ભેસ્તાન આવાસ બ્રિજ પાસે અચાનક બેકાબૂ બની ટ્રક; ઝાડ સાથે અથડાવી ડ્રાઇવરે વાહન કાબૂમાં લીધું, પોલીસે તપાસ શરૂ કરી
સુરતના ભેસ્તાન વિસ્તારમાં એક જ દિવસમાં અકસ્માતનો બીજો બનાવ સામે આવ્યો છે. ભેસ્તાન આવાસ બ્રિજ પર પસાર થઈ રહેલી ટ્રકની અચાનક બ્રેક ફેઇલ થતાં અકસ્માતની ગંભીર સ્થિતિ સર્જાઈ હતી. જોકે, ટ્રક ચાલકે સમયસૂચકતા અને સૂઝબૂઝ દાખવી ટ્રકને રસ્તાની બાજુમાં આવેલા ઝાડ સાથે અથડાવી કાબૂમાં લેતા મોટી દુર્ઘટના અને જાનહાનિ ટળી હતી.
પ્રાથમિક માહિતી મુજબ, ટ્રક બ્રિજ પરથી પસાર થઈ રહી હતી ત્યારે તેની બ્રેક અચાનક નિષ્ફળ ગઈ હતી. જેના કારણે ટ્રક બેકાબૂ બની જતાં માર્ગ પર પસાર થઈ રહેલા અન્ય વાહનો અને લોકો માટે જોખમી પરિસ્થિતિ ઊભી થઈ હતી. પરંતુ ડ્રાઇવરે પરિસ્થિતિની ગંભીરતા સમજી ટ્રકને ઝાડ સાથે અથડાવી રોકી દીધી હતી.
સુરતમાં ગોઝારો અકસ્માત: કાળમુખા ડમ્પરે માતા-બાળકીને કચડ્યા, બંનેના મોત
ડ્રાઇવરની સમયસૂચકતાથી મોટી જાનહાનિ ટળી
સ્થાનિક લોકોના જણાવ્યા મુજબ, જો ટ્રકને સમયસર કાબૂમાં લેવામાં આવી ન હોત તો ગંભીર અકસ્માત સર્જાઈ શક્યો હોત. ડ્રાઇવરના ઝડપી નિર્ણયને કારણે સંભવિત મોટી જાનહાનિ ટળી હોવાનું માનવામાં આવી રહ્યું છે.
ઘટનાની જાણ થતાં પોલીસની ટીમ તાત્કાલિક સ્થળ પર પહોંચી હતી. પોલીસે ટ્રાફિક વ્યવસ્થા જાળવી રાખવા જરૂરી કાર્યવાહી હાથ ધરી હતી અને સમગ્ર ઘટનાની તપાસ શરૂ કરી છે. પ્રાથમિક તપાસમાં બ્રેક ફેઇલ થવું અકસ્માતનું કારણ હોવાનું માનવામાં આવી રહ્યું છે, જોકે ટેકનિકલ તપાસ બાદ જ ચોક્કસ કારણ સ્પષ્ટ થશે.
સુરતમાં BRTS કોરિડોરમાં ઘુસી ગઇ 108 એમ્બ્યુલન્સ: દર્દીની હાલત ગંભીર; પરિવારનો ડ્રાઇવર સામે ગંભીર આક્ષેપ
અકસ્માતને લઈને તપાસ શરૂ
એક જ દિવસમાં ભેસ્તાન વિસ્તારમાં અકસ્માતનો આ બીજો બનાવ સામે આવતા સ્થાનિકોમાં ચિંતા જોવા મળી રહી છે. પોલીસે ટ્રકની યાંત્રિક સ્થિતિ, બ્રેક સિસ્ટમ અને અન્ય તમામ પાસાઓની તપાસ શરૂ કરી છે. અકસ્માતમાં કોઈ જાનહાનિ થઈ હોવાની માહિતી હાલ સામે આવી નથી.
