T20 World Cup 2026 : ICC મેન્સ T20 વર્લ્ડ કપ 2026 7 ફેબ્રુઆરીથી શરૂ થઈ રહ્યો છે, જેની ફાઇનલ મેચ 8 માર્ચે રમાશે. T20 વર્લ્ડ કપ પહેલા ઓસ્ટ્રેલિયાને વધુ એક ઝટકો લાગ્યો છે. અનુભવી ફાસ્ટ બોલર જોશ હેઝલવુડ ઈજાને કારણે ટુર્નામેન્ટમાંથી બહાર થઈ ગયો છે, જેનાથી ટીમની બોલિંગ વધુ નબળી પડી છે.
જોશ હેઝલવુડની ઈજા પર સિલેક્ટર્સે શું કહ્યું
12 નવેમ્બરના રોજ શેફિલ્ડ શીલ્ડ દરમિયાન હેમસ્ટ્રિંગની ઈજા થયા પછી હેઝલવુડ એક પણ મેચ રમ્યો નથી. તેમ છતાં, તેનો વર્લ્ડ કપ ટીમમાં સમાવેશ કરવામાં આવ્યો હતો. જ્યારે ઓસ્ટ્રેલિયન ટીમ શ્રીલંકા પહોંચી, ત્યારે તે સિડનીમાં જ રહ્યો, તેની ફિટનેસ પર કામ કરી રહ્યો હતો. જોકે, આયર્લેન્ડ સામેની શરૂઆતની મેચના માત્ર પાંચ દિવસ પહેલા, રાષ્ટ્રીય પસંદગીકાર ટોની ડોડેમાઇડે સ્પષ્ટ કર્યું હતું કે, હેઝલવુડનું કમબેક હજુ દૂર છે અને તેની ફિટનેસ પ્રક્રિયામાં ઉતાવળ કરવી જોખમી રહેશે. તેમણે કહ્યું, "અમને આશા હતી કે, જોશ હેઝલવુડ સુપર 8 તબક્કા માટે ફિટ થઈ જશે, પરંતુ હવે એવા સંકેતો મળી રહ્યા છે કે, તેને વધુ સમયની જરૂર પડશે. અમે તાત્કાલિક રિપ્લેસમેન્ટની જાહેરાત કરીશું નહીં અને જરૂર પડ્યે પછીથી નિર્ણય લઈશું." હેઝલવુડના બહાર નીકળ્યા પહેલા જ, કેપ્ટન મિશેલ માર્શની ટીમને પેટ કમિન્સના ઘાયલ થવાથી મોટો ઝટકો લાગ્યો હતો. મિશેલ સ્ટાર્ક ગયા વર્ષે T20I મેચોમાંથી રિટાયરમેન્ટ લઈ લીધું હતું. 2011 પછી આ પહેલી વાર બનશે જ્યારે ઓસ્ટ્રેલિયાના "બિગ થ્રી" ફાસ્ટ બોલરોમાંથી કોઈ પણ વર્લ્ડ કપમાં રમશે નહીં.
આ 2 ફાસ્ટ બોલરો જ સંપૂર્ણપણે ફિટ છે
હાલમાં, ટીમ પાસે ઝેવિયર બાર્ટલેટ અને બેન દ્વારશુઇસમાં બે સંપૂર્ણપણે ફિટ મુખ્ય ફાસ્ટ બોલરો છે. ટ્રાવેલિંગ રિઝર્વ સીન એબોટને પછીથી ટીમમાં ઉમેરવામાં આવી શકે છે. નાથન એલિસ પણ ઈજામાંથી પાછો આવી રહ્યો છે, પરંતુ 11 ફેબ્રુઆરીએ ઓસ્ટ્રેલિયાની પ્રથમ મેચમાં તેનું રમવું અનિશ્ચિત છે. ક્રિકેટ ઓસ્ટ્રેલિયાના જણાવ્યા અનુસાર, ટીમ ડેવિડ અને નાથન એલિસ ગ્રુપ સ્ટેજ માટે ઉપલબ્ધ રહે તેવી અપેક્ષા છે, જ્યારે સ્પિનર એડમ ઝામ્પાને આયર્લેન્ડ સામેની મેચ માટે ફિટ જાહેર કરવામાં આવશે. શ્રીલંકાની પરિસ્થિતિને જોતાં, ઓસ્ટ્રેલિયા શરૂઆતની મેચોમાં તેમના સ્પિનરો પર વધુ આધાર રાખી શકે છે.
સ્પિનર અને સીમ બોલિંગ ઓલરાઉન્ડરનું કોમ્બિનેશન
ટીમ પાસે એડમ ઝામ્પા, મેથ્યુ કુહનેમેન અને કૂપર કોનોલી જેવા ઉત્તમ સ્પિન વિકલ્પો છે. માર્કસ સ્ટોઈનિસ અને કેમેરોન ગ્રીન જેવા સીમ-બોલિંગ ઓલરાઉન્ડર કોમ્બિનેશન પૂરું પાડશે. કેપ્ટન મિશેલ માર્શે જણાવ્યું હતું કે ટીમ પાસે પૂરતી ઊંડાઈ છે અને તે પરિસ્થિતિઓમાં અનુકૂલન સાધવા માટે તૈયાર છે. વર્લ્ડ કપ પહેલા, ઓસ્ટ્રેલિયાને પાકિસ્તાન સામે 0-3 થી સિરીઝમાં હારનો સામનો કરવો પડ્યો હતો. નેધરલેન્ડ્સ સામેની પ્રેક્ટિસ મેચ વરસાદને કારણે એક પણ બોલ ફેંક્યા વગર રદ કરવામાં આવી હતી.
T20 વર્લ્ડ કપ માટે ઓસ્ટ્રેલિયાની ટીમ
મિશેલ માર્શ (કેપ્ટન), ઝેવિયર બાર્ટલેટ, કૂપર કોનોલી, ટિમ ડેવિડ, બેન દ્વારશુઇસ, કેમેરોન ગ્રીન, નાથન એલિસ, ટ્રેવિસ હેડ, જોશ ઇંગ્લિસ, મેથ્યુ કુહનેમેન, ગ્લેન મેક્સવેલ, મેથ્યુ રેનશો, માર્કસ સ્ટોઇનિસ, એડમ ઝામ્પા.
રિઝર્વ : સીન એબોટ.
