સુરત મહાનગરપાલિકાનું વર્ષ 2026-27 માટેનું ડ્રાફ્ટ બજેટ રજૂ કરવામાં આવ્યું છે. સ્થાયી સમિતિના ચેરમેન રાજન પટેલે આ બજેટ રજૂ કર્યું હતું. આ બજેટમાં 708 કરોડ રૂપિયાનો વધારો કરવામાં આવ્યો છે અને કુલ બજેટ 11,301 કરોડ રૂપિયા મંજૂર કરવામાં આવ્યું છે. આ બજેટને વિકાસલક્ષી અને જનહિતકારી ગણાવવામાં આવી રહ્યું છે.
વિધવા માતા-બહેનોને મિલકત વેરામાં સંપૂર્ણ મુક્તિ
આ બજેટની સૌથી મહત્વની જાહેરાત તરીકે સુરતના ઇતિહાસમાં પ્રથમ વખત વિધવા માતા-બહેનોને મિલકત વેરામાં સંપૂર્ણ મુક્તિ આપવામાં આવી છે. સાથે જ BRTS બસ સેવામાં સિનિયર સિટીઝનને વિનામૂલ્યે પાસ આપવાની પણ જાહેરાત કરવામાં આવી છે. સ્થાનિક અર્થતંત્રને વેગ આપવા માટે શહેરમાં હાટ અને મેળાનું આયોજન કરવામાં આવશે, જેથી નાના વેપારીઓ અને હસ્તકલા કારોબારીઓને પ્રોત્સાહન મળે. બજેટમાં ધાર્મિક સંપ્રદાયોની પાયાની સુવિધાઓ માટે 25 કરોડ રૂપિયાની ફાળવણી કરવામાં આવી છે.
સાથે જ શહેરના તમામ ઝોનમાં નવા આધારકાર્ડ સેન્ટર શરૂ કરવાની પણ યોજના છે, જેથી નાગરિકોને સરળતાથી સુવિધા મળી રહે. રમતગમત અને સ્વાસ્થ્યને ધ્યાનમાં રાખીને મોટા વરાછા અને લીંબાયત ઝોનમાં નવા સ્વિમિંગ પુલ બનાવવાની જાહેરાત કરવામાં આવી છે, જ્યારે અઠવા ઝોનમાં ખાસ મહિલાઓ માટે સ્વિમિંગ પુલ બનાવવામાં આવશે. આ ઉપરાંત TB મુક્ત સુરતના હેતુસર નિઃશુલ્ક તપાસ તેમજ પોર્ટેબલ એક્સ-રે સુવિધા ઉપલબ્ધ કરાવવામાં આવશે.
ફૂટ ઓવર બ્રિજ, પંપિંગ સ્ટેશન અને RCC દીવાલનું પણ બજેટમાં સ્થાન
ઇન્ફ્રાસ્ટ્રક્ચર વિકાસ માટે ફૂટ ઓવર બ્રિજ, પંપિંગ સ્ટેશન અને RCC દીવાલ જેવા વિવિધ વિકાસ કાર્યોને પણ આ બજેટમાં મંજૂરી આપવામાં આવી છે. કુલ મળીને સુરત મહાનગરપાલિકાનું 2026-27નું બજેટ શહેરના સર્વાંગી વિકાસ અને જનકલ્યાણને ધ્યાનમાં રાખીને તૈયાર કરવામાં આવ્યું હોવાનું માનવામાં આવી રહ્યું છે.
