રાજકોટ શહેરમાં 2007માં એક વ્યક્તિનું ઢીમ ઢાળી ફરાર થયેલો આરોપી ઝડપાયો. રાજકોટ શહેર ક્રાઈમ બ્રાન્ચે નવી મુંબઈથી કિશન ખોજીરામ ચૌધરી નામના આરોપીની ધરપકડ કરી છે. આ કેસ ભકતીનગર પોલીસ સ્ટેશનમાં નોંધાયો હતો અને વર્ષોથી તપાસ ચાલુ હતી. આરોપી કિશન ચૌધરી 2007માં ગુનો કર્યા બાદ સતત સ્થળ બદલીને ફરતો હતો. પ્રાથમિક માહિતી મુજબ ગુનો કર્યા બાદ તે નેપાળ ભાગી ગયો હતો અને ત્યાંથી પછી મુંબઈમાં સ્થાયી થઈ ગયો હતો. લાંબા સમય સુધી પોલીસને ચકમો આપ્યા બાદ અંતે ચોક્કસ માહિતીના આધારે તેને ઝડપી પાડવામાં સફળતા મળી છે.
2007માં કર્યો હતો ગુનો
પોલીસના જણાવ્યા મુજબ, આ કેસમાં 4 આરોપીઓએ મળીને એક વ્યક્તિનું અપહરણ કરી તેનું ઢીમ ઢાળી દીધું હતું. કિશન ચૌધરી આ કેસનો મુખ્ય ફરાર આરોપી હતો જેને પકડવા માટે વર્ષોથી પ્રયાસો ચાલી રહ્યાં હતા. આ કેસમાં હજુ પણ 2 આરોપી ફરાર છે. આ બંને આરોપીને પકડવા માટે તપાસ વધુ તેજ કરાઈ છે.
ક્રાઈમ બ્રાન્ચની કાર્યવાહી
રાજકોટ શહેર ક્રાઈમ બ્રાન્ચે આ કેસમાં આધુનિક ટેક્નોલોજી અને ઈન્ટેલિજન્સનો ઉપયોગ કરીને આરોપી સુધી પહોંચવાનો માર્ગ શોધ્યો હતો. છેલ્લા કેટલાક સમયથી આરોપીની હીલચાલ પર નજર રાખવામાં આવી રહી હતી. ચોક્કસ ઈનપુટ મળ્યા બાદ ક્રાઈમ બ્રાન્ચની ટીમ નવી મુંબઈ પહોંચી અને ઓપરેશન ચલાવી આરોપીને કસ્ટડીમાં લીધો.
આરોપી છેલ્લા 19 વર્ષથી પોતાની ઓળખ છુપાવીને જીવન વિતાવી રહ્યો હતો. તે અલગ-અલગ સ્થળોએ રહેતો અને કામ બદલતો રહેતો જેથી પોલીસ તેનાં સુધી પહોંચી ન શકે. છતાં, સતત મોનીટરીંગ અને ઈન્ટેલિજન્સ શેરિંગના કારણે અંતે તેને પકડવામાં સફળતા મળી.
આ પણ વાંચો: ભરત સોંદરવા મોત કેસમાં SIT તપાસની માંગ : અનુસૂચિત જાતિ સમાજે આપ્યું 15 દિવસનું અલ્ટિમેટમ
હજુ બે આરોપી ફરાર
આ કેસમાં હજુ બે આરોપી ફરાર હોવાના કારણે પોલીસ માટે પડકાર યથાવત છે. ક્રાઈમ બ્રાન્ચની ટીમે હવે આ બંને આરોપી સુધી પહોંચવા માટે તપાસના ચક્રો ગતિમાન કર્યા છે. પોલીસે વિવિધ રાજ્યોમાં તપાસ વિસ્તારી દીધી છે અને સંભવિત સ્થળોએ રેડ કરવાની કાર્યવાહી હાથ ધરાઈ રહી છે.
આ પણ વાંચો: પરિણીતાનાં રહસ્યમય મોત બાદ પતિ સહિત સાસરિયા સામે ગુનો થયો દાખલ : દહેજનાં ભૂખ્યા હતા સાસરિયા?
કાયદો અને વ્યવસ્થાનો સંદેશ
19 વર્ષ જુના કેસમાં આરોપીની ધરપકડથી સ્પષ્ટ થાય છે કે પોલીસ તંત્ર લાંબા સમય સુધી પણ આરોપીઓને છોડતું નથી. આવા કેસોમાં પોલીસની સતત કામગીરી અને પ્રતિબદ્ધતા મહત્વપૂર્ણ હોય છે. રાજકોટ શહેર ક્રાઈમ બ્રાન્ચની આ સફળતા અન્ય કેસોમાં પણ પ્રેરણા રૂપ બની શકે છે. આ ઘટના ફરી એકવાર સાબિત કરે છે કે ગંભીર ગુનાઓમાં આરોપીઓ કેટલાય વર્ષો સુધી ફરાર રહે છતાં અંતે કાયદાના હાથમાંથી બચી શકતા નથી. હવે આગળની તપાસમાં વધુ વિગતો બહાર આવવાની શક્યતા છે.
