સુરત શહેરને નશામુક્ત બનાવવા માટે પોલીસ દ્વારા ચલાવવામાં આવતું “નો ડ્રગ્સ ઇન સુરત સિટી” અભિયાન હવે વધુ આક્રમક બન્યું છે. વર્ષ 2025 અને 2026 દરમિયાન શહેર પોલીસે નાર્કોટિક્સ સંબંધિત કુલ 327 ગુનાઓ નોંધ્યા છે. આ કેસોમાં વિવિધ પ્રકારના માદક પદાર્થો સાથે સંકળાયેલા આરોપીઓ સામે કાર્યવાહી કરવામાં આવી છે.
પોલીસ દ્વારા હાથ ધરાયેલી આ કાર્યવાહી દરમિયાન અંદાજે 14 કરોડ રૂપિયાથી વધુ કિંમતનો મુદ્દામાલ કબ્જે કરવામાં આવ્યો હોવાનું સામે આવ્યું છે. શહેરમાં ડ્રગ્સના નેટવર્કને તોડવા માટે સતત રેડ, તપાસ અને ગુપ્ત ઓપરેશનો ચલાવવામાં આવી રહ્યા છે. સુરત પોલીસનું કહેવું છે કે શહેરમાં યુવાધનને નશાની લતથી બચાવવા માટે આ અભિયાન લાંબા ગાળાની વ્યૂહરચનાનો ભાગ છે.
450 આરોપીઓ ઝડપાયા, SOGની વિશેષ નજર
આ સમગ્ર અભિયાન દરમિયાન પોલીસે કુલ 450 આરોપીઓને ઝડપી જેલના સળિયા પાછળ ધકેલ્યા છે. તેમાં ડ્રગ્સ સપ્લાયરો, પેડલરો તેમજ નશીલા પદાર્થોની હેરફેરમાં સંડોવાયેલા લોકોનો સમાવેશ થાય છે. Surat City Police અને શહેરની સ્પેશિયલ ઓપરેશન ગ્રુપ (SOG) દ્વારા ખાસ કાર્યવાહી હાથ ધરવામાં આવી રહી છે. પોલીસ સૂત્રોના જણાવ્યા મુજબ શહેરના વિવિધ વિસ્તારોમાં નાર્કોટિક્સ નેટવર્ક પર સતત નજર રાખવામાં આવી રહી છે. ખાસ કરીને યુવાઓને ટાર્ગેટ કરતી ગેંગ્સ અને સપ્લાય ચેઇનને તોડવા માટે ટેકનિકલ સર્વેલન્સ અને ગુપ્ત માહિતીના આધારે કાર્યવાહી કરવામાં આવી રહી છે. તાજેતરના સમયમાં ગુજરાતના અનેક શહેરોમાં ડ્રગ્સના કેસોમાં વધારો જોવા મળતા સુરત પોલીસે પણ ઝીરો ટોલરન્સ નીતિ અપનાવી હોવાનું કહેવાઈ રહ્યું છે.
આ પણ વાંચો: દેવભૂમિ દ્વારકામાં સુરક્ષા કડક : હથિયારબંધીથી લઈને ડ્રોન પ્રતિબંધ સુધી અનેક જાહેરનામા અમલમાં
જામીન પર છૂટેલા આરોપીઓને પોલીસ પરેડ ગ્રાઉન્ડ ખાતે બોલાવાયા
નાર્કોટિક્સ કેસોમાં અગાઉ ઝડપાઈ અને હાલ જામીન પર મુક્ત થયેલા અંદાજે 140થી વધુ આરોપીઓને પોલીસ દ્વારા ખાસ મોનિટરિંગ હેઠળ લેવામાં આવ્યા છે. આ તમામ આરોપીઓને સુરત પોલીસ પરેડ ગ્રાઉન્ડ ખાતે હાજર રહેવા માટે બોલાવવામાં આવ્યા હતા.
અહીં પોલીસે આરોપીઓની અલગ અલગ રીતે ઇન્ટ્રોગેશન કરી તેમની વિગતવાર માહિતી સાથે ડોઝિયર્સ તૈયાર કર્યા હતા. પોલીસ અધિકારીઓએ દરેક આરોપીની ફરીથી ચકાસણી કરી તેમના હાલના સંપર્કો, હલચલ અને પ્રવૃત્તિઓ અંગે માહિતી એકત્રિત કરી હતી. પોલીસનું માનવું છે કે જામીન પર છૂટેલા ઘણા આરોપીઓ ફરી નશાના ધંધામાં જોડાઈ જતા હોવાના કિસ્સાઓ સામે આવતા આવા પ્રિવેન્ટિવ પગલાં જરૂરી બની રહ્યા છે.
આ પણ વાંચો: જૂનાગઢને ટ્રાફિક જામથી મળશે મોટી રાહત : ગ્રોફેડ ખાતે નવા રેલવે સ્ટેશનને મળી મંજૂરી
ફરી નશાના ધંધામાં જોડાશે તો કડક કાર્યવાહી
પોલીસ અધિકારીઓએ આરોપીઓને સ્પષ્ટ ચેતવણી આપી હતી કે ભવિષ્યમાં ફરી ડ્રગ્સના વેપાર અથવા નશીલા પદાર્થોની હેરફેરમાં સંડોવાયેલા જોવા મળશે તો તેમની સામે વધુ કડક કાનૂની કાર્યવાહી હાથ ધરવામાં આવશે.
સાથે સાથે પોલીસ દ્વારા સમાજમાં જાગૃતિ ફેલાવવા માટે પણ અભિયાન ચલાવવામાં આવી રહ્યું છે. શાળાઓ, કોલેજો અને રહેણાંક વિસ્તારોમાં નશાના નુકસાન અંગે જાગૃતિ કાર્યક્રમો યોજાઈ રહ્યા છે. પોલીસનું કહેવું છે કે માત્ર કાયદેસરની કાર્યવાહી પૂરતી નથી પરંતુ સામાજિક સ્તરે પણ લોકોની ભાગીદારી જરૂરી છે.
યુવાધનને બચાવવા સુરત પોલીસનું મિશન
સુરત શહેર છેલ્લા કેટલાક વર્ષોમાં ઝડપથી વિકસતું ઔદ્યોગિક અને વ્યાપારી કેન્દ્ર બન્યું છે. મોટી સંખ્યામાં યુવાનો અને કામદારો શહેરમાં આવતા હોવાથી નશીલા પદાર્થોના નેટવર્ક સક્રિય થવાની શક્યતા પણ વધતી હોવાનું સુરક્ષા એજન્સીઓ માને છે.
આ પરિસ્થિતિમાં 'નો ડ્રગ્સ ઈન સુરત સિટી' અભિયાનને શહેર માટે મહત્વપૂર્ણ પહેલ માનવામાં આવી રહી છે. પોલીસ અધિકારીઓના જણાવ્યા મુજબ આગામી સમયમાં પણ ડ્રગ્સ સપ્લાય ચેઇન સામે વધુ કડક કાર્યવાહી ચાલુ રહેશે અને નશામુક્ત સુરત બનાવવા માટે સતત અભિયાન ચલાવવામાં આવશે.
