રાજકોટ મહાનગરપાલિકા સંચાલિત રાજકોટ પ્રાણીઉદ્યાનમાંથી વન્યજીવપ્રેમીઓ અને પ્રવાસીઓ માટે આનંદના સમાચાર સામે આવ્યા છે. ઝૂમાં એશિયાઈ સિંહણ 'ધરતી'એ ત્રણ સ્વસ્થ સિંહબાળને જન્મ આપ્યો છે. નવા મહેમાનોના આગમનથી ઝૂમાં ખુશીનો માહોલ છવાયો છે, જ્યારે વન્યજીવ સંરક્ષણની દિશામાં પણ આ ઘટના મહત્વપૂર્ણ માનવામાં આવી રહી છે.
ઝૂ તંત્રના જણાવ્યા અનુસાર, એશિયાઈ સિંહ 'ધનંજય' અને સિંહણ 'ધરતી'ના સંવનન બાદ 22 જુલાઈની રાત્રે ત્રણ બચ્ચાંનો જન્મ થયો હતો. જન્મ બાદથી જ માતા અને ત્રણેય સિંહબાળ સંપૂર્ણ સ્વસ્થ છે. ઝૂના પશુચિકિત્સકો અને નિષ્ણાતોની ટીમ તેમની સતત દેખરેખ રાખી રહી છે, જેથી માતા અને બચ્ચાંને કોઈ પ્રકારની તકલીફ ન પડે.
CCTV દ્વારા સતત દેખરેખ, વિશેષ કાળજી
નવજાત સિંહબાળ અને માતાની સુરક્ષા તથા સ્વાસ્થ્યને ધ્યાનમાં રાખીને ઝૂ તંત્રે તેમના નિવાસસ્થાન પર CCTV કેમેરા દ્વારા 24 કલાક મોનિટરિંગની વ્યવસ્થા કરી છે. પશુચિકિત્સકો નિયમિત રીતે તેમની તંદુરસ્તી પર નજર રાખી રહ્યા છે અને જરૂરી તબીબી કાળજી પણ આપવામાં આવી રહી છે.
આ પણ વાંચો: જેતપુરમાં બુટલેગરને પકડવા ગયેલી પોલીસ પર જીવલેણ હુમલો : હેડ કોન્સ્ટેબલને છરીના ઘા; 200 લિટર દેશી દારૂ જપ્ત
ઝૂ તંત્રનું કહેવું છે કે જન્મ પછીના શરૂઆતના દિવસો સિંહબાળના વિકાસ માટે અત્યંત મહત્વપૂર્ણ હોય છે. તેથી માનવીય હસ્તક્ષેપને શક્ય તેટલો ઓછો રાખીને કુદરતી વાતાવરણમાં માતા અને બચ્ચાંની સંભાળ રાખવામાં આવી રહી છે.
જૂન બાદ ફરી ખુશખબર, સિંહોની સંખ્યા વધી
આ પહેલા જૂન મહિનામાં પણ રાજકોટ ઝૂની સિંહણ 'ધારા'એ ત્રણ સિંહબાળને જન્મ આપ્યો હતો. હવે ફરી એકવાર ત્રણ નવા બચ્ચાંના જન્મ સાથે રાજકોટ ઝૂમાં એશિયાઈ સિંહોની કુલ સંખ્યા વધીને 20 થઈ ગઈ છે.
રાજકોટ પ્રાણીઉદ્યાન માટે આ સતત બીજી સફળ પ્રજનન ઘટના છે, જે ઝૂમાં ઉપલબ્ધ સંભાળ, પશુચિકિત્સા વ્યવસ્થા અને સંરક્ષણ પ્રયાસોની સફળતા દર્શાવે છે.
આ પણ વાંચો: "શિક્ષણ મંત્રી રાજીનામું નહીં આપે ત્યાં સુધી..." : જામનગર આયુર્વેદ યુનિવર્સિટી પેપર લીક મામલે અમદાવાદમાં યુથ કોંગ્રેસ અને NSUIનો વિરોધ
રાજકોટ ઝૂ વન્યજીવ પ્રેમીઓ માટે આકર્ષણનું કેન્દ્ર
રાજકોટ પ્રાણીઉદ્યાનમાં અત્યાર સુધીમાં કુલ 58 એશિયાઈ સિંહબાળનો જન્મ નોંધાયો છે. હાલ ઝૂમાં 70 વિવિધ પ્રજાતિના કુલ 614 વન્યપ્રાણી અને પક્ષીઓ મુલાકાતીઓ માટે પ્રદર્શિત કરવામાં આવ્યા છે.
એશિયાઈ સિંહોના સફળ સંવર્ધન, વિવિધ વન્યજીવ સંગ્રહ અને આધુનિક સંભાળ વ્યવસ્થાના કારણે રાજકોટ ઝૂ આજે સૌરાષ્ટ્રના અગ્રણી પ્રવાસન સ્થળોમાં સ્થાન ધરાવે છે. દર વર્ષે મોટી સંખ્યામાં પ્રવાસીઓ અને વિદ્યાર્થીઓ અહીં મુલાકાત લઈને વન્યજીવન વિશે જાણકારી મેળવે છે.
વન્યજીવ નિષ્ણાતોના મત મુજબ, નિયંત્રિત અને વૈજ્ઞાનિક પદ્ધતિથી કરવામાં આવતું પ્રજનન એશિયાઈ સિંહોના લાંબા ગાળાના સંરક્ષણ માટે મહત્વપૂર્ણ છે. રાજકોટ ઝૂમાં સતત થઈ રહેલા સફળ જન્મો આ દિશામાં એક સકારાત્મક સંકેત તરીકે જોવામાં આવે છે.
