સાબરકાંઠાના પ્રાંતિજમાં ભાજપ માટે રાજકીય રીતે મહત્વપૂર્ણ ગણાતી નગરપાલિકામાં આંતરિક અસંતોષ ખુલ્લેઆમ સામે આવ્યો છે. પ્રાંતિજ નગરપાલિકાના 15 કોર્પોરેટરો દ્વારા સામુહિક રાજીનામા આપવામાં આવ્યા હોવાના મામલે પક્ષ સંગઠન સતત નુકસાન નિયંત્રણના પ્રયાસોમાં લાગ્યું છે. છેલ્લા બે દિવસ દરમિયાન ભાજપ સંગઠન દ્વારા પ્રાંતિજ નજીક આવેલી ત્રણ અલગ-અલગ હોટલોમાં બેઠકો યોજવામાં આવી હતી, પરંતુ કોઈ ચોક્કસ સમાધાન ન નીકળતાં રાજકીય અનિશ્ચિતતા યથાવત રહી છે.
સૂત્રોના જણાવ્યા અનુસાર આ બેઠકોમાં નારાજ કોર્પોરેટરો, સ્થાનિક સંગઠનના હોદ્દેદારો, નગરપાલિકાના પ્રમુખ સહિતના આગેવાનો વચ્ચે વિસ્તૃત ચર્ચાઓ થઈ હતી. જોકે કોર્પોરેટરો પોતાના વલણમાં અડગ રહેતાં બેઠકમાંથી કોઈ નિર્ણાયક પરિણામ સામે આવ્યું નથી. પરિણામે આજે ફરી એકવાર સમાધાન માટે બેઠક યોજાય તેવી શક્યતા વ્યક્ત કરવામાં આવી રહી છે.
આ પણ વાંચો: ગુજરાતમાં ચોમાસાની એન્ટ્રી : વાવાઝોડાથી બેના મોત, 50-60 કિમીની ઝડપે પવન ફૂંકાતા વૃક્ષો ધરાશાયી; અમદાવાદ સહિત આ જિલ્લાઓમાં આગામી 4 દિવસ રહેજો સાવધાન
બળવા પાછળના કારણોની તપાસ શરૂ
ભાજપ સંગઠન માટે સૌથી મોટી ચિંતાનો વિષય માત્ર રાજીનામા નહીં પરંતુ તેની પાછળ રહેલા કારણો અને સંભવિત સૂત્રધારો છે. પક્ષના ઉચ્ચ સ્તરે હવે એ શોધવાનો પ્રયાસ શરૂ થયો હોવાનું સૂત્રો જણાવી રહ્યા છે કે કોર્પોરેટરોને સામુહિક રીતે બળવા માટે કોણે પ્રેરિત કર્યા અને સમગ્ર પ્રક્રિયાની શરૂઆત ક્યાંથી થઈ.
માહિતી મુજબ રાજ્ય અને જિલ્લા સ્તરના નેતૃત્વ દ્વારા પ્રથમ બેઠક, રાજીનામાની પ્રક્રિયા અને તેમાં સંકળાયેલા આગેવાનો અંગેની વિગતો એકત્રિત કરવામાં આવી રહી છે. સંગઠન આ ઘટનાને માત્ર સ્થાનિક અસંતોષ તરીકે નહીં પરંતુ ગોઠવાયેલા રાજકીય વિરોધ તરીકે પણ જોઈ રહ્યું હોવાનું ચર્ચાઈ રહ્યું છે.
આ પણ વાંચો: 9 જૂને PM મોદી રચશે ઐતિહાસિક કીર્તિમાન?: તૂટી શકે છે જવાહરલાલ નેહરુનો રેકોર્ડ! જાણો શું છે આખી વાત
લઘુમતી વિસ્તારમાં યોજાયેલી બેઠક ચર્ચાના કેન્દ્રમાં
સૂત્રો મુજબ રવિવારે રાત્રે પ્રાંતિજના લઘુમતી વિસ્તાર તરીકે ઓળખાતા વિસ્તારમાં આશરે 15 સભ્યો અને કેટલાક આગેવાનો વચ્ચે મહત્વપૂર્ણ બેઠક યોજાઈ હતી. આ બેઠકમાં જ સામુહિક રાજીનામાની વ્યૂહરચના ઘડાઈ હોવાની આશંકા વ્યક્ત કરવામાં આવી રહી છે.
ચર્ચા એવી પણ છે કે આ બેઠક દરમિયાન વિરોધની રણનીતિ તૈયાર કરવામાં આવી હતી અને ત્યારબાદ રાજીનામાના પત્ર પર કોર્પોરેટરોના હસ્તાક્ષર લેવામાં આવ્યા હતા. જોકે આ દાવાઓ અંગે સત્તાવાર પુષ્ટિ થઈ નથી, પરંતુ પક્ષ સંગઠન દ્વારા આ દિશામાં તપાસ કરવામાં આવી રહી હોવાનું જાણવા મળે છે.
