ગુજરાતમાં ભારતીય જનતા પાર્ટીના સંગઠન પર્વના ભાગરૂપે પ્રલંબિત રહેલી સંસ્થાગત ખાલી જગ્યા હવે પુરાઈ રહી છે. શહેર અને જિલ્લા સ્તરે પાર્ટી સંગઠનને મજબૂત બનાવવાના ઉદ્દેશ સાથે, મહત્વપૂર્ણ હોદ્દાઓ માટે નવી નિયુક્તિઓની જાહેરાત કરવામાં આવી છે. આ નિયુક્તિઓ દ્વારા માત્ર અનુભવી કાર્યકરોને તાજી જવાબદારીઓ સોંપવામાં આવી નથી, પરંતુ સ્થાનિક સ્તરે સંગઠનાત્મક ગતિશીલતાને પણ નવી દિશા આપવાનો પ્રયાસ કરવામાં આવ્યો છે.
હવે પ્રેરક શાહ અમદાવાદ શહેર ભાજપના પ્રમુખ
અમદાવાદમાં યોજાયેલી સંગઠન બેઠકમાં શહેર ભાજપના પ્રમુખ તરીકે પ્રેરક શાહની નિમણૂક જાહેર કરવામાં આવી. દિનેશ હોલ ખાતે યોજાયેલી આ બેઠકમાં પૂર્વ પ્રદેશ અધ્યક્ષ અને ધારાસભ્ય જીતુ વાઘાણી તથા ચૂંટણી અધિકારી પ્રદીપ ખીમાણી ઉપસ્થિત રહ્યા હતા. પ્રેરક શાહ છેલ્લા કેટલાક સમયથી ભાજપના રાજ્ય સ્તરના મીડિયા સેલમાં પ્રવક્તા તરીકે કાર્યરત રહ્યા છે અને સંગઠન ક્ષેત્રે તેમનો અનુભવ વિશાળ છે. બેઠક દરમિયાન સર્વસંમતિથી તેમના નામને મંજૂરી આપવામાં આવી હતી.
કૉંગ્રેસ પર વાઘાણીના પ્રહાર
બેઠક દરમિયાન જીતુ વાઘાણીએ કૉંગ્રેસ અને ખાસ કરીને રાહુલ ગાંધીના ગુજરાત પ્રવાસને લઈને આકરા પ્રહાર કર્યા. તેમણે કહ્યું, "રાહુલ ગાંધીને અમદાવાદ મોકલવા પડે એ જ સ્પષ્ટ કરે છે કે કૉંગ્રેસે સ્થાનિક સ્તરે પોતાનું નેતૃત્વ ગુમાવ્યું છે." તેમણે દાવો કર્યો કે 2027માં ભાજપ નવો ઇતિહાસ રચશે અને કૉંગ્રેસ પહેલાં કરતાં વધુ ખરાબ સ્થિતિમાં જશે. "ગુજરાતના ભાજપ કાર્યકર્તાઓ કૉંગ્રેસને અહીં કશું પ્રાપ્ત થવા દેશે નહીં,"
વડોદરામાં રસિક પ્રજાપતિને જવાબદારી
વડોદરા જિલ્લાના ભાજપ પ્રમુખ પગ પર રસિક પ્રજાપતિની નિમણૂક થઈ છે. તેઓ અગાઉ બક્ષીપંચ મોરચાના પ્રમુખ તરીકે કાર્યરત રહ્યા હતા અને પ્રદેશ સ્તરે સંગઠન કાર્યમાં સક્રિય રહ્યા છે. વડોદરા સહિત કેટલાક જિલ્લાઓમાં અનેક કારણોસર ભાજપ પ્રમુખોની પસંદગી વિલંબિત રહી હતી જેમા એક કારણ આંતરિક જૂથબંધી પણ છે. આ સમસ્યાઓના નિરાકરણ બાદ ભૂપેન્દ્રસિંહ ચુડાસમાની હાજરીમાં રસિક પ્રજાપતિના નામની જાહેરાત કરવામાં આવી.
