હજું તો સોનાનો ભાવ આસમાન આંબશે! : 4000 રૂપિયા સસ્તુ થયા બાદ કેમ મોંઘુ થયું સોનું? કેમ બદલવા લાગ્યા એક્સર્ટના દાવા

સોનાના ભાવમાં ફરી એકવાર તેજી જોવા મળી રહી છે. છેલ્લા કેટલાક દિવસોમાં સોનાના ભાવમાં રૂપિયા 4,000થી વધુનો ઘટાડો થયા બાદ ફરી તેજી શરૂ થઈ છે. સોનાના ભાવમાં થયેલા આ વધારાએ નિષ્ણાતોના એ દાવાને સંપૂર્ણપણે ખોટા સાબિત કર્યા છે, જેમાં એવું કહેવામાં આવ્યું હતું કે સોનું સસ્તું થશે. તો હવે સવાલ એ થાય છે કે અહીંથી સોનું ક્યાં જશે?

એક લાખને ક્યારે પાર કરશે?
સોનાને લગતા ઘણા નિષ્ણાતો આગાહી કરી રહ્યા હતા કે આ પીળી ધાતુ હવે નીચેની તરફ જશે. તેમનું માનવું હતું કે સોનાએ વૈશ્વિક સ્થિતિનો મહત્તમ લાભ લીધો છે અને હવે તેના ભાવ ઘટી શકે છે. થોડા દિવસો માટે પરિસ્થિતિમાં નરમાઈથી અમને લાગ્યું કે આ દાવાઓ સાચા છે, પરંતુ હવે ચિત્ર સંપૂર્ણપણે બદલાઈ ગયું છે. સોનું ફરી એકવાર ઉંચી સપાટીએ છે. તેની કિંમત 95 હજારના આંકડાને વટાવી ગઈ છે, જેના કારણે તે એક લાખના સ્તરે સ્પર્શવાની આશા વધી ગઈ છે.

હવે શું છે ભાવ?
24 કેરેટ સોનાના 10 ગ્રામની કિંમત હાલમાં 95,670 રૂપિયા છે. ગુડ રિટર્ન્સ મુજબ શુક્રવારે સોનું રૂ.95,400ના સ્તરે હતું. સોનામાં છેલ્લા એક-બે સત્રમાં મોટો ઉછાળો આવ્યો છે, જેણે ઘટાડાનાં તમામ અનુમાનોને તોડી પાડ્યાં છે. મોર્નિંગસ્ટાર માર્કેટ સ્ટ્રેટેજિસ્ટ જ્હોન મિલ્સે તાજેતરમાં જણાવ્યું હતું કે સોનામાં હવે ઘટાડાનો સામનો કરવો પડી શકે છે કારણ કે તેની માંગ ઘટશે. એ જ રીતે, અન્ય કેટલાક નિષ્ણાતો પણ માને છે કે હવે ટેરિફ અંગેની સ્થિતિ સ્પષ્ટ થઈ ગઈ છે, તેમાં થોડી નરમાઈ આવશે.

શા માટે આવી રહી છે તેજી?
આવી સ્થિતિમાં એવો સવાલ પણ ઉઠે છે કે સોનાના ભાવ તમામ અંદાજોથી વિપરીત કેમ વધી રહ્યા છે? વાસ્તવમાં અમેરિકી રાષ્ટ્રપતિ ડોનાલ્ડ ટ્રમ્પે ચીન પર ભારે ટેરિફ લાદ્યો છે. બીજી તરફ ચીન પણ અમેરિકાને સતત જવાબ આપી રહ્યું છે. જેના કારણે બંને વચ્ચે તણાવ ખતરનાક સ્તરે પહોંચી ગયો છે. ચીન અને અમેરિકા વિશ્વની બે સૌથી મોટી અર્થવ્યવસ્થા છે. તેમની વચ્ચેના સંઘર્ષની વિશ્વ પર અસર થવાની જ છે. આવા ભયથી સોનામાં રોકાણ વધે છે અને આવું જ થઈ રહ્યું છે. પરિણામે તેની કિંમત વધી રહી છે.

હવે શું છે અનુમાન?
હાલના માહોલને જોતા એવું કહી શકાય કે સોનાના ભાવમાં વધુ વધારો થઈ શકે છે. ભારતમાં 14 એપ્રિલથી લગ્નની સિઝન શરૂ થઈ રહી છે, આ દરમિયાન સોનાનું વેચાણ વધવાની આશા છે. તેનાથી સોનાના ભાવમાં પણ વધારો થઈ શકે છે. હવે કેટલાક નિષ્ણાતો માને છે કે ચીન અને અમેરિકા વચ્ચે વધતા તણાવથી સોનાને વધુ મજબૂતી મળી શકે છે. તેમનું એમ પણ કહેવું છે કે જો યુએસ ફેડરલ રિઝર્વ આ વર્ષે બે વખત વ્યાજદરમાં ઘટાડો કરે તો સોનાની કિંમત રૂ. 1 લાખને પાર કરી શકે છે.