મહેસાણાની અર્બન કો-ઓપરેટિવ બેંક પર રિઝર્વ બેંક ઓફ ઈન્ડિયા (RBI)એ મોટો નાણાકીય દંડ ફટકાર્યો છે. RBI દ્વારા મહેસાણા અર્બન કો-ઓપરેટિવ બેંક લિમિટેડ પર ₹25 લાખનો દંડ ફટકારવામાં આવ્યો છે. આ કાર્યવાહી બેંક દ્વારા નિયમોનું ઉલ્લંઘન થવાને કારણે કરવામાં આવી છે.
'નોન-પર્ફોર્મિંગ એસેટ્સ' (NPAs) ના વર્ગીકરણમાં નિયમોનું ઉલ્લંઘન
મળતી માહિતી મુજબ બેંક દ્વારા ‘નોન-પર્ફોર્મિંગ એસેટ્સ’ (NPAs)ના વર્ગીકરણ સંબંધિત નિયમોનું યોગ્ય પાલન કરવામાં આવ્યું નહોતું. અમુક ઋણધારકોને આપવામાં આવેલી ક્રેડિટ સુવિધાઓને બેંકે સમયસર NPA તરીકે વર્ગીકૃત કરી નહોતી, જે RBIના નિયમોનું ઉલ્લંઘન ગણાયું છે. આ મામલે RBIએ બેંકની 31 માર્ચ, 2024ની નાણાકીય સ્થિતિના સંદર્ભમાં વિશેષ તપાસ હાથ ધરી હતી. તપાસ દરમિયાન બેંકના નિયમનકારી પાલનમાં ખામીઓ જણાઈ આવી, જેના આધારે આ દંડની કાર્યવાહી કરવામાં આવી છે.
પારદર્શિતાને લઈને વધુ કડક વલણ
RBIએ આ દંડ બેંકની ગ્રાહકો સાથેની કોઈ નાણાકીય વ્યવહારમાં સીધી અસર કરતો નથી, પરંતુ નિયમનકારી પાલનમાં સુધારો લાવવાનો સંદેશ આપવા માટે આ પગલું લેવામાં આવ્યું છે. આ ઘટનાથી સ્પષ્ટ થાય છે કે RBI હવે કો-ઓપરેટિવ બેંકોના નાણાકીય નિયમો અને પારદર્શિતાને લઈને વધુ સખત વલણ અપનાવી રહ્યું છે, જેથી ગ્રાહકોના હિતો સુરક્ષિત રહે અને બેંકિંગ સિસ્ટમ પર વિશ્વાસ જળવાઈ રહે.
