T20 World Cup : T20 વર્લ્ડ કપ 2026 માં આજે દિલ્હીના અરુણ જેટલી સ્ટેડિયમમાં ભારત અને નામિબિયા વચ્ચે મેચ થવાની છે. પરંતુ મેચના થોડા કલાકો પહેલા જ મેદાનની બહાર એક મોટો વિવાદ છેડાઈ ગયો છે. નામિબિયાની ટીમે પ્રેક્ટિસના સમયને લઈને ગંભીર સવાલો ઉઠાવ્યા છે. આ વિવાદ મેચના પરિણામ પર કેટલી અસર કરશે, તે જોવું રસપ્રદ રહેશે.
વિવાદનું મુખ્ય કારણ
ભારત અને નામિબિયા વચ્ચેની આ મેચ 'નાઈટ' માં રમાવાની છે. નિયમ મુજબ, ટીમોને રાત્રિના વાતાવરણ અને ફ્લડલાઇટ્સથી ટેવાવા માટે નાઇટ પ્રેક્ટિસની જરૂર હોય છે. નામિબિયાનો આરોપ છે કે તેમને રાત્રે પ્રેક્ટિસ કરવાની તક આપવામાં આવી નથી અને તેમને બપોરના સમયે ટ્રેનિંગ કરવા માટે મજબૂર કરવામાં આવ્યા હતા.
ભારત અને કેનેડાને મળ્યો મોકો
આ વિવાદ ત્યારે વધુ વકર્યો જ્યારે નામિબિયાની ટીમ બપોરે પ્રેક્ટિસ પૂરી કરીને પાછી ફરી રહી હતી, ત્યારે ભારતીય ટીમ અને કેનેડાની ટીમ ફ્લડલાઇટ્સમાં ટ્રેનિંગ કરવા માટે મેદાનમાં ઉતરી હતી. આશ્ચર્યની વાત એ છે કે, કેનેડાની આગામી મેચ શુક્રવારે બપોરે છે, છતાં તેમને નાઇટ પ્રેક્ટિસ મળી, જ્યારે નામિબિયાની મેચ રાત્રે હોવા છતાં તેમને વંચિત રાખવામાં આવ્યા.
નામિબિયાના કેપ્ટનનો આક્રોશ
નામિબિયાના કેપ્ટન જેરાર્ડ ઇરાસ્મસે પોતાની પીડા વ્યક્ત કરતા કહ્યું કે, "અમારા દેશમાં ફ્લડલાઇટ્સ વાળું ઇન્ફ્રાસ્ટ્રક્ચર નથી. અમુક ખેલાડીઓ સિવાય કોઈને રાત્રે રમવાની આદત નથી. અમને ભારત જેવી મજબૂત ટીમ સામે રમતા પહેલા રાત્રે પ્રેક્ટિસ કરવાનો સમય ન મળ્યો તે આશ્ચર્યજનક છે. હવે અમે સીધા મેદાન પર જઈને લડીશું."
ICC એ શું આપી સ્પષ્ટતા?
આ આક્ષેપો સામે ઇન્ટરનેશનલ ક્રિકેટ કાઉન્સિલ (ICC) એ પણ પોતાનો પક્ષ રાખ્યો છે. ICC ના પ્રવક્તાએ જણાવ્યું કે, તમામ ટીમોને પ્રેક્ટિસનું શિડ્યૂલ 27 જાન્યુઆરીએ જ આપી દેવામાં આવ્યું હતું. નામિબિયાએ 10 ફેબ્રુઆરીની રાત્રે સમય બદલવાની વિનંતી કરી હતી, જે ઘણી મોડી હતી. આટલા ટૂંકા ગાળામાં શિડ્યૂલમાં ફેરફાર કરવો શક્ય ન હતો.
કોચની યોજનાઓ પર પાણી ફરી વળ્યું
નામિબિયાના કોચ ક્રેગ વિલિયમ્સને પૂરો ભરોસો હતો કે ભારત સામેની મહત્વની મેચ પહેલા તેમને ફ્લડલાઇટ્સમાં પ્રેક્ટિસ મળશે. તેમણે અગાઉ કહ્યું હતું કે, તેઓ નાઇટ સેશનનો પૂરો ફાયદો ઉઠાવવા માંગે છે. પરંતુ ICC ની પરવાનગી ન મળતા તેમની વ્યૂહરચના ખોરવાઈ ગઈ છે.
નામિબિયા માટે મુશ્કેલ પડકાર
નામિબિયા તેની પ્રથમ મેચ નેધરલેન્ડ્સ સામે હારી ચૂક્યું છે. હવે વિશ્વની નંબર-1 T20 ટીમ ભારત સામે જીત મેળવવી તેમના માટે પહાડ જેવું લક્ષ્ય રહેશે. દિલ્હીના સ્ટેડિયમમાં ઝાકળ (Dew) અને ભારતીય બોલરોનો સામનો કરવો, તે પણ રાત્રે રમવાની પ્રેક્ટિસ વગર, નામિબિયાના બેટ્સમેનો માટે અગ્નિપરીક્ષા સમાન હશે.
