તા. 16 ફેબ્રુઆરીથી ગુજરાત વિધાનસભાનું બજેટ સત્ર શરૂ થયું છે અને આજે વિધાનસભામાં વિવિધ મહત્વપૂર્ણ મુદ્દાઓ પર ચર્ચા તથા કાર્યવાહી હાથ ધરાશે. આજના કાર્યસૂચીમાં પ્રશ્નોત્તરીથી લઈને સરકારી વિધેયકો સુધીના અનેક મહત્વના કાર્યક્રમોનો સમાવેશ થાય છે.
પ્રશ્નોત્તરી કાળ
સૌપ્રથમ પ્રશ્નોત્તરી લેવામાં આવશે, જેમાં તારાંકિત પ્રશ્નોત્તરીનો સમાવેશ થાય છે. તેમાં માનનીય મુખ્યમંત્રીશ્રી સામાન્ય વહીવટ, વહીવટી સુધારણા અને તાલીમ, આયોજન, બિનનિવાસી ગુજરાતી પ્રભાગ, મહેસૂલ અને આપત્તિ વ્યવસ્થાપન, માર્ગ અને મકાન તથા પાટનગર યોજના, નર્મદા, કલ્પસર, ખાણ અને ખનિજ, બંદરો, માહિતી અને પ્રસારણ, તમામ નીતિ વિષયક બાબતો તેમજ અન્ય કોઇ મંત્રીને ન ફાળવાયેલા વિષયો સંબંધિત પ્રશ્નોના જવાબ આપશે. ઉપરાંત જળસંપત્તિ અને પાણી પુરવઠા મંત્રી (રાજ્યકક્ષા, સ્વતંત્ર હવાલો) તેમજ મહિલા અને બાળ કલ્યાણ મંત્રી (રાજ્યકક્ષા, સ્વતંત્ર હવાલો) પણ પોતાના વિભાગોને લગતા પ્રશ્નોના જવાબ આપશે.
અહેવાલો રજૂ કરવામાં આવશે
ત્યારબાદ વિધાનસભાની સમિતિના અહેવાલની રજૂઆત કરવામાં આવશે. બિન-સરકારી સભ્યોના કામકાજ માટેની સમિતિના નવમા અહેવાલની રજૂઆત સમિતિના પ્રમુખ અથવા સભ્ય દ્વારા કરવામાં આવશે. આ સાથે જ સમિતિના પ્રમુખ અથવા સભ્ય દ્વારા પ્રસ્તાવ મુકવામાં આવશે કે “આ સભાગૃહ, બિન-સરકારી સભ્યોના કામકાજ માટેની સમિતિના નવમા અહેવાલ સાથે સંમત થાય.”
સરકારી વિધેયકો
આજના કાર્યક્રમમાં સરકારી વિધેયકો પણ મહત્વનો ભાગ ભજવશે. સન 2026નું વિધેયક ક્રમાંક-1 તરીકે “ગુજરાત દુકાન અને સંસ્થા (રોજગાર નિયમન અને સેવાની શરતો) (સુધારા) વિધેયક” મંત્રી કુંવરજી બાવળીયા દ્વારા દાખલ કરવામાં આવશે અને તેનું પહેલું, બીજું તથા ત્રીજું વાંચન કરવામાં આવશે. તેમજ સન 2026નું વિધેયક ક્રમાંક-3 તરીકે “સૌરાષ્ટ્ર ઘરખેડ, ગણોત વહીવટ પતાવટ અને ખેતીની જમીન (ગુજરાત સુધારા) વિધેયક” રાજ્યકક્ષાના મંત્રી સંજયસિંહ મહીડા દ્વારા રજૂ કરીને તેનું પણ ત્રણેય વાંચન હાથ ધરાશે. આ રીતે આજનો દિવસ વિધાનસભામાં વ્યસ્ત અને મહત્વપૂર્ણ રહેશે.
