અમદાવાદ શહેરના પંચવટી વિસ્તારમાં કેબિનમાં નાની દુકાન ચલાવી જીવનનિર્વાહ કરતા પ્રજ્ઞાચક્ષુ આધેડ ગોપાલ દરજી સાથે પોલીસ સ્ટેશનની અંદર મારપીટ કરવામાં આવી હોવાના ગંભીર આક્ષેપો સામે આવ્યા છે. આ ઘટનાએ પોલીસની કામગીરી અને દિવ્યાંગ નાગરિકોના અધિકારો અંગે અનેક સવાલો ઉભા કર્યા છે. પીડિતના જણાવ્યા અનુસાર તેમને ગુજરાત યુનિવર્સિટી પોલીસ સ્ટેશનમાં લાવી મહિલા PSI દ્વારા નિર્દયતાપૂર્વક માર મારવામાં આવ્યો હતો, જ્યારે પોલીસ પક્ષ આ ઘટનાને અલગ રીતે રજૂ કરી રહ્યો છે.
મળતી માહિતી મુજબ ગોપાલ દરજી સરકાર દ્વારા ફાળવવામાં આવેલી કેબિનમાં દુકાન ચલાવે છે. ઘટનાના દિવસે બપોરના સમયે એક સગીર વયનો છોકરો તેમની કેબિન પાસે આવ્યો હતો. ગોપાલ દરજીનું કહેવું છે કે અગાઉ પણ કેટલાક બાળકો દુકાનના સામાનને નુકસાન પહોંચાડતા હોવાથી તેમને શંકા ગઈ હતી કે સગીર કોઈ પેકેટ અથવા સામાન સાથે ચેડાં કરી રહ્યો છે. પ્રજ્ઞાચક્ષુ હોવાના કારણે પરિસ્થિતિ સ્પષ્ટ રીતે જોઈ શકતા ન હોવાથી તેમણે સગીરનો હાથ પકડવાનો પ્રયાસ કર્યો હતો, જેમાં બાળકને સામાન્ય ઈજા થઈ હોવાનું કહેવાય છે.
ત્યારબાદ સગીરે પોતાના પિતાને સમગ્ર ઘટનાની જાણ કરી હતી. આ મામલે સગીરના પિતા કેબિન પર પહોંચ્યા હતા અને બંને પક્ષ વચ્ચે બોલાચાલી થઈ હોવાનું જાણવા મળે છે. બાદમાં પોલીસ કંટ્રોલ રૂમમાં ફોન કરવામાં આવ્યો હતો, જેના આધારે ગુજરાત યુનિવર્સિટી પોલીસ ગોપાલ દરજીને પૂછપરછ માટે પોલીસ સ્ટેશન લઈ ગઈ હતી.
પીડિતનો ગંભીર આરોપ
ગોપાલ દરજીએ આક્ષેપ કર્યો છે કે તેમણે સગીરના પિતા પાસે પોતાની ભૂલ સ્વીકારી માફી પણ માંગી હતી, છતાં પોલીસ સ્ટેશનમાં તેમની સાથે અપમાનજનક અને હિંસક વર્તન કરવામાં આવ્યું હતું. તેમણે વધુમાં જણાવ્યું કે, હું જ્યારે ગુજરાત યુનિ. પોલીસ સ્ટેશનમાં હતો ત્યારે બહારથી એક PSI આવ્યા હતા. તેમને કોઈએ રોક્યા ન હતા. તેને મને લાફા અને લાતો મારી જેથી હું નીચે પડી ગયો હતો. ત્યારબાદ પણ તેને મને લાકડીથી ફટકાર્યો હતો. મેં પોલીસને મારી ફરિયાદ લખવા જણાવ્યું હતું. પરંતુ લખી નહોતી.
પીડિતના દાવા મુજબ મહિલા અધિકારીએ તેમને લાફા, લાતો અને અન્ય રીતે માર માર્યો હતો. ગોપાલ દરજીનું કહેવું છે કે આ ઘટનાના કારણે તેમના શરીરના વિવિધ ભાગોમાં ઈજા પહોંચી છે. તેમણે કાનમાંથી પાણી નીકળવાની, આંખમાં ઈજા થવાની અને શરીરમાં દુખાવાની ફરિયાદ કરી છે. હાલ તેઓ સારવાર હેઠળ હોવાનું જાણવા મળે છે.
ગોપાલ દરજીએ વધુમાં આક્ષેપ કર્યો છે કે જ્યારે તેમણે પોલીસ સમક્ષ ફરિયાદ નોંધાવવાની માંગણી કરી ત્યારે તેમની ફરિયાદ સ્વીકારવામાં આવી નહોતી. આ દાવાએ સમગ્ર ઘટનાને વધુ ગંભીર બનાવી દીધી છે, કારણ કે જો પોલીસ સ્ટેશનની અંદર કોઈ વ્યક્તિ સાથે ગેરવર્તન થયું હોય તો ફરિયાદ નોંધવાની પ્રક્રિયા પારદર્શક હોવી જરૂરી ગણાય છે.
