દેશની રાજધાની દિલ્હીમાં મહિલાઓની સુરક્ષાને વધુ મજબૂત બનાવવા માટે દિલ્હી સરકારે મહત્વપૂર્ણ પગલું ભર્યું છે. સરકાર ટૂંક સમયમાં 'સેફ દિલ્હી મોબાઇલ એપ' લોન્ચ કરવાની તૈયારીમાં છે, જે મહિલાઓ માટે ઇમરજન્સી એલર્ટ સિસ્ટમ તરીકે કામ કરશે. આ એપ સીધી દિલ્હી પોલીસના કંટ્રોલ રૂમ સાથે જોડાયેલી રહેશે, જેથી કોઈપણ જોખમી પરિસ્થિતિમાં પોલીસને તરત જ જાણ થઈ શકે અને ઝડપથી મદદ પહોંચાડી શકાય.
દિલ્હીમાં મહિલાઓ સામે વધતા ગુનાઓ અને સુરક્ષાને લઈને ઉઠતા સવાલો વચ્ચે સરકારનો આ નિર્ણય અત્યંત મહત્વનો માનવામાં આવી રહ્યો છે. નવી એપમાં GPS લોકેશન શેરિંગ, લાઇવ ઓડિયો-વીડિયો સ્ટ્રીમિંગ અને વૉઇસ કમાન્ડ દ્વારા એક્ટિવેશન જેવી અત્યાધુનિક સુવિધાઓ આપવામાં આવશે, જે ઇમરજન્સી સમયે મહિલાઓ માટે મદદરૂપ બની શકે છે.
સીધી પોલીસ કંટ્રોલ રૂમ સાથે જોડાશે એપ
સરકારી સૂત્રોના જણાવ્યા અનુસાર, 'સેફ દિલ્હી' એપને દિલ્હી પોલીસના કંટ્રોલ રૂમ સાથે સીધું જ જોડવામાં આવશે. જો કોઈ મહિલા મુશ્કેલીમાં ફસાય અથવા કોઈ જોખમી પરિસ્થિતિનો સામનો કરી રહી હોય તો માત્ર એપ એક્ટિવેટ કરતાં જ તેની લાઇવ લોકેશન પોલીસ સુધી પહોંચી જશે.
એટલું જ નહીં, એપ મારફતે ઘટનાસ્થળેથી લાઇવ ઓડિયો અને વીડિયો ફીડ પણ પોલીસને મળશે. જેના આધારે પોલીસ ઘટનાની ગંભીરતા સમજીને વધુ ઝડપી અને અસરકારક કાર્યવાહી કરી શકશે. અધિકારીઓનું માનવું છે કે આ ટેક્નોલોજી પોલીસના પ્રતિસાદનો સમય ઘટાડવામાં મહત્વપૂર્ણ ભૂમિકા ભજવશે અને મહિલાઓને સમયસર સુરક્ષા ઉપલબ્ધ કરાવવામાં મદદ કરશે.
આવાજથી થશે એપ એક્ટિવેટ
આ એપની સૌથી ખાસ સુવિધા તેની વૉઇસ-ઇનેબલ્ડ એક્ટિવેશન સિસ્ટમ છે. એટલે કે જો કોઈ મહિલા એવી પરિસ્થિતિમાં હોય કે જ્યાં તે મોબાઇલ ફોન હાથમાં લઈને એપ ખોલી ન શકે, તો માત્ર પૂર્વનિર્ધારિત વૉઇસ કમાન્ડ બોલવાથી એપ સક્રિય થઈ જશે.
એપ સક્રિય થતાં જ મહિલાની લાઇવ લોકેશન, ઓડિયો અને વીડિયો ફીડ પોલીસ કંટ્રોલ રૂમમાં પહોંચવાનું શરૂ થઈ જશે. પરિણામે પોલીસને ઘટનાની વાસ્તવિક સ્થિતિની માહિતી મળશે અને બચાવ કામગીરી વધુ ઝડપથી શરૂ કરી શકાશે. આ સુવિધા ખાસ કરીને અપહરણ, પીછો કરવામાં આવતો હોય, હુમલો થતો હોય અથવા અન્ય કોઈ ગંભીર પરિસ્થિતિમાં અત્યંત ઉપયોગી સાબિત થઈ શકે છે.
