વિસનગર ફાટક પાસે આવેલી દુકાન પર ઊંઝા પોલીસનો દરોડો, મુખ્ય આરોપી અને એક બાળ કિશોર ઝડપાયા; ગાંજાનો સપ્લાયર ફરાર, શોધખોળ તેજ
મહેસાણા જિલ્લામાં નશીલા પદાર્થોના વેચાણ અને સપ્લાય સામે પોલીસ દ્વારા સતત કાર્યવાહી હાથ ધરવામાં આવી રહી છે. આ અભિયાનના ભાગરૂપે ઊંઝા પોલીસ સ્ટેશનની ટીમે ખાનગી બાતમીના આધારે સફળ દરોડો પાડી વિસનગર ફાટક નજીક આવેલી એક દુકાનમાંથી ૧૧૧૦ ગ્રામ ગાંજો જપ્ત કર્યો છે. આ કાર્યવાહીમાં મુખ્ય આરોપીની ધરપકડ કરવામાં આવી છે, જ્યારે કાયદાના સંઘર્ષમાં આવેલ એક બાળ કિશોરને પણ કાયદાકીય જોગવાઈઓ મુજબ કસ્ટડીમાં લેવામાં આવ્યો છે.
પોલીસના જણાવ્યા અનુસાર, ખાનગી સૂત્રો પાસેથી મળેલી ચોક્કસ માહિતીના આધારે ઊંઝા પોલીસ સ્ટેશનના પોલીસ ઇન્સ્પેક્ટર જે.પી. સોલંકીના માર્ગદર્શન હેઠળ ટીમે સ્થળ પર દરોડો પાડ્યો હતો. તપાસ દરમિયાન દુકાનમાંથી ગાંજાનો જથ્થો મળી આવતા પોલીસે તાત્કાલિક કાર્યવાહી હાથ ધરી હતી. જપ્ત કરાયેલા ગાંજાનું કુલ વજન ૧૧૧૦ ગ્રામ હોવાનું નોંધાયું છે.
રૂ. 90,970નો મુદ્દામાલ જપ્ત
પોલીસે દરોડા દરમિયાન ગાંજાના જથ્થા ઉપરાંત અન્ય સંબંધિત મુદ્દામાલ પણ કબજે કર્યો હતો. સમગ્ર કાર્યવાહીમાં કુલ અંદાજે રૂ. 90,970નો મુદ્દામાલ જપ્ત કરવામાં આવ્યો હોવાનું પોલીસ દ્વારા જણાવાયું છે. જપ્ત કરાયેલા મુદ્દામાલને પુરાવા તરીકે કબજે લઈને સંબંધિત કાયદાકીય કાર્યવાહી શરૂ કરવામાં આવી છે.
પ્રાથમિક તપાસમાં ઝડપાયેલ મુખ્ય આરોપી મૂળ બિહાર નો રહેવાસી હોવાનું સામે આવ્યું છે. પોલીસે તેની પૂછપરછ શરૂ કરી છે જેથી ગાંજાની સપ્લાય ચેઇન, અન્ય સંડોવાયેલા લોકો અને નશીલા પદાર્થોના નેટવર્ક અંગે વધુ માહિતી મેળવી.
સપ્લાયરની શોધખોળ તેજ
પોલીસ તપાસ દરમિયાન એવું પણ સામે આવ્યું છે કે જપ્ત કરાયેલ ગાંજાનો જથ્થો અન્ય એક વ્યક્તિ દ્વારા સપ્લાય કરવામાં આવ્યો હતો . તેના આધારે પોલીસે સપ્લાયર તરીકે શંકાસ્પદ અન્ય આરોપીની ઓળખ મેળવી તેને ઝડપવા માટે વિવિધ ટીમોને કામગીરી સોંપી છે. પોલીસે જણાવ્યું છે કે સમગ્ર નેટવર્ક સુધી પહોંચવા માટે તપાસને વધુ વિસ્તૃત કરવામાં આવી રહી છે.
આ કેસમાં કાયદાના સંઘર્ષમાં આવેલ એક બાળ કિશોર પણ સંડોવાયેલો હોવાનું સામે આવતા, તેની સામે કિશોર ન્યાય સંબંધિત કાયદાકીય જોગવાઈઓ અનુસાર કાર્યવાહી હાથ ધરવામાં આવી રહી છે. તેની ઓળખ કાયદાકીય કારણોસર જાહેર કરવામાં આવી નથી.
નશાના દૂષણ સામે મહેસાણા પોલીસનું અભિયાન
તાજેતરના સમયમાં મહેસાણા જિલ્લામાં નશીલા પદાર્થોના વેપાર અને હેરફેર સામે પોલીસ વધુ સક્રિય બની છે. ખાસ કરીને યુવાધનને નશાના રવાડે ચડાવતી પ્રવૃત્તિઓ પર અંકુશ લાવવા માટે સતત દરોડા, પેટ્રોલિંગ અને બાતમીના આધારે કાર્યવાહી કરવામાં આવી રહી છે. પોલીસનું માનવું છે કે આવા ગુનાઓ સામે કડક કાર્યવાહી થવાથી નશીલા પદાર્થોના ગેરકાયદેસર વેપારને રોકવામાં મદદ મળશે.
ઊંઝા પોલીસ સ્ટેશનના પીઆઈ જે.પી. સોલંકી અને તેમની ટીમ દ્વારા કરવામાં આવેલી આ કામગીરીને મહત્વપૂર્ણ સફળતા તરીકે જોવામાં આવી રહી છે. પોલીસે નાગરિકોને પણ અપીલ કરી છે કે પોતાના વિસ્તારમાં નશીલા પદાર્થોના વેચાણ અથવા શંકાસ્પદ પ્રવૃત્તિ અંગે કોઈ માહિતી હોય તો તાત્કાલિક પોલીસને જાણ કરે, જેથી સમયસર કાર્યવાહી કરી શકાય.
તપાસ હાલ ચાલુ છે અને આગામી દિવસોમાં આ કેસમાં વધુ ધરપકડ અથવા ખુલાસા થવાની શક્યતા પોલીસ સૂત્રો વ્યક્ત કરી રહ્યા છે.
