જેટલી લોન લીધી છે તેના કરતાં વધુ તો બેન્કે વસુલ્યા : ભાગેડું વિજય માલ્યાએ કર્યો હચમચાવનારો દાવો

ભાગેડુ દારૂના વેપારી વિજય માલ્યાએ દાવો કર્યો છે. વિજય માલ્યાએ દાવો કરતા કહ્યું છે કે તેની પાસે ભારતીય બેંકોમાં 14,131.6 કરોડ રૂપિયાની સંપત્તિ છે. જે જાહેર ક્ષેત્રની બેંકોની બાકી લોન કરતાં બમણી છે. નાણા મંત્રાલયના વાર્ષિક અહેવાલ 2024-25માં વિલફુલ ડિફોલ્ટર્સ સામે એન્ફોર્સમેન્ટ ડિરેક્ટોરેટની વસૂલાતની વિગતોનો કથિત સંદર્ભ આપતા માલ્યાએ જણાવ્યું હતું કે ડેટ રિકવરી ટ્રિબ્યુનલના રૂ. 6,203 કરોડના એવોર્ડ સામે બેન્કોએ પહેલેથી જ રૂ. 14,131.8 કરોડની વસૂલાત કરી છે.

માલ્યાએ X પર પોસ્ટ કર્યું
માલ્યાએ સોશિયલ મીડિયા સાઇટ પર લખ્યું છે કે આનો પુરાવો મારી યુકે (યુનાઇટેડ કિંગડમ) નાદારી રદ કરવાની અરજીમાં છે. મને આશ્ચર્ય છે કે યુકેની કોર્ટમાં બેંકો શું કહેશે.

માલ્યા અને અન્ય 10 ભાગેડુ આર્થિક અપરાધીઓની વિગતો શેર કરતા અહેવાલમાં જણાવાયું છે કે 36 વ્યક્તિઓના સંબંધમાં કુલ 44 પ્રત્યાર્પણ વિનંતીઓ વિવિધ દેશોને મોકલવામાં આવી છે. મંત્રાલયના વાર્ષિક અહેવાલ મુજબ, માલ્યાના કેસમાં જોડાયેલ 14,131.6 કરોડ રૂપિયાની સંપત્તિ જાહેર ક્ષેત્રની બેંકોને સોંપવામાં આવી છે. અહેવાલમાં જણાવાયું છે કે એન્ફોર્સમેન્ટ ડિરેક્ટોરેટ (ED) ના પ્રયાસોના પરિણામે વિવિધ ભાગેડુ આર્થિક અપરાધીઓ અને અન્ય આરોપીઓના પ્રત્યાર્પણમાં વિદેશની સક્ષમ અદાલત સમક્ષ સફળ રજૂઆત થઈ છે. તેમાં જણાવ્યું હતું કે, આ સંદર્ભમાં એ ઉલ્લેખ કરવો યોગ્ય છે કે યુકેની અદાલતે અન્ય કાયદા અમલીકરણ એજન્સીઓ અને ભારતીય દૂતાવાસના સંકલનમાં એન્ફોર્સમેન્ટ ડિરેક્ટોરેટ દ્વારા અસરકારક રજૂઆત પછી કેટલાક મોટા આરોપીઓને ભારતમાં પ્રત્યાર્પણ કરવાની મંજૂરી આપી છે.

કોર્ટે 2017માં SBIને આ આદેશ આપ્યો હતો
ડેટ રિકવરી ટ્રિબ્યુનલની બેંગલુરુ બેન્ચે 2017માં સ્ટેટ બેંક ઓફ ઈન્ડિયા (SBI)ના નેતૃત્વ હેઠળના બેંકોના કન્સોર્ટિયમને કિંગફિશર એરલાઈન્સ કેસમાં ફસાયેલા માલ્યા અને તેની કંપનીઓ પાસેથી 11.5 ટકાના વાર્ષિક વ્યાજ દરે 6,203 કરોડ રૂપિયા વસૂલવાની પ્રક્રિયા શરૂ કરવાનો આદેશ આપ્યો હતો.

માલ્યા માર્ચ 2016 માં બ્રિટન ભાગી ગયો હતો. તે અગાઉની કિંગફિશર એરલાઇન્સ (KFA) ને કેટલીક બેંકો દ્વારા આપવામાં આવેલી રૂ. 9,000 કરોડની લોનમાં ડિફોલ્ટ કરવા બદલ ભારતમાં વોન્ટેડ છે. ભારત બ્રિટન પાસે માલ્યાના પ્રત્યાર્પણની માંગ કરી રહ્યું છે. ઉદ્યોગપતિના જણાવ્યા મુજબ, તેણે અગાઉ જાહેર રકમના 100 ટકા ચૂકવવાની ઓફર કરી હતી.  પરંતુ બેંકો અને સરકારે તેનો પ્રસ્તાવ ફગાવી દીધો હતો.