ગુજરાતમાં ક્યારથી લાગુ થશે યુનિફોર્મ સિવિલ કોડ? : મુખ્યમંત્રીએ યોજી બેઠક, એક મહિનામાં આવશે રિપોર્ટ

Gujarat News: ઉત્તરાખંડ પછી ગુજરાત હવે દેશનું બીજું રાજ્ય બનવા જઈ રહ્યું છે જ્યાં યુનિફોર્મ સિવિલ કોડ (UCC) ના અમલીકરણ માટે તૈયારીઓ શરૂ થઈ ગઈ છે. આ અંગે, રાજ્ય સરકારે આજે સત્તાવાર રીતે UCC સમિતિની જાહેરાત કરી છે. આ સમિતિ નાગરિકો પાસેથી સૂચનો લેવા અને તેમના મંતવ્યો જાણવાનું કામ કરી રહી છે. થોડા સમય પહેલા, મુખ્યમંત્રી ભૂપેન્દ્ર પટેલે એક પત્રકાર પરિષદમાં UCC ના અમલીકરણ અંગે મોટી જાહેરાત કરી હતી.

મુખ્યમંત્રી ભૂપેન્દ્ર પટેલે સમિતિ સાથે એક મહત્વપૂર્ણ બેઠક યોજી

આજે મુખ્યમંત્રી ભૂપેન્દ્ર પટેલની અધ્યક્ષતામાં UCC અંગે એક મહત્વપૂર્ણ બેઠક યોજાઈ હતી, જેમાં UCC સમિતિના તમામ સભ્યોએ ભાગ લીધો હતો. આ બેઠકમાં અહેવાલના ડ્રાફ્ટ અને નાગરિકો તરફથી મળેલા સૂચનો પર ચર્ચા કરવામાં આવી હતી. સમિતિએ રાજ્યભરના નાગરિકો સાથે વાતચીત કરીને તેમના મંતવ્યો સાંભળ્યા છે. એવો અંદાજ છે કે આગામી એક મહિનામાં આ સમિતિ રાજ્ય સરકારને પોતાનો અહેવાલ સુપરત કરશે, સંભવતઃ આ અહેવાલ ચોમાસા સત્ર દરમિયાન રજૂ કરવામાં આવશે. આ પછી આગામી છ મહિનામાં UCC લાગુ કરી શકાય છે.

સમિતિના અધ્યક્ષ રંજનદેસાઈનું નિવેદન

યુસીસી સમિતિના અધ્યક્ષ નિવૃત્ત ન્યાયાધીશ રંજનદેસાઈએ જણાવ્યું હતું કે કાયદાના અમલીકરણમાં વધુ સમય લાગશે નહીં. અમે દરેક જિલ્લાની મુલાકાત લીધી અને નાગરિકો સાથે વાતચીત કરી અને દરેક બેઠકનો રેકોર્ડ પણ રાખવામાં આવ્યો છે. અત્યાર સુધીમાં સમિતિને 1.15 લાખથી વધુ સૂચનો મળ્યા છે. રાજ્ય સરકારના પ્રવક્તા મંત્રી ઋષિકેશ પટેલે પણ પુષ્ટિ આપી હતી કે આજે મુખ્યમંત્રી સાથે યુસીસી અંગે એક મહત્વપૂર્ણ બેઠક યોજાઈ હતી અને એક મહિનાની અંદર રિપોર્ટ રજૂ કરવામાં આવશે. સરકાર ચોમાસુ સત્રમાં બિલ લાવી શકે છે.

પાંચ સભ્યોની સમિતિએ નાગરિકો સાથે કરી વાતચીત

ગુજરાત સરકારે સુપ્રીમ કોર્ટના ભૂતપૂર્વ ન્યાયાધીશ રંજન દેસાઈના નેતૃત્વમાં પાંચ સભ્યોની સમિતિની રચના કરી છે. આ સમિતિમાં ભૂતપૂર્વ કુલપતિ દક્ષેશ ઠાકોર, ભૂતપૂર્વ આઈએએસ અધિકારી સી.એલ. મીણા, એડવોકેટ આર.સી. કોડેકર અને સામાજિક કાર્યકર ગીતા શ્રોફનો સમાવેશ થાય છે. સમિતિએ રાજ્યભરના નાગરિકોને મળ્યા અને સૂચનો લીધા અને યુસીસીની સંભવિત અસરો પર ચર્ચા કરી.

શું છે યુસીસી એટલે યુનિફોર્મ સિવિલ કોડ (UCC)?

યુસીસી એટલે યુનિફોર્મ સિવિલ કોડ, સરળ શબ્દોમાં તેનો અર્થ "એક દેશ, એક કાયદો" થાય છે. તેનો ઉદ્દેશ્ય ભારતના તમામ નાગરિકો માટે લગ્ન, છૂટાછેડા, દત્તક, મિલકત અને વારસા સંબંધિત બાબતોમાં એક સમાન કાયદો લાગુ કરવાનો છે, પછી ભલે તેમનો ધર્મ કે જાતિ કોઈ પણ હોય. હાલમાં ભારતમાં વિવિધ ધર્મો માટે અલગ અલગ વ્યક્તિગત કાયદા છે.

UCC એ ભારતીય બંધારણના અનુચ્છેદ 44 નો ભાગ છે, જે રાજ્ય નીતિના નિર્દેશક સિદ્ધાંતોમાં સમાવિષ્ટ છે. તે દેશમાં સમાન નાગરિક સંહિતા લાગુ કરવાની સરકારની જવાબદારી દર્શાવે છે. જો આ પાયલોટ મોડેલ ગુજરાતમાં સફળ થાય છે, તો UCC ટૂંક સમયમાં અન્ય રાજ્યો માટે પણ એક ઉદાહરણ બની શકે છે.