અમદાવાદમાં પાલતુ કુતરા બાદ હવે બિલાડીનું પણ રજીસ્ટ્રેશન ફરજિયાત : જાણો અરજી કેવી રીતે કરવી

અમદાવાદ: અમદાવાદ શહેરમાં પાલતુ પ્રાણીઓ માટેના નિયમોમાં મહત્વપૂર્ણ ફેરફાર કરવામાં આવ્યો છે. અમદાવાદ મ્યુનિસિપલ કોર્પોરેશન (AMC) દ્વારા હવે પાલતુ બિલાડીઓનું પણ રજીસ્ટ્રેશન ફરજિયાત કરવામાં આવ્યું છે. અત્યાર સુધી શહેરમાં પાલતુ શ્વાન માટે નોંધણીની વ્યવસ્થા અમલમાં હતી, પરંતુ હવે આ નિયમ પાલતુ બિલાડીઓ પર પણ લાગુ કરવામાં આવ્યો છે. કોર્પોરેશનના જણાવ્યા મુજબ શહેરની હદમાં રહેતા તમામ બિલાડી માલિકોએ 30 સપ્ટેમ્બર સુધી પોતાની પાલતુ બિલાડીનું રજીસ્ટ્રેશન પૂર્ણ કરાવવું જરૂરી રહેશે.

અમદાવાદ મ્યુનિસિપલ કોર્પોરેશનના કૅટલ ન્યૂસન્સ કંટ્રોલ એન્ડ ડોગ (CNCD) વિભાગે જાહેર કરેલી સૂચના મુજબ નોંધણીની સમગ્ર પ્રક્રિયા ઓનલાઈન રાખવામાં આવી છે. કોર્પોરેશનનું માનવું છે કે ઓનલાઈન સિસ્ટમને કારણે નાગરિકો સરળતાથી અરજી કરી શકશે અને પાલતુ પ્રાણીઓનો સત્તાવાર ડેટાબેઝ પણ તૈયાર થઈ શકશે. આ પગલાથી શહેરમાં પાલતુ પ્રાણીઓના સંચાલન અને નિયમનને વધુ વ્યવસ્થિત બનાવવાનો પ્રયાસ કરવામાં આવ્યો છે.

આ પણ વાંચો: ગુજરાતના પ્રથમ 'મહા વન કવચ' પ્રોજેક્ટનો ડીસાના ડાવસ ગામેથી પ્રારંભ : મંત્રી પ્રવીણભાઈ માળીના હસ્તે 120 એકરમાં હરિયાળીની મહાયાત્રાનો પ્રારંભ

ઓનલાઈન અરજી માટે શું કરવું પડશે?

રજીસ્ટ્રેશન માટે અરજદારે અમદાવાદ મ્યુનિસિપલ કોર્પોરેશનની સત્તાવાર વેબસાઇટ પર જઈ ઓનલાઈન અરજી કરવાની રહેશે. અરજી દરમિયાન માલિકની વ્યક્તિગત માહિતી તેમજ પાલતુ બિલાડી સંબંધિત વિગતો ભરવાની રહેશે. સાથે જ જરૂરી દસ્તાવેજો અને ફોટોગ્રાફ પણ અપલોડ કરવાના રહેશે.

પાલતુ બિલાડીના રજીસ્ટ્રેશન માટે કોર્પોરેશને ₹200 ફી નક્કી કરી છે. અરજી સાથે આધાર કાર્ડ અથવા મતદાર ઓળખપત્ર, મિલકત વેરાનું બિલ, વીજળીનું બિલ, અરજદારનો ફોટોગ્રાફ, પાલતુ બિલાડીનો ફોટો તેમજ બિલાડીને જ્યાં રાખવામાં આવે છે તે સ્થળનો ફોટોગ્રાફ અપલોડ કરવો ફરજિયાત રહેશે. અધિકારીઓના જણાવ્યા મુજબ જરૂરી માહિતી પૂર્ણ થયા બાદ અરજીની ચકાસણી કરીને નોંધણી પ્રક્રિયા પૂર્ણ કરવામાં આવશે.

શા માટે અમલમાં આવ્યો નિર્ણય?

AMCના જણાવ્યા મુજબ આ નિર્ણય સુપ્રીમ કોર્ટના માર્ગદર્શન, એનિમલ વેલ્ફેર બોર્ડ ઓફ ઇન્ડિયાની માર્ગદર્શિકા તેમજ લાગુ કાયદા અને નિયમોના પાલનના ભાગરૂપે લેવામાં આવ્યો છે. પાલતુ પ્રાણીઓની નોંધણીથી જવાબદાર પાલતુ માલિકીની સંસ્કૃતિને પ્રોત્સાહન મળશે, સાથે જ પ્રાણી કલ્યાણ સંબંધિત નિયમોનું અસરકારક પાલન કરાવવામાં પણ સરળતા રહેશે.

નગરપાલિકાના અધિકારીઓનું કહેવું છે કે શહેરમાં પાલતુ પ્રાણીઓની સંખ્યા અંગે ચોક્કસ માહિતી ઉપલબ્ધ થવાથી રસીકરણ, પ્રાણી આરોગ્ય, ફરિયાદોના નિવારણ અને અન્ય વહીવટી કામગીરી વધુ અસરકારક રીતે કરી શકાશે. અગાઉ પણ કોર્પોરેશને પાલતુ શ્વાનના રજીસ્ટ્રેશન માટે ઓનલાઈન વ્યવસ્થા શરૂ કરી હતી અને હવે તે જ પ્રક્રિયાને બિલાડીઓ માટે પણ વિસ્તૃત કરવામાં આવી છે.

આ પણ વાંચો: વેરાવળમાં જુગાર ક્લબ પર દરોડો પાડવા ગયેલી SMCની ટીમ પર હુમલાનો પ્રયાસ : PIએ કર્યું ફાયરિંગ

પેટ પેરેન્ટ્સ માટે મહત્વની સલાહ

જો તમારા ઘરે પાલતુ બિલાડી છે તો છેલ્લી તારીખની રાહ જોયા વગર સમયસર નોંધણી કરાવી દેવી યોગ્ય રહેશે. અરજીમાં કોઈ દસ્તાવેજ અધૂરો રહે અથવા ખોટી માહિતી આપવામાં આવે તો પ્રક્રિયામાં વિલંબ થઈ શકે છે. તેથી તમામ જરૂરી દસ્તાવેજો તૈયાર રાખીને ઓનલાઈન અરજી પૂર્ણ કરવાની સલાહ આપવામાં આવી છે.

વધુ માહિતી અથવા કોઈ ટેકનિકલ મુશ્કેલી સર્જાય તો નાગરિકો અમદાવાદ મ્યુનિસિપલ કોર્પોરેશનના વેટરનરી અથવા CNCD વિભાગનો સંપર્ક કરી શકે છે. કોર્પોરેશને પણ નાગરિકોને નિયમોનું પાલન કરીને જવાબદાર પાલતુ માલિક તરીકે સહયોગ આપવા અપીલ કરી છે.