વડોદરાનું પોલીસ ખાતું ફરી એક વખત શરમજનક પરિસ્થિતિમાં મૂકાયું છે. લાંચ લેતા વધુ એક પોલીસ અધિકારીનો વીડિયો સોશિયલ મીડિયામાં વાયરલ થતાં ભારે ચર્ચા શરૂ થઈ છે. વડોદરાની રિફાઇનરી પોલીસ ચોકીમાં ફરજ બજાવતા તત્કાલીન PSI એન. એન. ઝવેરીનો રૂપિયા લેતા હોવાનું વીડિયોમાં સ્પષ્ટ દેખાઈ રહ્યું છે.
20 હજાર રૂપિયા લેતા દ્રશ્યો
આ વીડિયો મારામારીના એક કેસમાં પતાવટ કરાવવા માટે લાંચ લેવામાં આવી હોવાનો હોવાનું કહેવાય છે. આરોપ મુજબ PSI ઝવેરીએ કેસમાં સમાધાન કરાવી આપવા માટે કુલ 40 હજાર રૂપિયાની માંગ કરી હતી, જેમાંથી 20 હજાર રૂપિયા લેતા દ્રશ્યો વીડિયો ક્લિપમાં કેદ થયા હોવાનું સામે આવ્યું છે. આ ગંભીર આક્ષેપ મુસ્તુફા ઉર્ફે ઇનાયત ઇબ્રાહિમ ખાટકી દ્વારા કરવામાં આવ્યો છે, જેના કારણે સમગ્ર મામલો વધુ ગંભીર બની ગયો છે.
PSI એન. એન. ઝવેરીને તાત્કાલિક સસ્પેન્ડ કરવામાં આવ્યા
વીડિયો વાયરલ થતાં જ પોલીસ વિભાગમાં દોડધામ મચી ગઈ હતી. ઘટનાને પગલે પોલીસ કમિશનરે તાત્કાલિક તપાસના આદેશ આપ્યા છે. સમગ્ર મામલાની તપાસ DCP ઝોન-1ને સોંપવામાં આવી છે. સાથે જ લાંચની માંગ દર્શાવતો વીડિયો હોવાના આધાર પર PSI એન. એન. ઝવેરીને તાત્કાલિક સસ્પેન્ડ કરવામાં આવ્યા છે.
તપાસ હાથ ધરાઈ
આ ઉપરાંત આ કેસની વધુ તપાસ ACP એ ડિવિઝન દ્વારા હાથ ધરવામાં આવી છે. વર્દી પહેરીને હરામની કમાણી કરતા કેટલાક પોલીસ કર્મીઓ ઈમાન ગીરવે મૂકી દેવાનો મુદ્દો ફરી એકવાર ચર્ચાના કેન્દ્રમાં આવ્યો છે.