બેઠક પૂર્ણ થયા બાદ હસ્તાક્ષરવાળા પત્ર સાથે કેટલાક કોર્પોરેટરો મોડી રાત્રે હિંમતનગર પહોંચ્યા હતા. ત્યાં જિલ્લા ભાજપ સંગઠનને સામુહિક રાજીનામાનો પત્ર સોંપવામાં આવ્યો હોવાની ચર્ચાઓએ સમગ્ર ઘટનાને વધુ ગંભીર બનાવી છે.
આ પણ વાંચો: અમેરિકામાં અંધાધૂંધ ફાયરિંગ: 7 લોકોના મોત, શૂટરે પણ ટૂંકાવ્યું જીવન, શું હતો મામલો?
સંગઠનમાં વધ્યો રાજકીય તણાવ
રાજીનામાના મામલા બાદ ભાજપના સ્થાનિક સંગઠનમાં ભારે ખળભળાટ મચી ગયો છે. સૂત્રોનું કહેવું છે કે રાત્રિના સમયે થયેલી બેઠકો અને ત્યારબાદની ગતિવિધિઓને લઈને પક્ષમાં અનેક પ્રકારની અટકળો ચાલી રહી છે. કેટલાક વર્તુળોમાં એવી પણ ચર્ચા છે કે રાત્રિ દરમિયાન ઉશ્કેરણીજનક વાતાવરણ ઊભું કરીને વિવાદને વધુ વેગ આપવાનો પ્રયાસ થયો હોઈ શકે છે.
આ કારણે પક્ષના ઉચ્ચ નેતૃત્વે સમગ્ર ઘટનાને ગંભીરતાથી લીધી છે અને દરેક પાસાની વિગતવાર માહિતી એકત્રિત કરવાની પ્રક્રિયા શરૂ કરી છે. સ્થાનિક સ્તરથી લઈને જિલ્લા અને રાજ્ય સ્તર સુધી સતત મોનીટરીંગ કરવામાં આવી રહ્યું હોવાનું જાણવા મળે છે.
આ પણ વાંચો: સરકારી કામકાજમાં મોટી રાહત: ગુજરાત સરકારે રાજ્યભરમાં 'સિંગલ યુનિવર્સલ એફિડેવિટ' ફોર્મેટ લાગુ કર્યું
અગાઉ પણ થયો હતો બળવો
પ્રાંતિજમાં ભાજપ માટે આ પ્રથમ આંતરિક વિવાદ નથી. અગાઉ પણ પ્રાંતિજ તાલુકા પંચાયતમાં બળવો સામે આવતા રાજકીય વર્તુળોમાં ભારે ચર્ચા જગાઈ હતી. તે સમયે પણ સંગઠનને નુકસાન નિયંત્રણ માટે વિશેષ પ્રયાસો કરવા પડ્યા હતા.
હવે નગરપાલિકામાં એક સાથે 15 કોર્પોરેટરોના રાજીનામાનો મુદ્દો સામે આવતા પક્ષ માટે પડકાર વધુ મોટો બન્યો છે. સ્થાનિક સ્વરાજ્યની સંસ્થાઓમાં સંગઠનની એકતા અને નિયંત્રણ જાળવવા માટે નેતૃત્વ પર દબાણ વધ્યું છે.
આ પણ વાંચો: "મને લાકડીથી ફટકાર્યો હતો": અમદાવાદમાં મહિલા PSI પર પ્રજ્ઞાચક્ષુ વેપારીને માર મારવાનો આક્ષેપ
આગામી બેઠક પર સૌની નજર
હાલ સમગ્ર ઘટનાક્રમમાં સૌથી મહત્વપૂર્ણ મુદ્દો એ છે કે નારાજ કોર્પોરેટરો અને સંગઠન વચ્ચે સમાધાન થાય છે કે નહીં. આજે યોજાનારી સંભવિત બેઠકમાં કોઈ મધ્યમ માર્ગ નીકળે છે કે રાજીનામાનો વિવાદ વધુ ઘેરો બને છે તેના પર સૌની નજર છે.
જો સમાધાન નહીં થાય તો પ્રાંતિજ નગરપાલિકાના રાજકારણમાં મોટી ઉથલપાથલ સર્જાઈ શકે છે. બીજી તરફ ભાજપ સંગઠન માટે પણ આ ઘટના આંતરિક અસંતોષ અને સંગઠનાત્મક પડકારોની કસોટી બની રહી છે.
