રાજકોટ શહેરમાં ફૂડ સેફટીને લઈને ચોંકાવનારી ઘટના સામે આવી છે. માધાપર ચોકડી નજીક આવેલા યોગી ઇન્ડસ્ટ્રીઝ વિસ્તારમાં હીર એન્ટરપ્રાઇઝ નામની પેઢી પર રાજકોટ મહાનગરપાલિકાના ફૂડ વિભાગે દરોડા પાડી આશરે 2000 કિલો જેટલી અખાદ્ય અને ફૂગવાળી બદામનો જથ્થો ઝડપી પાડ્યો છે. પ્રાથમિક તપાસમાં સામે આવ્યું છે કે આ બદામનું કતરણ બનાવી તેનો ઉપયોગ ગોલા, કુલ્ફી, આઈસ્ક્રીમ, મીઠાઈ અને અન્ય ઠંડાઈવાળા ખાદ્ય પદાર્થોમાં કરવામાં આવતો હતો.
ફૂડ વિભાગના અધિકારીઓના જણાવ્યા મુજબ ઝડપાયેલ જથ્થાની અંદાજિત કિંમત 12 થી 14 લાખ રૂપિયા જેટલી થાય છે. ખાસ કરીને ઉનાળાની સિઝનમાં ઠંડા પીણાં અને ગોલા-કુલ્ફીનું વેચાણ વધતા આ પ્રકારની વસ્તુઓની માંગ વધી જાય છે, ત્યારે આ પ્રકારના અખાદ્ય માલના વેચાણે ગંભીર આરોગ્ય ચિંતાઓ ઊભી કરી છે.
સ્થળ પર તપાસ દરમિયાન ફૂગવાળી બદામ મળી
RMCના ફૂડ સેફટી અધિકારી કે.જે. સરવૈયાના જણાવ્યા અનુસાર ફૂડ વિભાગની ટીમે સ્થળ પર તપાસ હાથ ધરી ત્યારે મોટી માત્રામાં ખરાબ હાલતમાં પડેલી બદામ મળી આવી હતી. અધિકારીઓએ જણાવ્યું કે બદામમાં સ્પષ્ટ રીતે ફૂગ લાગેલી જોવા મળી રહી હતી અને તે માનવ ઉપયોગ માટે સંપૂર્ણપણે અયોગ્ય ગણાય તેવી સ્થિતિમાં હતી.
તપાસ દરમિયાન વધુ એક મહત્વની બાબત સામે આવી કે હીર એન્ટરપ્રાઇઝ પાસે ફૂડ લાઇસન્સ નહોતું તેમજ GST નોંધણી વગર જ વેપાર ચલાવવામાં આવતો હતો. ફૂડ વિભાગે તાત્કાલિક નોટિસ ફટકારી કાર્યવાહી શરૂ કરી છે. સ્થળ પરથી લેવામાં આવેલા નમૂનાઓ વડોદરાની લેબોરેટરીમાં મોકલવામાં આવશે, જ્યાં તેની વૈજ્ઞાનિક તપાસ બાદ વધુ કાનૂની પગલાં લેવામાં આવશે.
અધિકારીઓએ જણાવ્યું કે અખાદ્ય જથ્થાનો નાશ કરવાની પ્રક્રિયા પણ શરૂ કરવામાં આવી છે જેથી આ માલ ફરી બજારમાં ન પહોંચે.
રાજકોટ સહિત આજુબાજુના વિસ્તારોમાં સપ્લાય થતો હતો માલ
ફૂડ વિભાગની પ્રાથમિક તપાસમાં સામે આવ્યું છે કે આ બદામનું કતરણ રાજકોટ ઉપરાંત આસપાસના તાલુકા અને જિલ્લાઓમાં સપ્લાય કરવામાં આવતું હતું. આશરે 39થી વધુ પેઢીઓ સુધી આ જથ્થો પહોંચાડવામાં આવ્યો હોવાની શંકા વ્યક્ત કરવામાં આવી રહી છે.
ફૂડ સેફટી અધિકારી કે.જે. સરવૈયાએ જણાવ્યું કે ઉનાળામાં લોકો મોટા પ્રમાણમાં ગોલા, લસ્સી, શ્રીખંડ, આઈસ્ક્રીમ અને અન્ય ઠંડાઈવાળા ખાદ્ય પદાર્થોનું સેવન કરે છે. આવા ખાદ્ય પદાર્થોમાં ડ્રાયફ્રૂટનું કતરણ વ્યાપક પ્રમાણમાં વપરાતું હોય છે. તેથી આ પ્રકારના અખાદ્ય માલનો ઉપયોગ જાહેર આરોગ્ય માટે જોખમી સાબિત થઈ શકે છે.
