Surat Airport Douglas DC-3: ગુજરાતના સુરત આંતરરાષ્ટ્રીય એરપોર્ટ પર આજે એક અવિસ્મરણીય દૃશ્ય જોવા મળ્યું – બીજા વિશ્વયુદ્ધનો જીવંત સાક્ષી અને નાઝી શાસનને પડકારનારું ઐતિહાસિક વિમાન Douglas DC-3 અહીં ઉતર્યું! આ 84 વર્ષ જૂનું વિમાન, જેને 'વર્કહોર્સ ઓફ ધ સ્કાય' (આકાશનું કામદાર પક્ષી) તરીકે ઓળખવામાં આવે છે, 1944ના ઐતિહાસિક D-Day ઓપરેશનમાં મહત્વની ભૂમિકા ભજવી હતી. મિત્ર રાષ્ટ્રોએ નોર્મન્ડીમાં નાઝી જર્મની સામે હુમલો કર્યો ત્યારે આ DC-3એ સૈનિકો, હથિયારો અને પુરવઠાનું પરિવહન કરીને યુદ્ધના વળાંકમાં મોટો ફાળો આપ્યો હતો.
બે શક્તિશાળી Pratt & Whitney એન્જિન
1930ના દાયકામાં Douglas Aircraft Company દ્વારા બનાવાયેલ આ વિમાન આજે પણ તેની મજબૂતી માટે પ્રખ્યાત છે. તેમાં બે શક્તિશાળી Pratt & Whitney એન્જિન છે, અને ખાસ વાત એ કે એક એન્જિન ખરાબ થાય તો પણ બીજું એન્જિન વિમાનને સુરક્ષિત રીતે ઉડાડી શકે છે. આધુનિક જેટ વિમાનો 20-25 વર્ષમાં નિવૃત્ત થઈ જાય છે, પરંતુ DC-3 80+ વર્ષ પછી પણ ગર્વથી આકાશમાં ઉડી રહ્યું છે!
જીવંત ઇતિહાસનું પ્રતીક
હાલ આ ઐતિહાસિક 'લોખંડી પક્ષી' વર્લ્ડ ટૂર પર છે, જેનો ઉદ્દેશ નવી પેઢીને એવિએશનના સુવર્ણ યુગથી પરિચિત કરાવવાનો છે. સુરત એરપોર્ટ પર ફ્યુઅલ ભર્યા બાદ તે વડોદરા માટે રવાના થયું, જ્યાં પણ એવિએશન પ્રેમીઓ અને લોકોમાં ભારે ઉત્સાહ જોવા મળ્યો.આ જીવંત ઇતિહાસનું પ્રતીક ગુજરાતના આકાશમાં ઉડીને સાહસ, મજબૂતી અને માનવ સંકલ્પનું જીવંત ઉદાહરણ બની રહ્યું છે!
