FIFA World Cup 2026 : FIFA વર્લ્ડ કપ 2026માં એક એવો અદ્ભુત ચમત્કાર જોવા મળ્યો છે જેણે સમગ્ર વિશ્વના ફૂટબોલ ચાહકોને આશ્ચર્યચકિત કરી દીધા છે. આફ્રિકા ખંડના પશ્ચિમ કિનારે આવેલા એક નાનકડા દેશ કેપ વર્ડે ફૂટબોલના સૌથી મોટા મંચ પર એક નવો સુવર્ણ ઇતિહાસ લખી દીધો છે. માત્ર 5.5 લાખની નજીવી વસ્તી ધરાવતો આ દેશ વર્લ્ડ કપના ઇતિહાસમાં નોકઆઉટ સ્ટેજ એટલે કે રાઉન્ડ ઓફ 32માં પહોંચનારો વિશ્વનો સૌથી નાની વસ્તી ધરાવતો દેશ બની ગયો છે. સાઉદી અરેબિયા સામે રમાયેલી રોમાંચક મેચમાં 0-0થી ડ્રો રમીને કેપ વર્ડેએ આ ઐતિહાસિક સિદ્ધિ પોતાના નામે કરી છે અને સાબિત કર્યું છે કે રમતગમતમાં જુસ્સો વસ્તી કરતાં વધુ મહત્વનો છે.
દિગ્ગજ ટીમો સામે અજેય સફર
પોતાના ઇતિહાસમાં પહેલીવાર FIFA વર્લ્ડ કપ રમી રહેલી કેપ વર્ડેની ટીમને ટૂર્નામેન્ટની શરૂઆતમાં ખૂબ જ મુશ્કેલ ગ્રુપમાં મૂકવામાં આવી હતી. આ ગ્રુપમાં ફૂટબોલની મોટી દિગ્ગજ અને પૂર્વ ચેમ્પિયન ટીમો સામેલ હતી, પરંતુ આ નાનકડા દેશે મેદાન પર હાર માનવાનો સ્પષ્ટ ઇનકાર કરી દીધો હતો. પોતાની પ્રથમ મેચમાં કેપ વર્ડેએ 2010ની વર્લ્ડ ચેમ્પિયન સ્પેનની મજબૂત ટીમને 0-0થી બરાબરી પર રોકી દીધી હતી. ત્યારબાદ બીજા મુકાબલામાં બે વખતની વર્લ્ડ ચેમ્પિયન ઉરુગ્વે સામે 2-2થી અત્યંત રોમાંચક ડ્રો મેચ રમીને પોઇન્ટ મેળવ્યો હતો. ત્રીજી મેચમાં સાઉદી અરેબિયાને પણ તેમણે કોઈ ગોલ કરવા દીધો નહીં. આમ ત્રણેય મેચમાં અજેય રહીને કુલ 3 પોઈન્ટ સાથે ગ્રુપમાં બીજું સ્થાન પાકું કર્યું હતું, જ્યારે સ્પેનની ટીમ આ ગ્રુપમાં પ્રથમ ક્રમે રહી હતી.
આ પણ ખાસ વાંચો : સેંથામાં સિંદૂર અને કપાળે બિંદી! : શું હાર્દિકે માહિકા સાથે કરી લીઘા ગુપચુપ લગ્ન? જાણો શું છે હકીકત
40 વર્ષના ગોલકીપર વોજિન્હા બન્યા મેચના હીરો
કેપ વર્ડેની આ અવિશ્વસનીય સફર અને ઐતિહાસિક સફળતાની પાછળ સૌથી મોટો હાથ તેમના 40 વર્ષના વરિષ્ઠ ગોલકીપર વોજિન્હાનો રહ્યો છે. સમગ્ર ટૂર્નામેન્ટ દરમિયાન તેમણે ગોલપોસ્ટની સામે અભેદ દીવાલ બનીને પ્રદર્શન કર્યું છે અને દુનિયાભરના ફૂટબોલ ફેન્સનું દિલ જીતી લીધું છે. સાઉદી અરેબિયા સામેની છેલ્લી અને નિર્ણાયક મેચમાં તેમણે ત્રણ શાનદાર બચાવ કરીને પોતાની ટીમને હારમાંથી ઉગારી લીધી હતી. મેચના પ્રથમ હાફના સ્ટોપેજ ટાઈમમાં તેમણે મોહમ્મદ કાનોના શાનદાર હેડરને ગોલ લાઇન પર જ રોકી દીધો હતો. ત્યારપછી બીજા હાફમાં મોહમ્મદ અબુ અલ-શમતના અત્યંત ખતરનાક શૉટને અટકાવ્યો હતો. મેચની છેલ્લી ઘડીઓમાં એટલે કે 92મી મિનિટે અબ્દુલ્લા અલ-હમદાનના ગોલ કરવાના સચોટ પ્રયાસને નાકામ કરીને તેમણે કેપ વર્ડેનું નોકઆઉટમાં સ્થાન પાકું કરી દીધું હતું.
આ પણ ખાસ વાંચો : 776 રન અને 72 છગ્ગા મારનાર 'વન્ડર બોય'ને ન મળી તક : આ ત્રણ મોટા કારણોસર વૈભવનું ડેબ્યૂ અટક્યું
આર્જેન્ટિના સામે આગામી મોટો પડકાર
રાઉન્ડ ઓફ 32માં સ્થાન મેળવ્યા પછી હવે કેપ વર્ડેનો આગામી પડકાર ફૂટબોલ જગતના સૌથી મોટા પહાડ જેવો છે. હવે આ નાનકડા દેશનો મુકાબલો વર્તમાન વર્લ્ડ ચેમ્પિયન આર્જેન્ટિના સામે થવાનો છે. આ બંને ટીમો વચ્ચેનો મહામુકાબલો 3 જુલાઈના રોજ અમેરિકાના મિયામી શહેરમાં રમાશે. કેપ વર્ડેની ફૂટબોલ ટીમ જે રીતે અજેય રહીને અને આત્મવિશ્વાસ સાથે આગળ વધી રહી છે, તે જોતા ફેન્સને આશા છે કે આ મેચમાં પણ કોઈ મોટો અપસેટ જોવા મળી શકે છે. કેપ વર્ડેની નજર હવે આર્જેન્ટિના જેવી સુપરસ્ટાર ટીમ સામે પણ શાનદાર પ્રદર્શન કરીને ટૂર્નામેન્ટના અંતિમ 16માં જગ્યા બનાવવા પર રહેશે.
