પુતિન સરકારે Telegram પર લાદ્યો પ્રતિબંધ : જાસૂસીના આરોપ વચ્ચે જાણો શું તમારે આ એપ વાપરવી જોઈએ?

રશિયાએ પોતાના જ દેશની અત્યંત લોકપ્રિય મેસેજિંગ એપ Telegram પર પ્રતિબંધ મૂકવાની શરૂઆત કરી દીધી છે. સરકારનો ઉદ્દેશ્ય લોકોને સરકારી પ્લેટફોર્મ તરફ વાળવાનો છે. રશિયાની નિયામક સંસ્થા રોસકોમનાડજોરે સુરક્ષાના કારણો આગળ ધરીને આ નિર્ણય લીધો છે. અહેવાલો મુજબ, Telegram દ્વારા એવા કન્ટેન્ટને હટાવવાનો ઈનકાર કરવામાં આવ્યો હતો જેને સરકાર ગુનાહિત અને આતંકવાદી પ્રવૃત્તિ ગણાવતી હતી. આ ખેંચતાણ બાદ રશિયામાં યુઝર્સને એપ સ્લો ચાલતી હોવાની અથવા સંપૂર્ણપણે બંધ થઈ ગઈ હોવાની ફરિયાદો ઉઠી છે.

સુરક્ષાના નામે સરકારનો આકરો નિર્ણય

પુતિન સરકારે Telegram પરના પ્રતિબંધ પાછળ નાગરિકોના ડેટાની સુરક્ષાનું કારણ આપ્યું છે. સરકારનો દાવો છે કે આ એપ પર લોકોનો પર્સનલ ડેટા સુરક્ષિત નથી અને તે છેતરપિંડી તેમજ આતંકવાદી ગતિવિધિઓનું કેન્દ્ર બની રહી છે. જોકે, Telegram એ આ તમામ આરોપોને પાયાવિહોણા ગણાવ્યા છે. સરકારી ન્યૂઝ એજન્સી TASS ના જણાવ્યા અનુસાર, વાંધાજનક સામગ્રી ન હટાવવા બદલ એપ પર આશરે 64 મિલિયન રૂબલનો દંડ પણ ફટકારવામાં આવ્યો છે. નોંધનીય છે કે અત્યાર સુધી રશિયન આર્મી અને ક્રેમલિનના ટોચના અધિકારીઓ પણ આ જ એપનો ઉપયોગ કરતા હતા.

પાલેવ ડુરોવનો વળતો પ્રહાર

Telegram ના સ્થાપક પાવેલ ડુરોવે રશિયન સરકારના આ પગલાની આકરી ટીકા કરી છે. ડુરોવના મતે, સરકાર લોકોને પોતાની નવી એપ Max વાપરવા માટે મજબૂર કરી રહી છે જેથી તે નાગરિકોની સરળતાથી જાસૂસી કરી શકે. રશિયામાં હવે દરેક સ્માર્ટફોનમાં Max એપ પ્રી-ઈન્સ્ટોલ હોવી ફરજિયાત કરી દેવાઈ છે. ડુરોવે આ સ્થિતિની સરખામણી ઈરાન સાથે કરી છે અને સ્પષ્ટ કર્યું છે કે દબાણ છતાં Telegram અભિવ્યક્તિની આઝાદી અને પ્રાઈવસી માટે લડત ચાલુ રાખશે.

યુદ્ધના મેદાનમાં વિરોધનો વંટોળ

રશિયામાં આ નિર્ણયનો વ્યાપક વિરોધ જોવા મળી રહ્યો છે. ખાસ કરીને યુદ્ધ ક્ષેત્રનું રિપોર્ટિંગ કરતા બ્લોગર્સનું કહેવું છે કે સરકાર આ નિર્ણય દ્વારા દુશ્મન દેશોને મદદ કરી રહી છે. બ્લોગર્સના મતે, સંદેશા વ્યવહાર ખોરવાવાને કારણે સૈનિકોને માહિતી મોકલવામાં ભારે મુશ્કેલી પડી રહી છે અને પરિસ્થિતિ એવી સર્જાઈ છે કે હવે જાણે સૈનિકોએ સંદેશા માટે 'કબૂતરો' પર નિર્ભર રહેવું પડશે.

શું તમારે Telegram વાપરવું જોઈએ?

NBT નજરિયો: રશિયામાં આ પ્રતિબંધ પાછળ ત્યાંના રાજકીય અને સુરક્ષાના કારણો જવાબદાર છે. ભારત સરકાર દ્વારા અત્યાર સુધી Telegram ને લઈને કોઈ નકારાત્મક ચેતવણી જારી કરવામાં આવી નથી. એપ દ્વારા પણ રશિયાના તમામ આરોપો નકારવામાં આવ્યા છે. આથી, જો તમે એપની પ્રાઈવસી પોલીસી અને નિયમોથી સંતુષ્ટ હોવ, તો હાલના તબક્કે તમે નિશ્ચિંત થઈને Telegram નો ઉપયોગ ચાલુ રાખી શકો છો.