રમતા-રમતા રૂમમાં એકલું લોક થઇ ગયું દોઢ વર્ષનું બાળક : સુરતમાં બનેલી ઘટના માતા-પિતા માટે લાલબત્તી સમાન

સુરતના મોટા વરાછા વિસ્તારમાં એક હૃદયદ્રાવક પરંતુ રાહતભરી ઘટના સામે આવી છે. રમતાં-રમતાં દોઢ વર્ષનું માસૂમ બાળક બેડરૂમમાં અંદરથી લોક થઈ જતાં પરિવારજનોમાં ગભરાટ ફેલાઈ ગયો હતો. બાળક સતત રડી રહ્યું હોવાથી પરિવારના જીવ તાળવે ચોંટ્યા હતા. જોકે, સમયસર પહોંચી ગયેલી ફાયર બ્રિગેડની ટીમે ભારે જહેમત બાદ બાળકને સહી-સલામત બહાર કાઢતા સૌએ રાહતનો શ્વાસ લીધો હતો.

આ સમગ્ર ઘટના મોટા વરાછા વિસ્તારમાં આવેલી ભક્તિ નંદન સેક્ટર સોસાયટીમાં બની હતી. ઘટનાએ થોડા સમય માટે સમગ્ર વિસ્તારમાં ચિંતા અને અફરાતફરીનો માહોલ ઉભો કરી દીધો હતો.

રમતાં રમતાં અંદરથી લોક થઈ ગયો દરવાજો

માહિતી મુજબ ભક્તિ નંદન સેક્ટર સોસાયટીના મકાન નંબર 93માં જયેશભાઈ બુહાનો પરિવાર રહે છે. તેમનો આશરે દોઢ વર્ષનો પુત્ર વિવાન ઘરમાં રમતો હતો. રમતાં રમતાં તે અચાનક બેડરૂમમાં પહોંચી ગયો હતો.

આ દરમિયાન અજાણતા જ બેડરૂમનો દરવાજો અંદરથી લોક થઈ ગયો હતો. નાનકડું બાળક રૂમની અંદર એકલું અટવાઈ જતા ડરી ગયું હતું અને જોરજોરથી રડવાનું શરૂ કર્યું હતું.

આ પણ વાંચો: સોમનાથ ટ્રસ્ટની ભક્તોને ચેતવણી : VIP દર્શનના નામે ઓનલાઈન ફ્રોડથી સાવચેત રહેવા કરી અપીલ

બાળકના રડવાના અવાજથી પરિવાર ગભરાયો

રૂમની બહાર ઉભેલા પરિવારજનોને બાળકના સતત રડવાના અવાજ સંભળાતા ગભરાટ ફેલાઈ ગયો હતો. માતા-પિતા સહિત પરિવારના સભ્યોએ તરત જ દરવાજો ખોલવાના પ્રયાસો શરૂ કર્યા હતા.

જોકે, લોક ફસાઈ જવાથી દરવાજો ખૂલી રહ્યો નહોતો. બાળક અંદર એકલું અને ભયભીત હોવાથી પરિવાર વધુ ચિંતિત બન્યો હતો. ઘટનાની જાણ થતાં આસપાસના લોકો પણ મદદ માટે એકત્ર થયા હતા.

ફાયર વિભાગે ઝડપી કાર્યવાહી કરી

દરવાજો ન ખૂલતાં આખરે પરિવારજનોએ ફાયર બ્રિગેડનો સંપર્ક કર્યો હતો. ઘટનાની ગંભીરતા સમજીને સબ ફાયર ઓફિસર સિદ્ધાંત ગઢવી સહિત ફાયર વિભાગની ટીમ તાત્કાલિક ઘટનાસ્થળે પહોંચી ગઈ હતી.

ફાયરના જવાનોએ આધુનિક સાધનોની મદદથી દરવાજાનો લોક ખોલવાની કામગીરી શરૂ કરી હતી. ટીમે ખૂબ સાવધાનીપૂર્વક કામગીરી કરી જેથી બાળકને કોઈ પ્રકારની ઇજા ન પહોંચે.

આ પણ વાંચો: 1.12 કરોડ ચૂકવ્યા પછી ખબર પડી, જમીન કોઈ બીજાની! : અમદાવાદના સાંતેજમાં જમીન સોદામાં કરોડોનો ફ્રોડ સામે આવ્યો

ગણતરીની મિનિટોમાં સફળ રેસ્ક્યુ

ફાયર વિભાગે ભારે જહેમત બાદ ગણતરીની મિનિટોમાં દરવાજો ખોલી નાખ્યો હતો. ત્યારબાદ માસૂમ વિવાનને સહી-સલામત બહાર કાઢીને માતાના ખોળામાં સોંપવામાં આવ્યો હતો.

બાળકને સુરક્ષિત જોઈ પરિવારજનોએ રાહતનો શ્વાસ લીધો હતો. સમગ્ર ઘટનામાં બાળકને કોઈ ઈજા પહોંચી ન હોવાનું જાણવા મળ્યું છે.

ફાયર જવાનોનો પરિવારે માન્યો આભાર

સફળ રેસ્ક્યુ ઓપરેશન બાદ પરિવારજનોએ ફાયર વિભાગના જવાનોનો હૃદયપૂર્વક આભાર વ્યક્ત કર્યો હતો. સ્થાનિક લોકોએ પણ ફાયર બ્રિગેડની ઝડપી કામગીરીની પ્રશંસા કરી હતી.

નિષ્ણાતોના જણાવ્યા મુજબ નાના બાળકો ઘણીવાર રમત દરમિયાન અજાણતા રૂમ, બાથરૂમ અથવા વાહનમાં લોક થઈ જતા હોય છે. આવા સંજોગોમાં ગભરાવાને બદલે તરત જ રેસ્ક્યુ સેવાઓનો સંપર્ક કરવો સૌથી સુરક્ષિત વિકલ્પ માનવામાં આવે છે.

આ પણ વાંચો: અમેરિકામાં વધુ એક ગુજરાતીની કરપીણ હત્યા : મહેસાણાની મહિલાને ગોળી મારી મોતને ઘાટ ઉતારાઈ

માતા-પિતાને સાવચેતી રાખવાની સલાહ

આ ઘટનાને પગલે માતા-પિતાને ખાસ સાવચેતી રાખવાની અપીલ કરવામાં આવી રહી છે. ખાસ કરીને નાના બાળકો ઘરમાં રમતા હોય ત્યારે બેડરૂમ અને બાથરૂમના લોક સિસ્ટમ અંગે ધ્યાન રાખવું જરૂરી માનવામાં આવે છે.

ઘરમાં ચાઈલ્ડ-સેફ લોક સિસ્ટમ અને ઇમરજન્સી ઓપનિંગ વ્યવસ્થા રાખવાથી આવી ઘટનાઓને અટકાવી શકાય છે.