અમદાવાદમાં સ્થાનિક સ્વરાજ્યની ચૂંટણીઓ પહેલા કોંગ્રેસ પક્ષને મોટો રાજકીય ઝટકો લાગ્યો છે. બહેરામપુરા વોર્ડના પૂર્વ કોર્પોરેટર અને કોંગ્રેસના કદાવર નેતા તસ્લીમ આલમ તિરમિઝીની જમીન વિવાદના એક ગંભીર કેસમાં પોલીસે ધરપકડ કરી છે. આ ઘટનાએ શહેરના રાજકીય વર્તુળોમાં ચર્ચાનો માહોલ ગરમાવ્યો છે.
શું છે સમગ્ર મામલો?
મળતી માહિતી અનુસાર, તસ્લીમ આલમ તિરમિઝી સામે ખેડા જિલ્લાના કપડવંજ વિસ્તારમાં જમીન સંબંધી ગેરરીતિઓના આરોપો છે. આરોપ છે કે તેમણે જમીન હડપ કરવાની મંજુરથી ખોટા ખેડૂતનું પેઢીનામું તૈયાર કરાવ્યું હતું. આ કૌભાંડ બહાર આવતા તેમના વિરુદ્ધ કાયદેસરની ફરિયાદ નોંધાઈ હતી, જેના આધારે પોલીસે કાર્યવાહી કરી તેમની ધરપકડ કરી છે.
આ ઘટનાએ ચૂંટણીના સમયે રાજકીય માહોલને વધુ તંગ બનાવી દીધો છે. બહેરામપુરા અને આસપાસના વિસ્તારોમાં તસ્લીમ આલમ તિરમિઝીનું મજબૂત વર્ચસ્વ માનવામાં આવતું હતું. તેમના સામેની આ કાર્યવાહી કોંગ્રેસ માટે મોટો ઝટકો ગણાઈ રહી છે.
કોંગ્રેસની છબીને નુકસાન?
રાજકીય વિશ્લેષકો માને છે કે આ ઘટનાથી કોંગ્રેસની છબીને નુકસાન પહોંચી શકે છે અને વિરોધ પક્ષો માટે આ મુદ્દો ચૂંટણી પ્રચારમાં મહત્વનો બની શકે છે. બીજી તરફ, કોંગ્રેસના કાર્યકરોમાં પણ આ ઘટનાને લઈને ચિંતાનો માહોલ જોવા મળી રહ્યો છે.
હાલમાં પોલીસ આ સમગ્ર મામલે વધુ તપાસ કરી રહી છે અને આ કૌભાંડમાં અન્ય કોઈ લોકો સંડોવાયેલા છે કે નહીં તે દિશામાં પણ તપાસનો દોર આગળ વધારવામાં આવી રહ્યો છે.
