અમદાવાદ શહેરમાં એક દુઃખદ ઘટના બની છે. જેમાં ખોડિયારનગર વિસ્તારમાં BRTS બસે એક યુવકને ટક્કર મારતા તેનું સ્થળ પર જ મોત થયું હતું. ઘટના મુજબ મૂળ ઉત્તર પ્રદેશના રહેવાસી ફુલેન્દ્ર પ્રસાદ (ઉંમર 29 વર્ષ) રોજગારી માટે અમદાવાદ આવ્યો હતો.
ફુલેન્દ્રને માથા અને ચહેરાના ભાગે ગંભીર ઇજા
મૃતક યુવક પોતાના ભાઈ સાથે શ્રમિક તરીકે કામ કરતો હતો. ગઈકાલે રાત્રે ફુલેન્દ્ર પોતાના મિત્ર સાથે શાકભાજી લેવા માટે બહાર ગયો હતો. તે સમયે ખોડિયારનગર વિસ્તારની BRTS ટ્રેક પાર કરતાં અચાનક પૂરપાટ ઝડપે આવતી BRTS બસે તેને ટક્કર મારી હતી. ટક્કર એટલી જોરદાર હતી કે ફુલેન્દ્રને માથા અને ચહેરાના ભાગે ગંભીર ઇજા પહોંચી હતી.
પોલીસે તપાસ હાથધરી
ઈજાઓ ગંભીર હોવાથી તેનું ઘટના સ્થળે જ મોત થયું હતું. અકસ્માત પછી સ્થળ પર લોકોની ભીડ એકત્ર થઈ ગઈ હતી અને ઘટનાની જાણ થતાં જ ડિવિઝન ટ્રાફિક પોલીસ સ્થળ પર પહોંચી કાર્યવાહી હાથ ધરી હતી.
લોકોમાં શોક છવાયો
ફુલેન્દ્ર પ્રસાદનો મોતથી પરિવારજનો અને વિસ્તારના લોકોમાં શોક છવાયો છે. આ ઘટના બાદ સ્થાનિક રહેવાસીઓએ પ્રશ્ન ઉઠાવ્યો છે કે BRTS ટ્રેક પર રાહદારીઓ માટે પૂરતી સલામતી વ્યવસ્થા ન હોવાથી આવા અકસ્માતો બને છે અને તંત્રએ આ મુદ્દે તાત્કાલિક પગલા લેવા જોઈએ.