આ પણ વાંચો: સાયબર ફ્રોડનું હાઈટેક ‘ગુજરાત મોડેલ’ : ઓનલાઈન સટ્ટાબાજી,મ્યુલ એકાઉન્ટ રેકેટમાં ગુજરાતના બે યંગસ્ટર્સ 'કિંગપિન',તેલંગાણા CID એ ગુજરાત,દિલ્હી,પંજાબથી 11 ની ધરપકડ કરી
પોલીસનો પક્ષ શું કહે છે?
આ મામલે ગુજરાત યુનિવર્સિટી પોલીસ સ્ટેશનના PI એસ.આર. બાવાએ અલગ સ્પષ્ટતા આપી છે. તેમના જણાવ્યા મુજબ ગોપાલ દરજીએ જે બાળકને લાફો માર્યો હતો તે અમદાવાદ ગ્રામ્ય વિસ્તારમાં ફરજ બજાવતા મહિલા PSI રાઠોડનો પુત્ર હતો. બાળકના કાનમાં ઈજા થતાં માતા તરીકે મહિલા PSI ભાવનાત્મક રીતે પ્રતિક્રિયા આપી બેઠા હતા.
PI ના જણાવ્યા અનુસાર મહિલા PSI એ ગોપાલ દરજીને માત્ર ઝાપટ મારી હતી. તેમણે એવો પણ દાવો કર્યો કે શરૂઆતમાં મહિલા અધિકારીને ખબર નહોતી કે ગોપાલ દરજી પ્રજ્ઞાચક્ષુ છે. બાદમાં આ હકીકતની જાણ થતાં તેમણે પણ કોઈ સત્તાવાર ફરિયાદ નોંધાવી નહોતી.
પોલીસ અધિકારીએ જણાવ્યું હતું કે ગોપાલ દરજીએ માત્ર એક અરજી આપી હતી, પરંતુ તેઓ સત્તાવાર ફરિયાદ કરવા તૈયાર નહોતા. તેમ છતાં પોલીસે તેમને ફરી પોલીસ સ્ટેશન બોલાવ્યા છે અને જો તેઓ ફરિયાદ નોંધાવવા ઈચ્છશે તો કાયદેસરની કાર્યવાહી કરવામાં આવશે.
આ પણ વાંચો: ડેફાબેટ કૌભાંડમાં ગુજરાત કનેક્શન બાદ આદેશ : DGP સહિતના ઉચ્ચ અધિકારીઓને સાથે રાખી રાજ્યવ્યાપી વિડીયો કોન્ફરન્સ,રાજ્યભરમાં ‘ઓપરેશન મ્યુલ હંટ 2.0’ના આદેશ
વિરોધાભાસી દાવાઓ વચ્ચે સત્ય શું?
આ સમગ્ર ઘટનામાં બંને પક્ષના નિવેદનોમાં નોંધપાત્ર તફાવત જોવા મળે છે. એક તરફ પીડિત વ્યક્તિ પોલીસ સ્ટેશનમાં ગંભીર મારપીટ અને ફરિયાદ ન નોંધવાની વાત કરી રહ્યા છે, જ્યારે બીજી તરફ પોલીસ તેને મર્યાદિત અને ક્ષણિક પ્રતિક્રિયા તરીકે રજૂ કરી રહી છે.
કાયદાકીય રીતે જો કોઈ પોલીસ અધિકારી દ્વારા ફરજ દરમિયાન અથવા પોલીસ સ્ટેશનની અંદર બળપ્રયોગ કરવામાં આવ્યો હોય, તો તેની નિષ્પક્ષ તપાસ જરૂરી બને છે. ખાસ કરીને જ્યારે મામલો દિવ્યાંગ વ્યક્તિ સાથે સંકળાયેલો હોય ત્યારે માનવ અધિકારો અને દિવ્યાંગોના કાનૂની સંરક્ષણના મુદ્દા પણ મહત્વના બની જાય છે.
આ પણ વાંચો: દેશભરમાં આક્રમક આંધી તોફાન અને વરસાદનું એલર્ટ : IMDએ અનેક રાજ્યોમાં જાહેર કરી ચેતવણી! જાણો ગુજરાતમાં શું રહેશે સ્થિતિ
તપાસ અને જવાબદારી પર નજર
હાલ આ મામલે સત્તાવાર તપાસ શરૂ થઈ છે કે નહીં તે અંગે સ્પષ્ટ માહિતી ઉપલબ્ધ નથી. જોકે ઘટનાના આરોપો અને પોલીસના જવાબ વચ્ચેનો તફાવત જોતા સ્વતંત્ર અને પારદર્શક તપાસની માંગ ઉઠી શકે છે. જો પોલીસ સ્ટેશનની અંદર કોઈ પ્રકારની ગેરરીતિ અથવા અતિશય બળપ્રયોગ થયો હોય તો જવાબદારી નક્કી કરવી જરૂરી બનશે.
આ ઘટના માત્ર એક વ્યક્તિ સાથે થયેલા વર્તનનો પ્રશ્ન નથી, પરંતુ કાયદો અમલ કરતી સંસ્થાઓ પ્રત્યે જનવિશ્વાસ જળવાઈ રહે તે માટે પણ મહત્વપૂર્ણ છે. આગામી દિવસોમાં ફરિયાદ નોંધાય છે કે નહીં, અને તપાસ કઈ દિશામાં આગળ વધે છે તેના પર સૌની નજર રહેશે.
