ઈતિહાસના પાનાઓમાં 29 ડિસેમ્બરનો દિવસ ભારત અને વિશ્વ માટે અનેક યાદગાર ક્ષણો લઈને આવ્યો છે. આજના દિવસે ભારતીય મનોરંજન જગતના બે એવા દિગ્ગજોનો જન્મ થયો હતો જેમણે ઈતિહાસ રચી દીધો. જેમાંથી એક છે હિન્દી સિનેમાના પ્રથમ સુપરસ્ટાર રાજેશ ખન્ના અને બીજા છે વિશ્વ વિખ્યાત ધાર્મિક સિરિયલ ‘રામાયણ’ના નિર્માતા રામાનંદ સાગર. આ ઉપરાંત, વિજ્ઞાન જગતમાં પ્રથમ પરમાણુ બોમ્બ બનાવનાર અમેરિકન વૈજ્ઞાનિક રેગર શ્રેબરના નિધન સાથે પણ આજનો દિવસ જોડાયેલો છે.
ભારતીય સિનેમા અને ટેલિવિઝનના બે સ્તંભ
રામાનંદ સાગર: 29 ડિસેમ્બર 1917ના રોજ જન્મેલા રામાનંદ સાગરે ભારતીય ટેલિવિઝન ઈતિહાસની સૌથી સફળ સિરિયલ 'રામાયણ' બનાવી હતી. લોકડાઉન દરમિયાન પણ આ સિરિયલે ટીઆરપીના તમામ રેકોર્ડ તોડી નાખ્યા હતા. તેમણે પોતાની કલા દ્વારા ઘરે-ઘરે રામકથા પહોંચાડી હતી.
રાજેશ ખન્ના: વર્ષ 1942માં આજના દિવસે જન્મેલા રાજેશ ખન્નાને ફિલ્મ જગતમાં પ્રેમથી ‘કાકા’ કહેવામાં આવતા હતા. સતત 15 સુપરહિટ ફિલ્મો આપવાનો રેકોર્ડ આજે પણ તેમના નામે છે. તેમની અદાકારી અને અનોખા અંદાજે લાખો લોકોને ઘેલા કર્યા હતા.
29 ડિસેમ્બરની મહત્વપૂર્ણ ઐતિહાસિક ઘટનાઓ
૨૦૧૨: પાકિસ્તાનના પેશાવર પાસે આતંકવાદી હુમલામાં 21 જવાનો શહીદ થયા. ૨૦૦૪: ઈન્ડોનેશિયામાં ભીષણ સુનામીના કારણે મૃતાંક 60,000ને પાર પહોંચ્યો. ૧૯૯૮: દુનિયાનો પ્રથમ પરમાણુ બોમ્બ બનાવનાર અમેરિકન વિજ્ઞાની રેગર શ્રેબરનું નિધન થયું. ૧૯૮૪: ભારતીય રાષ્ટ્રીય કોંગ્રેસે સ્વતંત્ર ભારતના ઈતિહાસમાં સૌથી મોટી બહુમતી સાથે સંસદીય ચૂંટણીમાં જીત મેળવી. ૧૯૮૩: દિગ્ગજ ક્રિકેટર સુનીલ ગાવસ્કરે વેસ્ટ ઈન્ડિઝ સામે ટેસ્ટ ક્રિકેટમાં વ્યક્તિગત સર્વોચ્ચ 236 રન બનાવ્યા. ૧૯૭૭: મુંબઈમાં વિશ્વનું સૌથી મોટું ઓપન એર થિયેટર 'ડ્રાઈવ-ઈન' ખુલ્લું મૂકવામાં આવ્યું. ૧૯૭૨: કોલકાતામાં મેટ્રો રેલના નિર્માણ કાર્યનો પ્રારંભ થયો. ૧૫૩૦: મુઘલ બાદશાહ બાબરના અવસાન બાદ તેનો પુત્ર હુમાયુ શાસન ગાદી પર બેઠો.
વિશ્વ અને ભારતની રાજકીય પલટવાર
આજના દિવસે ૧૯૧૧માં ચીનમાં રાજશાહીનો અંત આવ્યો અને સન યાત સેનને પ્રજાસત્તાક ચીનના પ્રથમ રાષ્ટ્રપતિ જાહેર કરવામાં આવ્યા. આ સાથે જ મંગોલિયા પણ કિંગ વંશના શાસનમાંથી આઝાદ થયું હતું. અમેરિકાના ઈતિહાસમાં પણ આજનો દિવસ મહત્વનો છે કારણ કે ૧૮૪૫માં ટેક્સાસ અમેરિકાનું 28મું રાજ્ય બન્યું હતું.
