આંતરરાષ્ટ્રીય સંયુક્ત રાષ્ટ્ર શાંતિ રક્ષક દિવસ નિમિત્તે ભારત માટે ગૌરવની ક્ષણ સર્જાઈ છે. સંયુક્ત રાષ્ટ્ર દ્વારા ભારતીય સેનાના બે બહાદુર શાંતિરક્ષકોને મરણોત્તર વિશ્વના પ્રતિષ્ઠિત ડેગ હેમર્સજોલ્ડ મેડલથી સન્માનિત કરવામાં આવશે. સાથે જ ભારતીય સેનાની મહિલા અધિકારી મેજર અભિલાષા બરાકને પણ આંતરરાષ્ટ્રીય સ્તરે વિશેષ સન્માન મળવાનું છે. આ સન્માન વૈશ્વિક મંચ પર ભારતની વધતી પ્રતિષ્ઠા અને ભારતીય સૈનિકોની બહાદુરીનું પ્રતિબિંબ માનવામાં આવી રહ્યું છે. સંયુક્ત રાષ્ટ્રના મહાસચિવ António Guterres ખાસ સમારોહ દરમિયાન આ સન્માનો અર્પણ કરશે.
બે ભારતીય શહીદ જવાનોને મરણોત્તર સન્માન
સંયુક્ત રાષ્ટ્ર દ્વારા ભારતીય સેનાના બે શૂરવીર જવાનોને મરણોત્તર ડેગ હેમર્સજોલ્ડ મેડલથી નવાજવામાં આવશે. આ મેડલ UN શાંતિ મિશન દરમિયાન સર્વોચ્ચ બલિદાન આપનાર શાંતિરક્ષકોને આપવામાં આવે છે. લાન્સ હવાલદાર હરભજન સિંહે ડેમોક્રેટિક રિપબ્લિક ઓફ કોંગોમાં સંયુક્ત રાષ્ટ્રના સ્થિરીકરણ મિશન MONUSCO હેઠળ ફરજ બજાવી હતી. ફરજ દરમિયાન તેમણે શૌર્યપૂર્વક સેવા આપતાં શહીદી વહોરી હતી. તે જ રીતે નાયબ સુબેદાર સુજીત કુમાર પ્રધાન દક્ષિણ સુદાનમાં UNMISS મિશન હેઠળ તૈનાત હતા. શાંતિ જાળવવાના મિશન દરમિયાન તેમણે પોતાના કર્તવ્યનું નિષ્ઠાપૂર્વક પાલન કરતાં સર્વોચ્ચ બલિદાન આપ્યું હતું. ભારતીય સેનાના આ બંને જવાનોના સન્માનને દેશ માટે ગૌરવપૂર્ણ ક્ષણ તરીકે જોવામાં આવી રહ્યું છે.
કોણ છે મેજર અભિલાષા બરાક?
અભિલાષા બરાક હાલમાં દેશભરમાં ચર્ચાનું કેન્દ્ર બની છે. હરિયાણાના પંચકુલાની રહેવાસી અભિલાષા બરાક ભારતીય સેનાની પ્રથમ મહિલા કોમ્બેટ એવિએટર તરીકે ઓળખાય છે. તેમણે પોતાના સંઘર્ષ, મહેનત અને સાહસથી ભારતીય સેનામાં મહિલાઓ માટે નવા દ્વાર ખોલ્યા છે. પુરુષ પ્રભુત્વ ધરાવતા સૈનિક ક્ષેત્રમાં અભિલાષાએ અસાધારણ સિદ્ધિ મેળવી દેશનું નામ વિશ્વસ્તરે રોશન કર્યું છે. તેમના આ યોગદાનને ધ્યાનમાં રાખીને હવે સંયુક્ત રાષ્ટ્ર દ્વારા તેમને આંતરરાષ્ટ્રીય સન્માનથી નવાજવામાં આવી રહી છે.
