અમદાવાદ: ગુજરાતમાં કાળઝાળ ગરમીની શરૂઆત થાય તે પહેલા જ કુદરતે પોતાનો મિજાજ બદલ્યો છે. હવામાન વિભાગ દ્વારા રાજ્યમાં આજથી આગામી ત્રણ દિવસ સુધી ગાજવીજ સાથે કમોસમી વરસાદ એટલે કે માવઠાની સત્તાવાર આગાહી કરવામાં આવી છે. વેસ્ટર્ન ડિસ્ટર્બન્સ અને સાયક્લોનિક સર્ક્યુલેશનના કારણે રાજ્યના વાતાવરણમાં મોટો પલટો આવ્યો છે. આજે ખાસ કરીને ઉત્તર ગુજરાત અને સૌરાષ્ટ્રના 7 જિલ્લાઓને સાવધ રહેવા સૂચના આપવામાં આવી છે, જ્યાં હળવાથી મધ્યમ વરસાદ સાથે તેજ પવન ફૂંકાવાની શક્યતા છે.
ચોમાસા વિના જ દેશમાં એકસાથે 11 જેટલી વરસાદી સિસ્ટમ સક્રિય થતા હવામાન નિષ્ણાતો પણ ચિંતિત છે. ગુજરાત જ નહીં, પરંતુ પડોશી રાજ્યોમાં પણ આ સિસ્ટમની વ્યાપક અસર જોવા મળશે. આજે બનાસકાંઠાથી લઈને કચ્છ સુધીના પટ્ટામાં વાદળછાયું વાતાવરણ અને ગાજવીજ સાથે વરસાદી ઝાપટાં પડવાની પૂરેપૂરી સંભાવના છે. આ કમોસમી વરસાદને કારણે ખેડૂતોના જીવ અધ્ધર થઈ ગયા છે, કારણ કે તૈયાર થયેલા રવિ પાકને મોટા નુકસાનની ભીતિ સેવાઈ રહી છે.
આજે કયા જિલ્લામાં મેઘરાજાની એન્ટ્રી થશે?
હવામાન વિભાગના જણાવ્યા અનુસાર, આજે 18 માર્ચના રોજ ઉત્તર ગુજરાત અને સૌરાષ્ટ્ર-કચ્છમાં વરસાદી માહોલ જામશે. જેમાં મુખ્યત્વે બનાસકાંઠા, પાટણ, સાબરકાંઠા, દ્વારકા, જામનગર, મોરબી અને કચ્છ જિલ્લાનો સમાવેશ થાય છે. આ વિસ્તારોમાં ગાજવીજ સાથે હળવો વરસાદ પડી શકે છે. પવનની ગતિ સામાન્ય કરતા વધુ રહેવાની શક્યતા હોવાથી દરિયાકાંઠાના વિસ્તારોમાં પણ એલર્ટ જાહેર કરવામાં આવ્યું છે.
19 માર્ચ: આખું ગુજરાત ભીંજાશે, તોફાની પવનની આગાહી
આવતીકાલે એટલે કે 19 માર્ચના રોજ માવઠાની અસર સૌથી વધુ જોવા મળશે. રાજ્યના મોટાભાગના જિલ્લાઓમાં વરસાદની આગાહી છે. જેમાં દક્ષિણ ગુજરાતના સુરત, ભરૂચ, નવસારી, વલસાડ, મધ્ય ગુજરાતના વડોદરા, પંચમહાલ, દાહોદ અને સૌરાષ્ટ્રના તમામ જિલ્લાઓ જેવા કે રાજકોટ, જૂનાગઢ, ભાવનગર, અમરેલીમાં ગાજવીજ અને તેજ પવન સાથે વરસાદ પડી શકે છે. 19 તારીખે પવનની ગતિ 40 કિમી પ્રતિ કલાક સુધી પહોંચી શકે છે.
20 માર્ચ: ઉત્તર અને પૂર્વ ગુજરાતમાં વરસાદી પંજો
માવઠાના ત્રીજા દિવસે એટલે કે 20 માર્ચના રોજ વરસાદનું જોર થોડું ઘટશે, પરંતુ બનાસકાંઠા, સાબરકાંઠા, અરવલ્લી, દાહોદ, મહીસાગર અને કચ્છમાં હળવાથી મધ્યમ વરસાદની આગાહી યથાવત રાખવામાં આવી છે. 21 માર્ચ બાદ જ વાતાવરણ ધીમે-ધીમે ચોખ્ખું થવાની શરૂઆત થશે.
ચોમાસા જેવો માહોલ કેમ? જાણો 11 સક્રિય સિસ્ટમ વિશે
હાલમાં દેશમાં એક અનોખી હવામાનની સ્થિતિ સર્જાઈ છે. સામાન્ય રીતે ચોમાસામાં જોવા મળતી સિસ્ટમ અત્યારે માર્ચ મહિનામાં સક્રિય થઈ છે:
સાયક્લોનિક સર્ક્યુલેશન: રાજસ્થાન-ગુજરાત સરહદ અને પાકિસ્તાન સરહદે બે મજબૂત સર્ક્યુલેશન સક્રિય છે.
ટ્રફ લાઈન: પૂર્વ મધ્ય પ્રદેશથી લઈને ઉત્તર પ્રદેશ સુધી વેસ્ટર્ન ડિસ્ટર્બન્સની ટ્રફ લાઈન સર્જાઈ છે.
દક્ષિણ ભારત: દક્ષિણ ભારતમાં પણ બે અલગ-અલગ ટ્રફ લાઈન સક્રિય હોવાથી ભેજનું પ્રમાણ વધ્યું છે. આ તમામ સિસ્ટમો ભેગી મળીને સમગ્ર દેશમાં અને ખાસ કરીને ગુજરાતમાં કમોસમી વરસાદી માહોલ ઊભો કરી રહી છે.
ખેડૂતો માટે સાવચેતીની સૂચના
કમોસમી વરસાદની આ આગાહીને જોતા એપીએમસી (APMC) અને ખેડૂતોને ખાસ સૂચના આપવામાં આવી છે કે તેઓ પોતાનો તૈયાર પાક સુરક્ષિત સ્થળે ખસેડે. ખુલ્લામાં રાખેલો અનાજનો જથ્થો પલળી ન જાય તે માટે પ્લાસ્ટિકના કવર અથવા ગોડાઉનનો ઉપયોગ કરવા અપીલ કરવામાં આવી છે.
