સરદાર વલ્લભભાઈ પટેલ આંતરરાષ્ટ્રીય એરપોર્ટ પર ફરી એકવાર સોના અને મોંઘી વસ્તુઓની દાણચોરી ડામવા માટે તંત્ર સક્રિય બન્યું છે. એર ઈન્ટેલિજન્સ યુનિટ એટલે કે એઆઈયુની ટીમે કરેલી એક મોટી કાર્યવાહીમાં દુબઈથી ગેરકાયદેસર રીતે લાવવામાં આવતા લાખો રૂપિયાના મોબાઈલ ફોન પકડી પાડવામાં આવ્યા છે. વિદેશથી આવતી ફ્લાઈટમાં એક મહિલા મુસાફરની હિલચાલ શંકાસ્પદ જણાતા કસ્ટમ્સ અધિકારીઓએ તેની તપાસ હાથ ધરી હતી જેમાં ચોંકાવનારો ખુલાસો થયો હતો અને તેની પાસેથી એપલ કંપનીના લેટેસ્ટ મોડલના ફોનનો જથ્થો મળી આવ્યો હતો.
પ્રાપ્ત વિગતો અનુસાર સ્પાઈસજેટની ફ્લાઈટ નંબર એસજી 9016 દુબઈથી અમદાવાદ આવી હતી. આ ફ્લાઈટમાં મુસાફરી કરી રહેલી એક મહિલા પેસેન્જરના સામાનની ઝીણવટભરી તપાસ કરવામાં આવતા તેમાંથી કુલ 30 નંગ આઈફોન મળી આવ્યા હતા. અધિકારીઓએ તપાસ કરતા માલુમ પડ્યું કે આ જથ્થામાં 20 નંગ આઈફોન 17 પ્રો મેક્સ અને 10 નંગ આઈફોન 17 પ્રો મોડલનો સમાવેશ થાય છે. આ સ્માર્ટફોન હાલમાં જ લોન્ચ થયા હોવાથી તેની માંગ વધારે છે. જપ્ત કરવામાં આવેલા આ તમામ મોબાઈલ ફોનની કુલ બજાર કિંમત અંદાજે 43 લાખ રૂપિયા જેટલી થાય છે.
પ્રાથમિક તપાસમાં સામે આવ્યું છે કે કસ્ટમ્સ ડ્યુટી ભરવી ના પડે તે ઈરાદે મહિલા મુસાફરે આ કિંમતી મોબાઈલ ફોન પોતાના સામાનમાં છુપાવીને લાવવાનો પ્રયાસ કર્યો હતો. જોકે એરપોર્ટ પર તૈનાત સતર્ક અધિકારીઓની નજરથી તે બચી શકી ન હતી. કસ્ટમ્સ એક્ટની વિવિધ જોગવાઈઓ હેઠળ અધિકારીઓએ તમામ 30 આઈફોન જપ્ત કરી લીધા છે અને કાયદેસરની કાર્યવાહી શરૂ કરી છે.
હાલમાં કસ્ટમ્સ વિભાગ દ્વારા આ મામલે સઘન તપાસ ચલાવવામાં આવી રહી છે. અધિકારીઓ એ દિશામાં તપાસ કરી રહ્યા છે કે દુબઈથી આટલી મોટી સંખ્યામાં ફોન કોણે મોકલ્યા હતા અને અમદાવાદમાં તે કોને પહોંચાડવાના હતા. શું આ મહિલા માત્ર કેરિયર તરીકે કામ કરી રહી હતી કે કેમ તેની પૂછપરછ ચાલી રહી છે. આ ઘટના બાદ એરપોર્ટ પર ચેકિંગ વ્યવસ્થા વધુ કડક બનાવી દેવામાં આવી છે.
