ભારતીય શેરબજારમાં આજે ગુરુવારે સાવચેતીભર્યું વાતાવરણ જોવા મળી રહ્યું છે. પ્રી-ઓપનિંગ સેશનમાં સેન્સેક્સ અને નિફ્ટી લગભગ સ્થિર એટલે કે ફ્લેટ સ્તરે ટ્રેડ કરતા જોવા મળ્યા હતા. વૈશ્વિક બજારોમાંથી મળી રહેલા મિશ્ર સંકેતો અને ગિફ્ટ નિફ્ટી (GIFT Nifty) માં જોવા મળેલી 25,600–25,650ની રેન્જને કારણે સ્થાનિક બજારમાં પણ તેની અસર વર્તાઈ રહી છે. જોકે, અમેરિકી અને યુરોપિયન બજારોમાં જોવા મળેલી તેજી અને ડોમેસ્ટિક ઇન્સ્ટિટ્યુશનલ ઇન્વેસ્ટર્સ (DII) દ્વારા સતત થઈ રહેલી ખરીદી બજારને નીચલા સ્તરે ટેકો આપી રહી છે.
નિષ્ણાતોના મતે, બજાર અત્યારે કન્સોલિડેશન એટલે કે સ્થિરતાના તબક્કામાંથી પસાર થઈ રહ્યું છે. નિફ્ટી 25,250 થી 25,650 ની મર્યાદિત રેન્જમાં અથડાઈ રહ્યો છે. ગઈકાલે બજારે ઉછાળા સાથે શરૂઆત કરી હતી પરંતુ ઊંચા સ્તરે પ્રોફિટ બુકિંગ આવતા ગાબડું જોવા મળ્યું હતું. આજના ટ્રેડિંગ સેશનમાં આઈટી (IT), ઓટો, ફાર્મા અને મેટલ જેવા સેક્ટરમાં હલચલ જોવા મળી શકે છે. બીજી તરફ, ભારતીય રૂપિયો પણ ડોલર સામે 8 પૈસા મજબૂત થઈને 90.87 ના સ્તરે ખુલ્યો છે, જે બજાર માટે પોઝિટિવ સંકેત છે.
પ્રી-ઓપનિંગના આંકડા: બજારની સુસ્ત ચાલ
સવારે 09:04 કલાકે બજારના આંકડા નીચે મુજબ રહ્યા હતા:
Sensex: 33.80 પોઈન્ટ (0.04%) ના મામૂલી વધારા સાથે 82,309.87 પર.
Nifty: 32.85 પોઈન્ટ (0.13%) ના ઉછાળા સાથે 25,515.35 ના સ્તરે.
આજના ટ્રેડિંગમાં કયા સ્ટોક્સ રહેશે ફોકસમાં?
આજના દિવસે રેલવે, ફાર્મા અને એન્જિનિયરિંગ સેક્ટરના કેટલાક ખાસ શેરોમાં તેજી જોવા મળી શકે છે:
રેલવે: IRFC (Railway Finance Corporation).
ફાર્મા અને હેલ્થકેર: Sanofi India, Zydus, Lupin, Sanofi Consumer Healthcare.
અન્ય: XTGlobal, KSB, Foseco India, Shaily Engineering, KFin Tech.
કોર્પોરેટ અપડેટ્સ: તેજસ નેટવર્કને મોટો કોન્ટ્રાક્ટ
ટેલિકોમ ગિયર બનાવતી કંપની તેજસ નેટવર્ક (Tejas Networks) માટે મોટા સમાચાર છે. કંપનીએ NEC કોર્પોરેશન સાથે 5G મેસિવ MIMO રેડિયોના ઉત્પાદન અને સપ્લાય માટે કરાર કર્યા છે. આ સમાચારને કારણે આજે આ સ્ટોકમાં સારી હિલચાલ જોવા મળી શકે છે.
IPO અપડેટ: ક્લીન મેક્સ IPOનું ફીકું પ્રતિસાદ
ક્લીન મેક્સ એન્વાયરો એનર્જી સોલ્યુશન્સનો IPO છેલ્લા દિવસે માત્ર 94% સબ્સ્ક્રાઇબ થયો છે. જેમાં QIB કેટેગરીમાં 2.83 ગણું સબ્સ્ક્રિપ્શન મળ્યું છે, પરંતુ રિટેલ રોકાણકારોનો ઉત્સાહ ઓછો રહ્યો હતો (માત્ર 6%).
ટેકનિકલ વ્યુ: શું છે નિષ્ણાતોની સલાહ?
ચોઈસ બ્રોકિંગના એનાલિસ્ટ આકાશ શાહના મતે, નિફ્ટી માટે 25,250 મજબૂત સપોર્ટ છે, જ્યારે 25,650 પર મોટો અવરોધ (Resistance) છે. જ્યાં સુધી નિફ્ટી આ રેન્જની બહાર નહીં નીકળે ત્યાં સુધી બજારમાં મોટી મૂવમેન્ટની શક્યતા ઓછી છે. બેંક નિફ્ટી પણ હાલ 61,000 ની આસપાસ અથડાઈ રહ્યો છે, જેમાં 61,300-61,400 ની સપાટી પાર કરવી જરૂરી છે.
