Gujarat Weather Update: ગુજરાતમાં કાળઝાળ ગરમી વચ્ચે નાગરિકો માટે રાહતના સમાચાર સામે આવ્યા છે. હવામાન વિભાગના જણાવ્યા અનુસાર, આગામી થોડા દિવસોમાં તાપમાનમાં સામાન્ય ઘટાડો નોંધાઈ શકે છે, જેનાથી લોકોને બફારા અને લૂથી આંશિક રાહત મળશે. હવામાન વિભાગના ડાયરેક્ટર એ.કે.દાસે તાજેતરમાં રાજ્યની આબોહવા અંગે મહત્વની વિગતો શેર કરી છે. તેમના જણાવ્યા મુજબ, રાજ્યમાં હાલ ગરમીનું જોર યથાવત છે પરંતુ આગામી દિવસોમાં પવનની દિશામાં ફેરફાર અને અન્ય વાતાવરણીય પરિબળોને કારણે મહત્તમ તાપમાનમાં મામૂલી ઘટાડો જોવા મળી શકે છે. ખાસ કરીને દરિયાકાંઠાના વિસ્તારોમાં પશ્ચિમી પવનો ફૂંકાવાને કારણે વાતાવરણમાં ફેરફારની શક્યતા છે.
આગામી એક સપ્તાહ કેવું રહેશે વાતાવરણ?
હવામાન વિભાગની આગાહી મુજબ, 30 એપ્રિલથી 6 મે સુધી રાજ્યમાં વાતાવરણ મુખ્યત્વે શુષ્ક રહેશે. આ સાત દિવસો દરમિયાન વરસાદની કોઈ શક્યતા નથી, પરંતુ ગરમીમાં આંશિક ઘટાડો થવાની સંભાવના છે. એ.કે.દાસના જણાવ્યા અનુસાર, આગામી દિવસોમાં રાજ્યના મોટાભાગના શહેરોમાં મહત્તમ તાપમાનમાં 1 થી 2 ડિગ્રી જેટલો ઘટાડો નોંધાઈ શકે છે. આ ઘટાડો ભલે સામાન્ય લાગે, પણ સતત વધી રહેલી ગરમી વચ્ચે નાગરિકો માટે આ એક મોટી રાહત સાબિત થશે.
પવનની દિશા અને દરિયાઈ પટ્ટી પર અસર, રાજકોટમાં ગરમીનો કહેર
અત્યારે દરિયાઈ વિસ્તારોમાં પશ્ચિમ દિશા તરફથી પવન ફૂંકાઈ રહ્યા છે. ઉત્તર ગુજરાતના દરિયાકાંઠાના વિસ્તારોમાં પશ્ચિમી પવનો અને દક્ષિણ ગુજરાતના વિસ્તારોમાં દક્ષિણ-પશ્ચિમથી પશ્ચિમી પવનો ફૂંકાવાની શક્યતા છે. પવનની ગતિ અંદાજે 15 થી 20 નોટ રહેવાની સંભાવના છે. રાજ્યમાં ગરમીના આંકડાઓની વાત કરીએ તો, ગઈકાલે રાજકોટ 43.0 ડિગ્રી તાપમાન સાથે રાજ્યનું સૌથી ગરમ શહેર નોંધાયું હતું. આ ઉપરાંત અમદાવાદમાં પણ પારો 42.6 ડિગ્રી અને ગાંધીનગરમાં 42.2 ડિગ્રી સુધી પહોંચ્યો હતો.
અમદાવાદમાં ગરમીની સ્થિતિ
અમદાવાદ શહેર માટે કરવામાં આવેલી આગાહી મુજબ, આગામી 24 કલાકમાં આકાશ મુખ્યત્વે સાફ રહેશે. શહેરમાં મહત્તમ તાપમાન 42 ડિગ્રીની આસપાસ રહેવાની શક્યતા છે. જોકે, આગામી પાંચ દિવસ સુધી રાજ્યના મોટાભાગના વિસ્તારોમાં તાપમાન 40 ડિગ્રીથી ઉપર રહેવાનું અનુમાન છે, તેથી બપોરના સમયે સાવચેતી રાખવી જરૂરી છે.
