સ્કોટલેન્ડમાં બ્રિટિશ વડા પ્રધાન સાથેની મુલાકાતમાં યુએસ પ્રમુખ ડોનાલ્ડ ટ્રમ્પે રશિયાને અંતિમ ચેતવણી આપી હતી. તેમણે કહ્યું હતું કે તેણે બે અઠવાડિયાથી ઓછા સમયમાં યુક્રેન પરના હુમલા બંધ કરવા જોઈએ નહીંતર નવા પ્રતિબંધો અને ટેરિફનો સામનો કરવો જોઈએ. ટ્રમ્પે આ મહિનાની શરૂઆતમાં મોસ્કોને ચેતવણી આપી હતી કે જો રશિયા 50 દિવસની અંદર શાંતિ કરાર માટે સંમત નહીં થાય તો અમેરિકા "ખૂબ જ કડક ટેરિફ" લાદશે. પરંતુ સોમવારે (28 જુલાઈ 2025) તેમણે કહ્યું હતું કે તેઓ આ સમયમર્યાદા લંબાવશે.
ટ્રમ્પે સ્કોટલેન્ડમાં પત્રકારોને જણાવ્યું હતું કે "હું આજથી લગભગ 10 કે 12 દિવસની નવી સમયમર્યાદા નક્કી કરવા જઈ રહ્યો છું. રાહ જોવાનો કોઈ અર્થ નથી. તેમણે વધુમાં કહ્યું હતું કે "અમને કોઈ પ્રગતિ દેખાતી નથી. આ દરમિયાન ટ્રમ્પે લંડનના મેયર સાદિક ખાન પર આકરા પ્રહારો કર્યા. તેમણે સાદિક ખાનને ખરાબ વ્યક્તિ ગણાવ્યા અને તેમના કામને ખરાબ ગણાવ્યું. જો કે આ દરમિયાન બ્રિટિશ વડા પ્રધાન કીર સ્ટારમર અને અન્ય લોકો તેમની સામે હાજર હતા.
ડોનાલ્ડ ટ્રમ્પ સ્કોટલેન્ડના ટર્નબેરી ગોલ્ફ રિસોર્ટમાં હાજર હતા
ડોનાલ્ડ ટ્રમ્પ 28 જુલાઈ 2025 ના રોજ સ્કોટલેન્ડના ટર્નબેરી ગોલ્ફ રિસોર્ટમાં તેમની ચાર દિવસની ખાનગી મુલાકાતે હતા. આ મુલાકાત સંપૂર્ણપણે અનૌપચારિક હતી પરંતુ એક પત્રકારના પ્રશ્ને સમગ્ર રાજકીય ચર્ચાની દિશા બદલી નાખી. જ્યારે તેમને પૂછવામાં આવ્યું કે શું તેઓ સપ્ટેમ્બરમાં લંડનની મુલાકાત લેશે ત્યારે ટ્રમ્પે કટાક્ષ કર્યો કે હા હું ચોક્કસપણે લંડનની મુલાકાત લઈશ પરંતુ હું તમારા મેયરનો ચાહક નથી. તેઓ એક ખરાબ વ્યક્તિ છે. તેમના નિવેદનથી વાતાવરણ તરત જ તંગ બની ગયું. ટ્રમ્પ સાથે બેઠેલા બ્રિટિશ વડા પ્રધાન કીર સ્ટાર્મરે કહ્યું કે તેઓ મારા મિત્ર છે.
સાદિક ખાનનો જવાબ: "લંડનની વિવિધતા આપણી તાકાત છે"
લંડનના મેયર સાદિક ખાને વ્યક્તિગત રીતે પ્રતિક્રિયા આપી ન હતી પરંતુ તેમના પ્રવક્તા અને સાથીદારોએ ટ્રમ્પની તીક્ષ્ણ શબ્દોમાં ટીકા કરી હતી. પ્રવક્તાએ કહ્યું કે સાદિક ખુશ છે કે ટ્રમ્પ લંડન આવવા માંગે છે. તેમને લંડનની વિવિધતા અને સમાવિષ્ટ સંસ્કૃતિમાંથી શીખવા મળશે. આ ઉપરાંત ખાનના નજીકના સાથીઓએ કહ્યું કે ટ્રમ્પ 2020 ની ચૂંટણી હારી ગયા છે જ્યારે સાદિક ખાન ત્રણ વખત મેયરની ચૂંટણી જીતી ચૂક્યા છે.
