઘટના બાદ ગ્રાહકે આક્રોશ વ્યક્ત કરતા જણાવ્યું હતું કે, આવી પ્રતિષ્ઠિત બ્રાન્ડ્સ પાસેથી ગ્રાહકો આરોગ્યપ્રદ અને સુરક્ષિત ખોરાકની અપેક્ષા રાખતા હોય છે, પરંતુ જ્યારે આવી બેદરકારી સામે આવે છે ત્યારે ફૂડ સેફ્ટીના દાવાઓ સામે મોટા પ્રશ્નો ઊભા થાય છે. મિલ્ક શેક જેવા પીણામાં વંદો નીકળવો તે સીધી રીતે સ્વચ્છતાના અભાવ અને ગ્રાહકોના સ્વાસ્થ્ય સાથેના ચેડાં સમાન છે.
તંત્ર દ્વારા તપાસની માંગ
આ ગંભીર બેદરકારી બદલ ગ્રાહકે તાત્કાલિક અસરથી અમદાવાદ મ્યુનિસિપલ કોર્પોરેશન (AMC) ના ફૂડ વિભાગમાં લેખિત ફરિયાદ નોંધાવી છે. ફરિયાદના પગલે હવે ફૂડ વિભાગ આ મામલે તપાસ હાથ ધરે તેવી શક્યતા છે. શહેરીજનો આશા રાખી રહ્યા છે કે તંત્ર દ્વારા આ આઉટલેટ સામે કડક કાર્યવાહી કરવામાં આવશે, જેથી ભવિષ્યમાં અન્ય ગ્રાહકોએ આવી સ્થિતિનો સામનો ન કરવો પડે.
ખાદ્યપદાર્થોની ગુણવત્તા અંગે ચિંતા
આ બનાવ બનતા જ શહેરમાં ખાદ્યપદાર્થોની ક્વોલિટી અને હાઈજીન (સ્વચ્છતા) અંગે ફરી એકવાર ચર્ચાઓ શરૂ થઈ ગઈ છે. હોટલ અને ફૂડ આઉટલેટ્સ દ્વારા ગ્રાહકોના સ્વાસ્થ્ય સાથે કરવામાં આવતી આ પ્રકારની બેદરકારી સામે તંત્રની નિષ્ક્રિયતા પણ ચર્ચાનો વિષય બની છે. ગ્રાહકોમાં પણ બહારનું ખાવા-પીવા અંગે હવે ભય અને ચિંતાનો માહોલ જોવા મળી રહ્યો છે.
