અમદાવાદ શહેરમાં સુરક્ષા વ્યવસ્થાને વધુ મજબૂત બનાવવા અને ગુનાખોરી પર લગામ કસવા માટે અમદાવાદ પોલીસ કમિશનર જી.એસ. મલિક દ્વારા શ્રેણીબદ્ધ જાહેરનામા બહાર પાડવામાં આવ્યા છે. આ નવા નિયમો અંતર્ગત હવે સ્પા સેન્ટરો, ગેરેજ માલિકો, ઔદ્યોગિક એકમો અને મકાનમાલિકોએ ફરજિયાતપણે પોલીસ નોંધણી કરાવવી પડશે.
અમિત શાહની મુલાકાતને પગલે 'નો ડ્રોન ફ્લાય ઝોન'
કેન્દ્રીય ગૃહમંત્રી અમિત શાહ તાજેતરમાં 8 અને 9 માર્ચ, 2026ના રોજ અમદાવાદની મુલાકાતે છે. સુરક્ષાના કારણોસર અને આતંકવાદી તત્વો ડ્રોન જેવા સાધનોનો દુરુપયોગ ન કરે તે હેતુથી સમગ્ર અમદાવાદમાં 'નો ડ્રોન ફ્લાય ઝોન' જાહેર કરાયો છે. આ પ્રતિબંધ 8 માર્ચના રોજ સાંજે 16:00 કલાકથી 9 માર્ચની રાત્રિના 02:00 કલાક સુધી અમલમાં રહેશે. આ સમયગાળા દરમિયાન ડ્રોન, ક્વાડ કોપ્ટર કે પેરાગ્લાઈડર ઉડાડવા પર સખત મનાઈ છે.
સ્પા અને મસાજ પાર્લર પર બાજ નજર
શહેરમાં સ્પા સેન્ટરોની આડમાં ચાલતી અનૈતિક પ્રવૃત્તિઓ અને ડ્રગ્સના દૂષણને ડામવા પોલીસે કડક વલણ અપનાવ્યું છે. હવે દરેક સ્પા સંચાલકે પોતાના કર્મચારીઓની વિગતો, ફોટા અને ઓળખના પુરાવા સ્થાનિક પોલીસ સ્ટેશનમાં જમા કરાવવા પડશે. જો કર્મચારી વિદેશી હોય તો તેના પાસપોર્ટ અને વિઝાની વિગતો આપવી પણ અનિવાર્ય છે.
ધ્વનિ પ્રદૂષણ અને DJ પર નિયંત્રણ
વરઘોડા કે રેલીમાં કાનના પડદા ફાડી નાખતા ડીજેના અવાજ પર હવે લગામ મુકાશે. પોલીસની મંજૂરી વિના માઈક સિસ્ટમનો ઉપયોગ કરી શકાશે નહીં. ખાસ કરીને હોસ્પિટલ, શાળા અને અદાલતની 100 મીટરની ત્રિજ્યામાં માઇક, ડીજે વગાડવા પર પ્રતિબંધ છે. રાત્રે 10 થી સવારે 6 વાગ્યા સુધી લાઉડ સ્પીકર વગાડવાની મનાઈ રહેશે.
ગેરેજ અને ભાડુઆતની નોંધણી ફરજિયાત
ગુનાહિત પ્રવૃત્તિઓમાં વાહનોના ઉપયોગને રોકવા માટે ગેરેજ માલિકોએ રિપેરિંગમાં આવતા દરેક વાહન અને તેના માલિકની વિગતો રજીસ્ટરમાં રાખવી પડશે. તે જ રીતે, આતંકી પ્રવૃત્તિઓ અટકાવવા માટે મકાનમાલિકોએ પોતાના ભાડુઆતોની વિગતો પોલીસ સ્ટેશનમાં આપવી પડશે. આ નિયમ દુકાન, ગોડાઉન અને ઓફિસ ભાડે આપનાર માલિકોને પણ લાગુ પડશે.
ઔદ્યોગિક એકમો માટે માર્ગદર્શિકા
ફેક્ટરી કે અન્ય એકમોમાં કામ કરતા પરપ્રાંતિય શ્રમિકોની નોંધણી હવે 'સીટીઝન પોર્ટલ' પર ઓનલાઈન કરવાની રહેશે. નવા કામદાર રાખ્યાના 7 દિવસમાં તેની ખરાઈ કરવી માલિકની જવાબદારી રહેશે.