મુખ્યમંત્રી સમક્ષ રજૂ થયો ટ્રાયલ વર્ઝન
દિલ્હી સરકાર દ્વારા તૈયાર કરાયેલા આ એપ્લિકેશનનું ટ્રાયલ વર્ઝન તાજેતરમાં મુખ્યમંત્રી રેખા ગુપ્તા સમક્ષ રજૂ કરવામાં આવ્યું હતું. મુખ્યમંત્રી પાસે મહિલા અને બાળ વિકાસ વિભાગનો પણ કાર્યભાર હોવાથી મહિલાઓની સુરક્ષા વધારવા માટે આ પ્રોજેક્ટને પ્રાથમિકતા આપવામાં આવી રહી છે. સરકાર હવે સમગ્ર દિલ્હીમાં આ એપ અમલમાં મૂકવાનો પ્રસ્તાવ ટૂંક સમયમાં કેબિનેટ સમક્ષ રજૂ કરે તેવી શક્યતા છે. મંજૂરી મળ્યા બાદ તબક્કાવાર રીતે સમગ્ર શહેરમાં તેનો અમલ કરવામાં આવશે.
આ પણ વાંચો: પ્રથમ વખત દેશ માટે પ્રાણ ન્યોછાવર કરનારા 6 જવાનોના નામ જાહેર : નેશનલ વોર મેમોરિયલમાં મળ્યું અમર સ્થાન
મહિલાઓ માટે કેવી રીતે બનશે ઉપયોગી?
દિલ્હી સરકારના એક અધિકારીએ જણાવ્યું હતું કે આ એપ ખાસ કરીને એવા વિસ્તારોમાં મહિલાઓ માટે વધુ ઉપયોગી બનશે જ્યાં સુરક્ષાને લઈને ચિંતા રહેતી હોય. જેવા કે,
સૂમસામ રસ્તાઓ
ઓછી લાઇટ ધરાવતા વિસ્તારો
રાત્રિના સમયે મુસાફરી
જાહેર પરિવહન દરમિયાન અસુરક્ષાની સ્થિતિ
મહિલાઓ સામે થતી હેરાનગતિ અથવા હિંસાની ઘટનાઓ
આવા સંજોગોમાં મહિલા માત્ર એપ સક્રિય કરીને તરત જ પોલીસને એલર્ટ મોકલી શકશે.
મહિલાઓ સામેના વધતા ગુનાઓ વચ્ચે મહત્વનું પગલું
દિલ્હીમાં છેલ્લા કેટલાક વર્ષોથી મહિલાઓ સામેના ગુનાઓને લઈને સતત ચર્ચા થતી રહી છે. છેડતી, હુમલા, પીછો કરવાના બનાવો અને અન્ય પ્રકારની હિંસાની ઘટનાઓને કારણે મહિલાઓની સુરક્ષા મોટો મુદ્દો બની રહી છે.
આ પરિસ્થિતિને ધ્યાનમાં રાખીને દિલ્હી સરકારે ટેક્નોલોજીના ઉપયોગ દ્વારા મહિલાઓને વધુ સુરક્ષા આપવાનો પ્રયાસ શરૂ કર્યો છે. નિષ્ણાતોનું માનવું છે કે જો એપ યોગ્ય રીતે કાર્ય કરશે અને પોલીસનો પ્રતિસાદ ઝડપી રહેશે તો મહિલાઓમાં સુરક્ષાની ભાવના વધુ મજબૂત બની શકે છે.
ટેક્નોલોજી બનશે સુરક્ષાનું નવું હથિયાર
દેશના અનેક રાજ્યોમાં મહિલાઓની સુરક્ષા માટે વિવિધ મોબાઇલ એપ્લિકેશનો પહેલાથી ઉપલબ્ધ છે, પરંતુ દિલ્હી સરકારનું 'સેફ દિલ્હી' એપ પોલીસ કંટ્રોલ રૂમ સાથે સીધા સંકલન, લાઇવ વીડિયો સ્ટ્રીમિંગ અને વૉઇસ એક્ટિવેશન જેવી સુવિધાઓને કારણે વધુ આધુનિક માનવામાં આવી રહ્યું છે. નિષ્ણાતોનું કહેવું છે કે માત્ર એપ લોન્ચ કરવી પૂરતી નથી, પરંતુ તેની અસરકારક કામગીરી, પોલીસનું ઝડપી રિસ્પોન્સ, લોકોમાં જાગૃતિ અને સતત ટેક્નિકલ સપોર્ટ પણ એટલો જ મહત્વનો રહેશે. જો આ પ્રોજેક્ટ સફળ સાબિત થશે તો ભવિષ્યમાં અન્ય રાજ્યો પણ આવી જ ટેક્નોલોજી આધારિત સુરક્ષા વ્યવસ્થા અપનાવી શકે છે.
