Mahisagar Nal Se Jal Scam : મહીસાગર જિલ્લામાં સામે આવેલા 123 કરોડ રૂપિયાના મસમોટા ‘નલ સે જલ’ કૌભાંડમાં સીઆઈડી ક્રાઇમ બ્રાન્ચને વધુ એક મોટી સફળતા મળી છે. કૌભાંડમાં સંડોવાયેલા કોન્ટ્રાક્ટરો પૈકી વધુ એક કોન્ટ્રાક્ટર બાબુભાઈ ખેમાભાઈ પટેલની ધરપકડ કરવામાં આવી છે. સીઆઈડી ક્રાઇમ બ્રાન્ચે આરોપી બાબુભાઈ પટેલને હાલોલ ખાતેથી ઝડપી પાડ્યા હોવાનું જાણવા મળ્યું છે. આરોપી કોન્ટ્રાક્ટર સામે 14,38,314 રૂપિયાની રિકવરી બાકી હોવાનું પણ તપાસમાં સામે આવ્યું છે.
15 કૌભાંડીઓને ઝડપી પાડવામાં આવ્યા
આ સમગ્ર મામલે 22 જૂનના રોજ હાલના વાસ્મો યુનિટ મેનેજર ગિરીશ અગોલાએ બરોડા ખાતે સીઆઈડી ક્રાઇમ બ્રાન્ચમાં ફરિયાદ નોંધાવી હતી, જેના આધારે તપાસનો ધમધમાટ શરૂ થયો હતો. આ કૌભાંડમાં અત્યારસુધીમાં સીઆઈડી ક્રાઇમ બ્રાન્ચે મુખ્ય 12 તત્કાલીન કર્મચારીઓમાંથી 4 કર્મચારીઓ તેમજ કૌભાંડમાં સામેલ 11 ઇજારેદારોની ધરપકડ કરી છે. આમ, કુલ 15 કૌભાંડીઓને ઝડપી પાડવામાં આવ્યા છે, જ્યારે વધુ આરોપીઓની શોધખોળ હજુ ચાલુ છે.
કાર્યવાહીનો ધમધમાટ
સીઆઈડી ક્રાઇમ બ્રાન્ચની કાર્યવાહીથી કૌભાંડમાં સામેલ ઘણા આરોપીઓ હચમચી ગયા છે અને કેટલાક ભૂગર્ભમાં ઊતરી ગયા હોવાનું જાણવા મળે છે. આ કેસમાં અત્યારસુધીમાં કુલ 16 આરોપીઓએ આગોતરા જામીન માટે અરજી કરી હતી, પરંતુ કોર્ટ દ્વારા તમામ 16 અરજીઓ નામંજૂર કરવામાં આવી છે, જ્યારે અન્ય આરોપીઓની જામીન અરજીની સુનાવણી હજુ ચાલુ છે. વધુમાં સીઆઈડી ક્રાઇમ બ્રાન્ચ દ્વારા કૌભાંડ દરમિયાન ફરજ પર રહેલા તત્કાલીન સરપંચો અને તલાટીઓની યાદી પણ મેળવી લેવામાં આવી છે, જેના લઈને આગામી સમયમાં વધુ કાર્યવાહી થવાની શક્યતા છે. જોકે બીજી તરફ કરોડોની રિકવરી બાકી ધરાવતા મોટા કોન્ટ્રાક્ટરો સામે કડક કાર્યવાહી થવાને બદલે નાની રકમવાળા કોન્ટ્રાક્ટરોની ધરપકડ કરવામાં આવી હોવાના કારણે સીઆઈડી ક્રાઇમ બ્રાન્ચની કામગીરી પર પણ અનેક સવાલો ઊભા થયા છે.