સૈનિક પરિવાર સાથે જોડાયેલું બાળપણ
અભિલાષા બરાક સૈનિક પરિવારમાંથી આવે છે. તેમના પિતા કર્નલ ઓમ સિંહ બરાક ભારતીય સેનામાં સેવા આપી ચૂક્યા છે. બાળપણથી જ સૈનિક છાવણીઓમાં ઉછરવાના કારણે અભિલાષાને શિસ્ત, સાહસ અને દેશસેવાની પ્રેરણા મળી હતી.મળતી માહિતી અનુસાર તેમનો જન્મ તમિલનાડુના ઊટી નજીક બિલ્ગિંટન વિસ્તારમાં થયો હતો. જોકે તેમનું બાળપણ દેશના વિવિધ સૈનિક વિસ્તારોમાં પસાર થયું હતું. અભિલાષાએ હિમાચલ પ્રદેશના સનાવર-કસૌલી સ્થિત ખાનગી શાળામાં 12મું સુધીનું શિક્ષણ મેળવ્યું હતું. ત્યારબાદ તેમણે દિલ્હીમાંથી B.Tech પૂર્ણ કર્યું.
પ્રથમ મહિલા કોમ્બેટ એવિએટર બનવાની સિદ્ધિ
ભારતીય સેનામાં મહિલાઓ માટે કોમ્બેટ એવિએશન ક્ષેત્રમાં પ્રવેશ લાંબા સમય સુધી પડકારરૂપ માનવામાં આવતો હતો. પરંતુ અભિલાષા બરાકે તમામ અવરોધો પાર કરીને ભારતીય સેનાની પ્રથમ મહિલા કોમ્બેટ એવિએટર બનવાની ઐતિહાસિક સિદ્ધિ મેળવી. તેમની આ સફળતા માત્ર મહિલાઓ માટે નહીં પરંતુ સમગ્ર દેશ માટે પ્રેરણારૂપ બની છે. આજે અનેક યુવતીઓ સૈનિક ક્ષેત્રમાં કારકિર્દી બનાવવા માટે અભિલાષાને પ્રેરણા તરીકે જોતી થઈ છે.
યુએન પીસકીપીંગમાં ભારતની મહત્વપૂર્ણ ભૂમિકા
ભારત લાંબા સમયથી સંયુક્ત રાષ્ટ્રના શાંતિ મિશનોમાં મહત્વપૂર્ણ યોગદાન આપતો દેશ રહ્યો છે. દુનિયાના વિવિધ સંઘર્ષગ્રસ્ત વિસ્તારોમાં ભારતીય સૈનિકોએ શાંતિ જાળવવા માટે બહાદુરીપૂર્વક સેવા આપી છે. યુએન પીસકીપીંગમિશનમાં ભારતના હજારો સૈનિકોએ વર્ષોથી ભાગ લીધો છે. અનેક ભારતીય જવાનો પોતાના કર્તવ્ય દરમિયાન શહીદ પણ થયા છે. ભારતીય સૈનિકોની વ્યાવસાયિકતા, શિસ્ત અને માનવતાવાદી અભિગમને કારણે UN મિશનમાં ભારતની છબી સતત મજબૂત બની રહી છે.
મહિલાઓ માટે પ્રેરણારૂપ ક્ષણ
મેજર અભિલાષા બરાકને મળતું આંતરરાષ્ટ્રીય સન્માન ભારતીય મહિલાઓ માટે પણ ઐતિહાસિક ક્ષણ ગણાઈ રહી છે. છેલ્લા કેટલાક વર્ષોમાં ભારતીય સેનામાં મહિલાઓની ભાગીદારી વધી રહી છે અને સરકાર દ્વારા પણ મહિલાઓને વધુ તક આપવામાં આવી રહી છે. અભિલાષાની સિદ્ધિ એ સંદેશ આપે છે કે ભારતીય મહિલાઓ હવે દરેક ક્ષેત્રમાં વૈશ્વિક સ્તરે પોતાની પ્રતિભા સાબિત કરી રહી છે.
