Vadodara News: વડોદરા મહાનગરપાલિકાની ચૂંટણીનો જંગ જામ્યો છે, ત્યારે કોંગ્રેસ દ્વારા જાહેર 18 ઉમેદવારોના નામ જાહેર કરવામાં આવ્યા હતા, પરંતુ તે પૈકી વોર્ડ નંબર 8 ના એક મહિલા ઉમેદવારે પોતાની દાવેદારી પરત ખેંચી લેતા રાજકીય વર્તુળોમાં ચર્ચા જાગી છે.
વડોદરા મહાનગરપાલિકાની ચૂંટણીને હવે ગણતરીના દિવસો બાકી છે, ત્યારે તમામ પક્ષો પોતાની રણનીતિ ઘડવામાં વ્યસ્ત છે. શહેર કોંગ્રેસ સમિતિ દ્વારા ગતરોજ 18 જેટલા મજબૂત ઉમેદવારોના નામની પ્રથમ યાદી જાહેર કરવામાં આવી હતી. જોકે, આ યાદી જાહેર થયાના ગણતરીના કલાકોમાં જ વોર્ડ નંબર 8 માં સમીકરણો બદલાયા છે. વોર્ડ નંબર 8 ના મહિલા ઉમેદવાર ઉર્મિલાબેન પરમારે અચાનક જ ચૂંટણી મેદાનમાંથી ખસી જવાનો નિર્ણય લીધો છે.
ઉર્મિલાબેને પોતાની દાવેદારી પરત ખેંચવા પાછળ અંગત અને પારિવારિક કારણો જવાબદાર ગણાવ્યા છે. મળતી માહિતી મુજબ, ઉર્મિલાબેનના સસરાનું દુઃખદ અવસાન થતા, પરિવાર પર આવી પડેલી આ આફતને પગલે તેમણે ચૂંટણી ન લડવાનો નિર્ણય કર્યો છે. આ ગંભીર પરિસ્થિતિ અંગે વડોદરા શહેર કોંગ્રેસ પ્રમુખ ઋત્વિજ જોષીએ મીડિયા સાથેની વાતચીતમાં વિગતવાર માહિતી આપી હતી.
