રાજકોટમાં આગામી 5થી 7 જૂન દરમિયાન બાબા બાગેશ્વર તરીકે જાણીતા ધીરેન્દ્ર કૃષ્ણ શાસ્ત્રીના દિવ્ય દરબાર અને હનુમંત કથાનું આયોજન કરવામાં આવ્યું છે. સૌરાષ્ટ્ર સનાતન સમિતિ દ્વારા આયોજિત આ ધાર્મિક કાર્યક્રમને લઈને શહેરમાં તૈયારીઓનો ધમધમાટ શરૂ થઈ ગયો છે. કાર્યક્રમ પહેલા શહેરના વિવિધ વિસ્તારોમાં કડશ યાત્રાનું આયોજન કરવામાં આવ્યું છે, જ્યારે બાબાના આગમનને લઈને પણ વિશેષ વ્યવસ્થાઓ ઉભી કરવામાં આવી છે.
આયોજકોના જણાવ્યા મુજબ દિવ્ય દરબાર પહેલા રાજકોટના 12 અલગ-અલગ ઝોનમાં કડશ યાત્રા યોજાશે. આ યાત્રાઓ દ્વારા ધાર્મિક વાતાવરણ સર્જવા અને વધુમાં વધુ લોકોને કાર્યક્રમ સાથે જોડવાનો પ્રયાસ કરવામાં આવશે. શહેરના વિવિધ વિસ્તારોમાંથી મોટી સંખ્યામાં ભક્તો જોડાય તેવી શક્યતા વ્યક્ત કરવામાં આવી રહી છે.
આ પણ વાંચો: કચ્છમાં બાંગ્લાદેશી ઘૂસણખોરો સામે પશ્ચિમ કચ્છ પોલીસનું મેગા ઓપરેશન : 80 શંકાસ્પદોની કરાઈ અટકાયત
બાબા માટે ખાસ ઈલેક્ટ્રિક કારની વ્યવસ્થા
કાર્યક્રમ દરમિયાન બાબા ધીરેન્દ્ર શાસ્ત્રીના કાફલા માટે વિશેષ વ્યવસ્થા કરવામાં આવી છે. આયોજકોના જણાવ્યા મુજબ તેમના પ્રવાસ દરમિયાન કાફલામાં ઇલેક્ટ્રિક કારનો ઉપયોગ કરવામાં આવશે. આ નિર્ણયને પર્યાવરણ પ્રત્યેની સંવેદનશીલતા અને આધુનિક વ્યવસ્થાના ભાગરૂપે જોવામાં આવી રહ્યો છે.
રાજકોટમાં યોજાનારા કાર્યક્રમ માટે સુરક્ષા, ટ્રાફિક વ્યવસ્થા, પાર્કિંગ અને ભીડ નિયંત્રણ સહિતની કામગીરી માટે પણ અલગ-અલગ ટીમો કાર્યરત કરવામાં આવી છે. મોટી સંખ્યામાં ભક્તો ઉમટે તેવી શક્યતા હોવાથી સ્થાનિક તંત્ર પણ સ્થિતિ પર નજર રાખી રહ્યું છે.
આ પણ વાંચો: મહારાષ્ટ્ર બાદ હવે ગુજરાતમાં પણ દેવા માફીની માંગ : બનાસકાંઠાના ખેડૂતોની સરકાર સમક્ષ રજૂઆત
વિરોધીઓને પણ ખુલ્લું આમંત્રણ
દિવ્ય દરબારને લઈને સૌથી વધુ ચર્ચાનો વિષય સમિતિ દ્વારા આપવામાં આવેલું નિવેદન બન્યું છે. આયોજકોએ જણાવ્યું છે કે જે લોકો બાબા ધીરેન્દ્ર શાસ્ત્રીના વિચારો અથવા દાવાઓના વિરોધી હોય તેઓ પણ દિવ્ય દરબારમાં હાજરી આપી શકે છે.
સમિતિના પ્રતિનિધિઓએ દાવો કર્યો છે કે બાબા ધીરેન્દ્ર શાસ્ત્રીએ પોતાના વિરોધીઓના પ્રશ્નો અને પડકારો સ્વીકારવાની તૈયારી દર્શાવી છે. સાથે જ આયોજકોએ ખાતરી આપી છે કે કાર્યક્રમમાં આવનાર કોઈપણ વ્યક્તિને કોઈ પ્રકારનું નુકસાન કે અસુવિધા ન થાય તેની સંપૂર્ણ જવાબદારી સમિતિની રહેશે. આ નિવેદન બાદ કાર્યક્રમને લઈને વધુ ચર્ચા શરૂ થઈ છે અને હવે લોકોની નજર દિવ્ય દરબારમાં થનારી ઘટનાઓ પર કેન્દ્રિત થઈ છે.
આ પણ વાંચો: DyCMની હાઈલેવલ બેઠક બાદ સુરતમાં સાયબર ઠગબાજો સામે મોટું એક્શન : 40 કેસ પોલીસ ચોપડે નોંધાયા
અગાઉ પણ વિવાદોમાં રહ્યા છે ધીરેન્દ્ર શાસ્ત્રી
ઉલ્લેખનીય છે કે ધીરેન્દ્ર શાસ્ત્રીના દિવ્ય દરબાર અને તેમના દાવાઓને લઈને અગાઉ પણ દેશભરમાં અનેક વિવાદો સર્જાયા છે. કેટલાક લોકો તેમના ચમત્કારિક દાવાઓને સમર્થન આપે છે, જ્યારે કેટલાક સંગઠનો અને વ્યક્તિઓ દ્વારા તેમના દાવાઓ અંગે સવાલો પણ ઉઠાવવામાં આવ્યા છે.
જોકે તેમના સમર્થકોનું કહેવું છે કે તેઓ સનાતન ધર્મના પ્રચાર-પ્રસાર માટે કાર્ય કરી રહ્યા છે અને તેમના કાર્યક્રમોમાં મોટી સંખ્યામાં લોકો જોડાઈ રહ્યા છે. બીજી તરફ વિવાદોને કારણે તેમના કાર્યક્રમો સતત ચર્ચામાં રહેતા આવ્યા છે.
રાજકોટમાં યોજાનારા આ ત્રણ દિવસીય કાર્યક્રમને લઈને હવે ભક્તો, આયોજકો અને સ્થાનિક તંત્ર તમામ તૈયારીઓમાં વ્યસ્ત બન્યા છે. કાર્યક્રમ દરમિયાન મોટી સંખ્યામાં લોકો ઉમટે તેવી સંભાવના વચ્ચે સુરક્ષા અને વ્યવસ્થાપન સૌથી મોટો પડકાર બની શકે છે.
