સુરત મહાનગરપાલિકાએ વર્ષ 2026-27 માટે રૂ. 10,593 કરોડનું કરબોજ વિનાનું ચૂંટણીલક્ષી ડ્રાફ્ટ બજેટ રજૂ કરી શહેરના વિકાસ માટે મહત્ત્વાકાંક્ષી રોડમેપ જાહેર કર્યો છે. મનપાના ઇતિહાસમાં પ્રથમવાર બજેટનું કદ ₹10,500 કરોડને પાર કરી ગયું છે. ગયા વર્ષની સરખામણીમાં બજેટમાં ₹589 કરોડનો વધારો નોંધાયો છે, જે સુરતની સતત વધતી આવશ્યકતાઓ અને ગ્લોબલ સિટી બનવાની દિશામાં લેવાયેલા પગલાં દર્શાવે છે. ચૂંટણી વર્ષને ધ્યાનમાં રાખીને પાલિકા દ્વારા કોઈ પણ નવા કર કે વેરા વધારો ન કરવાની સ્પષ્ટ જાહેરાત કરવામાં આવી છે. જૂના વેરા દરો યથાવત રાખવામાં આવતા નાગરિકોને સીધી રાહત મળી છે.
સુરત મનપાનું ચૂંટણીલક્ષી મહાબજેટ રજૂ
આ સાથે બજેટમાં અંદાજિત ₹257 કરોડનું રેવન્યુ સરપ્લસ દર્શાવવામાં આવ્યું છે, જે પાલિકાની આર્થિક સ્થીરતા અને વ્યવસ્થાપન ક્ષમતાને રેખાંકિત કરે છે.બજેટનો મુખ્ય ભાર માળખાકીય વિકાસ પર રાખવામાં આવ્યો છે. કુલ ₹5,073 કરોડ શહેરના ઈન્ફ્રાસ્ટ્રક્ચર, સુવિધા તથા ભવિષ્યના પ્રોજેક્ટ્સ માટે ફાળવવામાં આવ્યા છે. ‘બ્રિજ સિટી’ તરીકે ઓળખાતા સુરતમાં ટ્રાફિક સમસ્યા દૂર કરવા માટે ₹540 કરોડના ખર્ચે 8 નવા ફ્લાયઓવર બનાવવાની મહત્વની જાહેરાત કરવામાં આવી છે. આ ફ્લાયઓવર પૈકી સૌથી મહત્વના પ્રોજેક્ટ્સમાં SVNIT જંકશન અને કારગિલ ચોક ખાતે રૂ. 120 કરોડનો બ્રિજ, ઉધના-મગદલ્લા રોડ પર ગાંધીકુટીર જંકશન અને ઉધના ત્રણ રસ્તા જંકશન ખાતે રૂ. 40-40 કરોડના બ્રિજ, તેમજ અણુવ્રત દ્વાર પાસે રૂ. 80 કરોડની કનેક્ટિવિટી યોજના સામેલ છે. વરાછા-સરથાણા વિસ્તારમાં સહજાનંદ રોડથી રચના સર્કલ અને શ્યામધામ નજીક નવા બ્રિજ બનશે, જ્યારે પાલ-ઉમરા બ્રિજના છેડે RTO જંકશન પાસે પણ રૂ. 80 કરોડનો નવો ફ્લાય ઓવર આકાર લેશે.
કરમુક્તિ અને 8 નવા ફ્લાયઓવરનો રોડમેપ
આ ઉપરાંત રોડ ડેવલપમેન્ટ માટે રૂ. 332 કરોડની જોગવાઈ કરવામાં આવી છે. શહેરના મુખ્ય અને આંતરિક રસ્તાઓના નવીનીકરણ, સીસી રોડ, પોલિમરિક રીસરફેસિંગ અને પર્યાવરણમિત્ર ટેકનોલોજી દ્વારા માર્ગોને વધુ મજબૂત અને સુરક્ષિત બનાવવાનો ઉદ્દેશ્ય છે. શિક્ષણ ક્ષેત્રે પણ નોંધપાત્ર ફાળો આપવામાં આવ્યો છે. સુરત નગર પ્રાથમિક શિક્ષણ સમિતિનું ₹1,032 કરોડથી વધુનું બજેટ રજૂ થયું છે, જેમાં 11 નવા શાળા ભવનો, આધુનિક વિષયો જેમ કે AI-રોબોટિક્સ, વિદ્યાર્થીઓ માટે યુનિફોર્મ, શૂઝ અને સ્ટેશનરીની જોગવાઈ સામેલ છે. સ્વાસ્થ્ય અને રમતગમત માટે ‘ફિટ સુરત’ અભિયાન, પર્યાવરણ માટે અર્બન ગ્રીન પોલિસી, મહિલા સુરક્ષા માટે પિંક ટોયલેટ, ફેરિયાઓ માટે આર્થિક સહાય અને ફાયર વિભાગને આધુનિક બનાવવા ₹22.75 કરોડ જેવી જાહેરાતો બજેટને સર્વાંગી બનાવે છે. આ રીતે, કરમુક્તિ સાથે વિકાસલક્ષી યોજનાઓ ધરાવતું આ બજેટ સુરતને વધુ સુવ્યવસ્થિત, હરિયાળું અને આધુનિક શહેર બનાવવાની દિશામાં મહત્વપૂર્ણ પગલું સાબિત થવાની શક્યતા છે.
