વાપી: ઔદ્યોગિક નગરી વાપીમાં આજે બપોરે એક મોટી દુર્ઘટના સર્જાઈ હતી, જ્યારે શાહ પેપર મિલમાં અચાનક ભીષણ આગ ભભૂકી ઉઠતાં સમગ્ર વિસ્તારમાં અફરાતફરી મચી ગઈ હતી. આગ એટલી વિકરાળ હતી કે થોડા જ સમયમાં સમગ્ર મિલ પરિસર તેની ઝપેટમાં આવી ગયું હતું.
કેવી રીતે લાગી આગ
મળતી માહિતી મુજબ બપોરના સમયે અચાનક આગ લાગતા શરૂઆતમાં કર્મચારીઓએ જાતે જ આગ બુઝાવવાનો પ્રયાસ કર્યો હતો, પરંતુ આગ ઝડપથી ફેલાતાં સ્થિતિ બેકાબૂ બની ગઈ હતી. આગની જ્વાળાઓ એટલી ઊંચી ઉઠી રહી હતી કે દૂરથી પણ સ્પષ્ટ દેખાતી હતી, જ્યારે કાળા ધુમાડાના ગોટાળા આકાશમાં છવાઈ જતા આસપાસના વિસ્તારોમાં ભયનો માહોલ સર્જાયો હતો.
ઘટનાની જાણ થતાં જ ફાયર બ્રિગેડની અનેક ગાડીઓ તાત્કાલિક સ્થળ પર દોડી આવી હતી અને આગ બુઝાવવાની કામગીરી હાથ ધરાઈ હતી. આગની તીવ્રતા વધુ હોવાને કારણે ફાયર વિભાગની ટીમોને કલાકો સુધી જહેમત ઉઠાવવી પડી હતી. લાંબી મથામણ બાદ આગ પર મોટા પાયે કાબૂ મેળવવામાં સફળતા મળી હતી, જોકે કૂલિંગ કામગીરી હજુ પણ ચાલુ છે.
પ્રાથમિક અનુમાન મુજબ શોર્ટ સર્કિટ અથવા ટેક્નિકલ ખામીના કારણે આગ લાગી હોવાની શક્યતા વ્યક્ત કરવામાં આવી રહી છે. ઘટનાની સચોટ કારણ જાણવા માટે તપાસ શરૂ કરવામાં આવી છે.
સદનસીબે આ ઘટનામાં કોઈ જાનહાનિ નોંધાઈ નથી. સમયસર તમામ કર્મચારીઓને સલામત બહાર કાઢી લેવામાં આવતા મોટો અકસ્માત ટળી ગયો હતો.
પરંતુ આગના કારણે મિલને ભારે આર્થિક નુકસાન વેઠવું પડ્યું છે. મશીનો, કાચો માલ અને અન્ય સામગ્રી બળી ખાક થઈ ગઈ હોવાનું જાણવા મળે છે. હાલ પ્રશાસન અને ફાયર વિભાગની ટીમો સ્થળ પર હાજર રહી પરિસ્થિતિ પર નજર રાખી રહી છે.
