લો બોલો! બોમ્બ અને મિસાઈલનો તો ડર જ નથી : ઈરાનનું અસલી યુદ્ધ પાણીને લઈને... 12 કલાક ઠપ રહેશે સપ્લાઈ

ઈરાનને અમેરિકી રાષ્ટ્રપતિ ડોનાલ્ડ ટ્રમ્પ તરફથી ખુલ્લી ધમકી મળી છે કે જો તે પરમાણુ કરારને લઈને કોઈ છૂટ નહીં આપે તો તેણે બોમ્બમારોનો સામનો કરવો પડશે. પરંતુ ઈરાન માટે અત્યારે સૌથી મોટો પડકાર બાહ્ય નહીં પણ આંતરિક છે. અને તે છે પાણીની તંગી. સ્થિતિ એટલી ગંભીર બની ગઈ છે કે રાજધાની તેહરાનમાં પાણી પુરવઠા પર કડક નિયંત્રણ લાદવામાં આવી રહ્યું છે. લોકોને ચેતવણી આપવામાં આવી છે કે જો કોઈ જરૂરિયાત કરતાં વધુ પાણીનો વપરાશ કરશે તો તેનો પુરવઠો 12 કલાક માટે બંધ કરી દેવામાં આવશે. આ નિર્ણય ઈરાનના ઈસ્લામિક રિવોલ્યુશનરી ગાર્ડ્સ (IRGC)ની સમાચાર એજન્સી તસનીમ દ્વારા શેર કરવામાં આવ્યો છે.

છેલ્લા પાંચ વર્ષથી દુષ્કાળની અસર, પાણીનું સ્તર ઘટી ગયું છે
જોકે, આ બધું અચાનક નથી બન્યું. તેહરાન છેલ્લા પાંચ વર્ષથી દુષ્કાળની ઝપેટમાં છે. આ સમયગાળા દરમિયાન વરસાદમાં ભારે ઘટાડો થયો છે. જેના કારણે રાજધાનીમાં પાણી પુરવઠો એક મોટો પડકાર બની ગયો છે. શહેરની વધતી જતી વસ્તી અને ઉનાળામાં વધતી માંગને કારણે સરકારે પહેલેથી જ કડક પાણી વ્યવસ્થાપન નીતિઓ પર કામ કરવું પડી રહ્યું છે. અધિકારીઓનું કહેવું છે કે જળાશયોમાં પાણીનો ભંડાર ખતરનાક રીતે ઓછો થઈ ગયો છે, જેના કારણે આગામી મહિનાઓમાં સ્થિતિ વધુ ગંભીર બની શકે છે.

10 ગણું વધુ પાણી વાપરવામાં આવી રહ્યું છે
સરકારની નવી નીતિ ખાસ કરીને એવા ગ્રાહકોને લાગુ પડશે જેઓ જરૂરિયાત કરતાં વધુ પાણીનો ઉપયોગ કરી રહ્યાં છે. આંકડાઓ અનુસાર, કુલ વસ્તીના માત્ર 5% લોકો સરેરાશ ઘરની સરખામણીએ 10 ગણું વધુ પાણી ખર્ચ કરે છે. આમાંના મોટાભાગના લોકો રાજધાનીના સમૃદ્ધ વિસ્તારોમાં રહે છે. અગાઉ પણ આવા ગ્રાહકો પર 2 થી 4 કલાકનો પાણી કાપ લાદવામાં આવતો હતો. પરંતુ હવે આ સમયગાળો વધારીને 12 કલાક કરવામાં આવ્યો છે.

જળ સંકટ અંગે પ્રદર્શન
માત્ર તેહરાનમાં જ નહીં, ઈરાનના અન્ય ભાગોમાં પણ જળસંકટ ઝડપથી વધી રહ્યું છે. હાલમાં જ પાણીની તંગીને લઈને ઈસ્ફહાન પ્રાંતમાં ખેડૂતોએ વિરોધ પ્રદર્શન કર્યું હતું. વિરોધીઓએ મુખ્ય પાણીના પમ્પિંગ સ્ટેશનને આગ લગાડી, યઝદ પ્રાંતમાં પાણીનો પુરવઠો ખોરવ્યો. આ ઘટનાનો વીડિયો સોશિયલ મીડિયા પર વાયરલ થયો હતો, જેમાં શનિવારે સવારે સ્ટેશનમાંથી ધુમાડો નીકળતો દેખાઈ રહ્યો હતો.