Gujarat Weather Update : ગુજરાતમાં ઠંડીનું જોર વધ્યું છે અને અનેક શહેરોમાં લઘુત્તમ તાપમાન ગગડતાં ગુલાબી ઠંડીનો ચમકારો વધ્યો છે. રાજ્યમાં અમરેલી અને વડોદરામાં 16.8 ડિગ્રી સેલ્સિયસ તાપમાન સાથે સૌથી ઠંડા શહેર તરીકે નોંધાયા છે. ખાસ વાત એ છે કે આ વખતે નલિયા પણ આ શહેરોથી પાછળ રહી ગયું છે. નલિયામાં 24 કલાકમાં ગરમીનો પારો 2.6 ડિગ્રી ઊંચકાતાં, લઘુત્તમ તાપમાન 17.6 ડિગ્રી સેલ્સિયસ સુધી પહોંચી ગયેલું જોવા મળ્યું છે.
મહાનગરોમાં પણ તાપમાનમાં નોંધપાત્ર ઘટાડો
રાજ્યના કેટલાંક શહેરોમાં છેલ્લા 24 કલાક દરમિયાન લઘુત્તમ તાપમાનમાં અંદાજે 2 ડિગ્રી જેટલો વધારો નોંધાયો છે. બીજી તરફ મહાનગરોમાં પણ તાપમાનમાં નોંધપાત્ર ઘટાડો જોવા મળ્યો છે, જેના કારણે સવાર-સાંજમાં ઠંડીનો અનુભવ વધુ તીવ્ર બન્યો છે.
આગામી 7 દિવસ સુધી વાતાવરણ સૂકું રહેશે
હવામાન વિભાગની આગાહી મુજબ આગામી 7 દિવસ સુધી વાતાવરણ સૂકું રહેશે. આગામી 24 કલાક બાદ તાપમાનમાં 2 થી 3 ડિગ્રીનો ઘટાડો થઈ શકે છે, જેના કારણે શિયાળાનો પ્રભાવ વધુ વધવાની શક્યતા છે. રાજ્યભરમાં વધતી ઠંડીથી સામાન્ય જનજીવન પર પણ અસર જોવા મળી રહી છે.
