ટાટા મોટર્સ કોમર્શિયલ વ્હીકલ્સ લિમિટેડ (TMLCV) ના શેરે બુધવારે શેરબજારમાં ધમાકેદાર એન્ટ્રી કરી. કંપનીના શેરે તેના ઈશ્યુ ભાવ ₹260.75ની સરખામણીએ 28%ના પ્રીમિયમ સાથે લિસ્ટિંગ કર્યું. આ પ્રદર્શન રોકાણકારોમાં કંપની પ્રત્યેના વિશ્વાસને દર્શાવે છે.
શેરબજારમાં મજબૂત ડેબ્યુ
NSE પર TMLCV ના શેર ₹335 પર ખુલ્યા જ્યારે BSE પર તેનું લિસ્ટિંગ ₹330.25 પર થયું. બંને લિસ્ટિંગ ભાવ કંપનીના અંદાજિત ભાવ કરતાં નોંધપાત્ર રીતે વધુ રહ્યા. આથી રોકાણકારોએ શરૂઆતમાં જ મજબૂત રિટર્ન મેળવ્યા.
ટાટા મોટર્સના શેરે દિવસ દરમિયાન તેજી બતાવી
BSE પર TMLCV નો શેર એક સમયે ₹346.75 સુધી પહોંચી ગયો હતો. ત્યારબાદ થોડું પ્રોફિટ બુકિંગ જોવા મળ્યું અને સવારે 10:15 વાગ્યે શેર ₹333ના સ્તરે ટ્રેડ થઈ રહ્યો હતો. તે તેના લિસ્ટિંગ ભાવ કરતાં આશરે 0.83% વધારે રહ્યો.
ટાટા મોટર્સનો વ્યવસાય વિભાજન
આ વર્ષની શરૂઆતમાં ટાટા મોટર્સે પેસેન્જર અને કોમર્શિયલ વાહન વ્યવસાયો અલગ કરવાનો નિર્ણય કર્યો હતો. કંપનીએ 14 ઓક્ટોબરને રેકોર્ડ તારીખ તરીકે નક્કી કરી હતી, જેથી આ તારીખ સુધી ટાટા મોટર્સના શેર ધરાવતા રોકાણકારો નવા લિસ્ટેડ શેર માટે પાત્ર બની શકે. વિભાજનની યોજના સત્તાવાર રીતે 1 ઓક્ટોબરથી અમલમાં આવી.
રોકાણકારો માટે નવો અવસર
ટાટા મોટર્સનો આ પગલું કંપનીના બંને સેગમેન્ટને સ્વતંત્ર રીતે વિકાસ કરવાની તક આપશે. માર્કેટ વિશ્લેષકોના મતે, કોમર્શિયલ વ્હીકલ બિઝનેસના અલગ લિસ્ટિંગથી તેની વેલ્યુ અનલોક થશે અને રોકાણકારોને લાંબા ગાળે વધુ લાભ થશે.
