Ahmedabad Flower Show : અમદાવાદમાં રિવરફ્રન્ટ ફ્લાવર શો 2026 માટે તડામાર તૈયારીઓ પૂર્ણ થઈ છે. સાબરમતી રિવરફ્રન્ટ પર આ ફ્લાવર શો કુલ 5 ઝોનમાં તૈયાર કરવામાં આવ્યો છે, જ્યાં રંગબેરંગી ફૂલો અને આકર્ષક ડિઝાઇન લોકો માટે ખાસ આકર્ષણ બનશે. રિવરફ્રન્ટ ફ્લાવર શોનો આનંદ લોકો 1 જાન્યુઆરીથી 25 જાન્યુઆરી 2026 સુધી માણી શકશે.
ઓનલાઈન અને ઓફલાઈન બંને ટિકિટ વ્યવસ્થા
મુલાકાતીઓની સુવિધા માટે ઓનલાઈન અને ઓફલાઈન એમ બંને પ્રકારની ટિકિટ વ્યવસ્થા કરવામાં આવી છે. 12 વર્ષથી ઉપરના નાગરિકો માટે સામાન્ય દિવસોમાં ટિકિટનો દર રૂ. 80 રાખવામાં આવ્યો છે, જ્યારે વીકએન્ડ અને જાહેર રજાઓ એટલે કે શનિવાર અને રવિવારે ટિકિટનો દર રૂ. 100 રહેશે. ફ્લાવર શો સાથે સાથે અટલ બ્રિજની મજા માણવા ઇચ્છતા લોકો માટે ખાસ કોમ્બો ટિકિટની પણ વ્યવસ્થા કરવામાં આવી છે.
VIP સ્લોટ રાખવામાં આવ્યો
ફ્લાવર શોમાં ખાસ વ્યવસ્થા રૂપે સવારે 8:00 થી 9:00 વાગ્યા સુધી અને રાત્રે 10:00 થી 11:00 વાગ્યા દરમિયાન VIP સ્લોટ રાખવામાં આવ્યો છે. 12 વર્ષથી નીચેના બાળકો તેમજ AMC સંચાલિત શાળાના બાળકોને ફ્લાવર શોમાં ફ્રી એન્ટ્રી આપવામાં આવશે. જ્યારે ખાનગી શાળાના બાળકો માટે સવારે 9:00 વાગ્યાથી બપોરે 1:00 વાગ્યા સુધી માત્ર રૂ. 10ની ટિકિટ પર એન્ટ્રીની સુવિધા ઉપલબ્ધ રહેશે.
પ્રવાસીઓ માટે ખાસ આકર્ષણ
અમદાવાદ મ્યુનિસિપલ કોર્પોરેશન દ્વારા આયોજિત આ રિવરફ્રન્ટ ફ્લાવર શો શહેરના નાગરિકો તેમજ પ્રવાસીઓ માટે ખાસ આકર્ષણ બની રહેશે. સુંદર ફૂલોના સજાવટ, આયોજનબદ્ધ ઝોન અને સુવિધાજનક ટિકિટ વ્યવસ્થાના કારણે આ ફ્લાવર શો 2026 શહેર માટે યાદગાર બની રહે તેવી આશા વ્યક્ત કરવામાં આવી છે.
