ભારતીય શેરબજારે સોમવારે ટ્રેડિંગ સત્રની શરૂઆત સકારાત્મક નોટ સાથે કરી. વૈશ્વિક સ્તરે મળેલા મિશ્ર સંકેતો વચ્ચે દેશના રોકાણકારોએ ખરીદીનો માહોલ જાળવી રાખ્યો છે.
બીએસઈ સેન્સેક્સ આજે 67.62 પોઈન્ટ અથવા 0.08 ટકાના વધારા સાથે 81,274.79 પર ખુલ્યું હતુ, જ્યારે નિફ્ટી 50 ઇન્ડેક્સ 22.30 પોઈન્ટ અથવા 0.09 ટકાના વધારા સાથે 24,916.55 પર ખુલ્યુ હતુ. સવારે 9:25 વાગ્યે, સેન્સેક્સ 81,266.64 પર અને નિફ્ટી 24,924.80 પર ટ્રેડ થઈ રહ્યા હતા.
બીએસઈ સેન્સેક્સ પર એક્સિસ બેંક, બજાજ ફાઇનાન્સ, HCL ટેક અને TCS જેવા શેરોમાં તેજી જોવા મળી હતી. જ્યારે ટાટા મોટર્સ, ટાઇટન અને ટાટા સ્ટીલના શેરોમાં થોડી નબળાઈ નોંધાઈ હતી.
શુક્રવારનો ટ્રેડિંગ દિવસ પણ રહ્યો તેજીભર્યો
શુક્રવારે ભારતીય શેરબજાર મજબૂત નોંધ સાથે બંધ થયું હતું. સેન્સેક્સ 223.86 પોઈન્ટ અથવા 0.28 ટકા વધીને 80,207.17 પર પહોંચ્યુ હતુ, જ્યારે નિફ્ટી 57.95 પોઈન્ટ અથવા 0.23 ટકા વધીને 24,894.25 પર બંધ થયુ હતુ.
ટ્રેડિંગ દરમિયાન બેંકિંગ, મેટલ અને કન્ઝ્યુમર ડ્યુરેબલ્સ સેક્ટરમાં ખરીદી જોવા મળી હતી. ટોચના લાભકર્તાઓમાં ટાટા સ્ટીલ, પાવરગ્રીડ, કોટક બેંક, એક્સિસ બેંક, એલ એન્ડ ટી, બીઈએલ, ટાઇટન, એશિયન પેઇન્ટ્સ, એનટીપીસી અને એસબીઆઈનો સમાવેશ થયો હતો.
નુકસાનકર્તા શેરોમાં ટેક મહિન્દ્રા, મારુતિ, અલ્ટ્રાટેક સિમેન્ટ, બજાજ ફિનસર્વ, સન ફાર્મા અને આઈસીઆઈસીઆઈ બેંક રહ્યા હતા.
વૈશ્વિક બજારોમાં સકારાત્મક માહોલ
વૈશ્વિક સ્તરે પણ બજારોમાં તેજી જોવા મળી રહી છે. જાપાનમાં નવા વડાપ્રધાનની જાહેરાત બાદ નિક્કી ઇન્ડેક્સ 4 ટકા સુધી વધ્યો હતો. અમેરિકન શેરબજારમાં ડાઉ જોન્સ 250 પોઈન્ટ ઉપર બંધ થયો હતો, જ્યારે એસ એન્ડ પી 500 લગભગ ફ્લેટ રહ્યો હતો.