તેમણે ચેતવણી આપતા કહ્યું કે ફૂગવાળા ડ્રાયફ્રૂટના સેવનથી પેટમાં દુખાવો, ઝાડા, ઉલટી, ડાયેરિયા તેમજ આંતરડાને લગતા ચેપ જેવા રોગો થવાની શક્યતા રહે છે. ખાસ કરીને બાળકો અને વૃદ્ધો માટે આવી વસ્તુઓ વધુ જોખમી બની શકે છે.
આ પણ વાંચો: PM મોદી-અમિત શાહને 'ગદ્દાર' ગણાવતા નિવેદન પર રાહુલ ગાંધી મુશ્કેલીમાં : દિલ્હીમાં ફરિયાદ દાખલ
પેઢી સંચાલકનો બચાવ
હીર એન્ટરપ્રાઇઝના સંચાલક પ્રદીપ દુધાત્રાએ મીડિયા સામે પોતાનો બચાવ કરતાં કહ્યું કે તેઓ માત્ર સારી ગુણવત્તાની બદામમાંથી જ કતરણ બનાવે છે અને જે ફૂગવાળો માલ જોવા મળ્યો તે ફેંકી દેવા માટે અલગ રાખવામાં આવ્યો હતો. તેમણે દાવો કર્યો કે ફૂડ વિભાગે જે કતરણ તપાસ્યું તે સારી બદામમાંથી જ બનાવવામાં આવ્યું હતું.
પ્રદીપ દુધાત્રાના જણાવ્યા અનુસાર બદામ મુંબઈ અને દિલ્હી આસપાસથી મંગાવવામાં આવતી હતી અને અલગ અલગ ગુણવત્તા પ્રમાણે તેનો ભાવ 600થી 700 રૂપિયા પ્રતિ કિલો સુધી રહેતો હતો. તેમણે એ પણ જણાવ્યું કે તેઓ સીધો રિટેલ વેચાણ કરતા નથી પરંતુ હોલસેલરોને જ માલ સપ્લાય કરે છે.
તેમ છતાં ફૂડ વિભાગે સ્થળ પરથી મળેલા જથ્થાને અખાદ્ય ગણાવી કડક કાર્યવાહી શરૂ કરી છે. અધિકારીઓનું કહેવું છે કે લેબોરેટરી રિપોર્ટ આવ્યા બાદ વધુ ગંભીર કલમો હેઠળ કાર્યવાહી શક્ય બની શકે છે.
ઉનાળામાં વધતી ફૂડ સેફટીની ચિંતા
રાજકોટ સહિત ગુજરાતના અનેક શહેરોમાં ઉનાળાની સિઝનમાં ગોલા, કુલ્ફી અને ઠંડાઈવાળી વસ્તુઓનું વેચાણ ભારે પ્રમાણમાં વધે છે. આવી સ્થિતિમાં ખાદ્ય પદાર્થોની ગુણવત્તા અને સેફટી અંગે મહાનગરપાલિકા અને આરોગ્ય વિભાગ દ્વારા સતત ચેકિંગ કરવામાં આવે છે. છેલ્લા કેટલાક વર્ષોમાં નકલી ઘી, બગડેલા મસાલા, અખાદ્ય તેલ અને ફૂગવાળા ડ્રાયફ્રૂટના કેસોમાં વધારો નોંધાયો છે.
આ પણ વાંચો: ઉત્તર પ્રદેશની દરેક યુનિવર્સિટી અને કોલેજોમાં યુનિફોર્મ થશે ફરજિયાત : UPનાં રાજ્યપાલ આનંદીબહેન પટેલે કર્યો આદેશ, જાણો નિર્ણયનું કારણ
ફૂડ નિષ્ણાતો માને છે કે ડ્રાયફ્રૂટ લાંબા સમય સુધી ખોટી રીતે સ્ટોર કરવામાં આવે તો તેમાં ફૂગ અને ઝેરી તત્વો વિકસે છે, જે આરોગ્ય માટે ગંભીર જોખમ ઉભું કરે છે. તેથી ગ્રાહકોએ પણ ખરીદી કરતી વખતે ગુણવત્તા, ગંધ અને પેકિંગ અંગે ખાસ સાવચેતી રાખવી જરૂરી બને છે.
RMC દ્વારા હાલ સમગ્ર મામલે વધુ તપાસ શરૂ કરવામાં આવી છે અને આ જથ્થો ક્યાં ક્યાં સપ્લાય થયો હતો તેની માહિતી એકત્ર કરવામાં આવી રહી છે.
