Ayodhya Ram Mandir Donation Theft: અયોધ્યાના ભવ્ય રામ મંદિરમાં ભક્તો દ્વારા આપવામાં આવતા દાનને લઈને ઉભા થયેલા વિવાદે હવે ગંભીર સ્વરૂપ ધારણ કર્યું છે. દાનપેટીમાંથી મળતી રકમમાં કથિત ગેરરીતિ અને ચોરીના આરોપો વચ્ચે શ્રી રામ જન્મભૂમિ તીર્થ ક્ષેત્ર ટ્રસ્ટે સમગ્ર મામલે પારદર્શક અને નિષ્પક્ષ તપાસની માંગ ઉઠાવી છે. ટ્રસ્ટે ઉત્તર પ્રદેશના મુખ્યમંત્રી યોગી આદિત્યનાથને પત્ર લખીને વિશેષ તપાસ દળ (SIT) રચવાની વિનંતી કરી છે, જેથી સમગ્ર ઘટનાની સત્યતા બહાર આવી શકે અને લોકોમાં ફેલાયેલી અફવાઓનો અંત આવી શકે. રામ મંદિર માત્ર એક ધાર્મિક સ્થળ નથી, પરંતુ કરોડો હિન્દુઓની આસ્થા અને વિશ્વાસનું કેન્દ્ર છે. દેશ-વિદેશમાંથી આવતા લાખો શ્રદ્ધાળુઓ અહીં ભક્તિભાવથી દાન અર્પણ કરે છે. આવી સ્થિતિમાં દાનની રકમમાં ગેરરીતિના આરોપો સામે આવતા માત્ર આર્થિક નહીં પરંતુ ધાર્મિક અને સામાજિક સ્તરે પણ અનેક પ્રશ્નો ઉભા થયા છે. ટ્રસ્ટનું માનવું છે કે આ મામલે સ્પષ્ટતા થવી જરૂરી છે જેથી ભક્તોના વિશ્વાસને કોઈ આંચકો ન પહોંચે.
SIT તપાસની માંગ પાછળનું કારણ
શ્રી રામ જન્મભૂમિ તીર્થ ક્ષેત્ર ટ્રસ્ટે જણાવ્યું છે કે દાન ચોરીના આરોપોને લઈને વિવિધ પ્રકારની અફવાઓ અને અટકળો ચાલી રહી છે. આવી પરિસ્થિતિમાં માત્ર સામાન્ય તપાસ પૂરતી નથી, પરંતુ એક વિશેષ અને સ્વતંત્ર તપાસ એજન્સી દ્વારા સમગ્ર મામલાની ઊંડાણપૂર્વક તપાસ થવી જોઈએ. ટ્રસ્ટે મુખ્યમંત્રી યોગી આદિત્યનાથ સમક્ષ ત્રણ મુખ્ય માંગણીઓ મૂકી છે. પ્રથમ, સમગ્ર પ્રકરણની તપાસ SIT દ્વારા કરવામાં આવે. બીજી, તપાસ સંપૂર્ણપણે નિષ્પક્ષ અને પારદર્શક હોવી જોઈએ. અને ત્રીજી, તપાસમાં જે કોઈ દોષિત સાબિત થાય તેની સામે કડક કાયદેસરની કાર્યવાહી કરવામાં આવે.
CCTV કેમેરા અંગે થયો મોટો ખુલાસો
આ સમગ્ર વિવાદ વચ્ચે એક ચોંકાવનારી માહિતી પણ સામે આવી છે. મીડિયા અહેવાલો અનુસાર, લગભગ દોઢ વર્ષ પહેલાં મંદિરના દાનની ગણતરી થતી જગ્યાએ CCTV કેમેરા લગાવવાના નિર્ણયનો કેટલાક જવાબદાર અધિકારીઓ દ્વારા વિરોધ કરવામાં આવ્યો હતો. કહેવાય છે કે, એક પદાધિકારીએ તે સમયે દલીલ કરી હતી કે "અહીં બધા પોતાના જ લોકો છે, કેમેરાની શું જરૂર?" જોકે વિરોધ છતાં કેટલાક કેમેરા લગાવવામાં આવ્યા હતા અને કેટલાક ગુપ્ત રીતે પણ સ્થાપિત કરાયા હતા. હવે કહેવાઈ રહ્યું છે કે આ જ કેમેરાઓમાં કથિત ગેરરીતિમાં સામેલ કેટલાક કર્મચારીઓની હરકતો કેદ થઈ હતી, જેના આધારે તપાસ આગળ વધી રહી છે.
આંતરિક ઓડિટમાં સામે આવી શંકાસ્પદ ગતિવિધિઓ
માહિતી મુજબ, દાનપેટીઓમાંથી મળતી રોકડ રકમની ગણતરી માટે અલગ ગણતરી કક્ષ બનાવવામાં આવી હતી. વર્ષોથી ત્યાં કામ કરતા કેટલાક કર્મચારીઓ પર એટલો વિશ્વાસ હતો કે તેમની નિયમિત તલાશી પણ લેવામાં આવતી નહોતી. દાનની ગણતરીનું કામ કરનારા કર્મચારીઓ લાંબા સમયથી એક જ ટીમમાં કાર્યરત હતા. આ મામલો ત્યારે પ્રકાશમાં આવ્યો જ્યારે આંતરિક ઓડિટ દરમિયાન દર્શનાર્થીઓની સંખ્યા અને દાન તરીકે પ્રાપ્ત થયેલી રકમ વચ્ચે અસંગતતા જોવા મળી. આર્થિક હિસાબમાં રહેલી ગડબડીઓ બાદ તપાસ શરૂ કરવામાં આવી હતી, જેમાં કેટલાક કર્મચારીઓ શંકાના ઘેરામાં આવ્યા હોવાનું કહેવાય છે.
કેટલાક કર્મચારીઓની ભૂમિકાની તપાસ
સૂત્રોના જણાવ્યા મુજબ, દાનની ગણતરી સાથે સંકળાયેલા કેટલાક કર્મચારીઓની પૂછપરછ ચાલી રહી છે. તેમની પાસેથી મહત્વપૂર્ણ માહિતી અને કેટલાક કેસોમાં રકમની વસૂલાત પણ કરવામાં આવી હોવાનું કહેવાય છે. જોકે સત્તાવાર રીતે હજુ સુધી તમામ વિગતો જાહેર કરવામાં આવી નથી. તપાસ એજન્સીઓ એ પણ જાણી રહી છે, કે શું આ ગેરરીતિ વ્યક્તિગત સ્તરે થઈ હતી કે પછી તેના પાછળ કોઈ મોટું સંગઠિત નેટવર્ક કાર્યરત હતું. મંદિર પ્રશાસન સાથે જોડાયેલા કેટલાક અન્ય લોકોની ભૂમિકાની પણ તપાસ થઈ રહી હોવાનું ચર્ચાઈ રહ્યું છે.
આ પણ વાંચો: 6 મહિનાની દીકરીને ખોળામાં લઈને 6ઠ્ઠા માળેથી કૂદી મહિલા: પછી જે થયું તે જાણીને તમારા હોશ ઉડી જશે
ભક્તોની આસ્થા સાથે જોડાયેલો સંવેદનશીલ મુદ્દો
રામ મંદિરના દાન સાથે જોડાયેલો આ મામલો માત્ર નાણાકીય ગેરરીતિનો પ્રશ્ન નથી, પરંતુ કરોડો ભક્તોની આસ્થા અને વિશ્વાસ સાથે સીધો સંબંધ ધરાવે છે. તેથી ટ્રસ્ટ ઈચ્છે છે કે સમગ્ર ઘટનાની નિષ્પક્ષ તપાસ દ્વારા સત્ય બહાર આવે અને ભવિષ્યમાં આવી ઘટના ફરી ન બને તે માટે મજબૂત વ્યવસ્થા ઉભી કરવામાં આવે. હાલ મુખ્યમંત્રી યોગી આદિત્યનાથ તરફથી SIT તપાસ અંગે કોઈ સત્તાવાર જાહેરાત કરવામાં આવી નથી. પરંતુ ટ્રસ્ટની માંગ અને મામલાની ગંભીરતાને ધ્યાનમાં રાખતા રાજ્ય સરકાર આગામી દિવસોમાં મહત્વપૂર્ણ નિર્ણય લઈ શકે છે. સમગ્ર દેશની નજર હવે આ તપાસ અને તેના પરિણામો પર ટકેલી છે.
