Melodi Trend: ભારતના પ્રધાનમંત્રી નરેન્દ્ર મોદી અને ઇટાલીના PM જ્યોર્જિયા મેલોની વચ્ચેની મિત્રતા અને વૈશ્વિક કેમિસ્ટ્રીથી આખી દુનિયા વાકેફ છે. સોશિયલ મીડિયા પર અવારનવાર બંને નેતાઓના નામને જોડીને 'Melodi' હેશટેગ ટ્રેન્ડ થતું રહે છે. આ બધાની વચ્ચે, PM મોદીના વર્તમાન પાંચ દેશોના યુરોપ પ્રવાસના અંતિમ તબક્કા દરમિયાન રોમમાંથી એક એવી તસવીર સામે આવી છે જેણે ડિજિટલ દુનિયામાં ધૂમ મચાવી દીધી છે. PM મોદીએ સત્તાવાર મુલાકાત દરમિયાન ઇટાલીના PM જ્યોર્જિયા મેલોનીને ખાસ “Melody” ચોકલેટ ભેટમાં આપી હતી. PM મોદીની આ અનોખી અને રમૂજી ભેટની સ્ટાઇલ જોઈને ફેન્સ સોશિયલ મીડિયા પર ક્રેઝી થઈ ગયા છે. આ અનોખી ભેટ સ્વીકાર્યા બાદ જ્યોર્જિયા મેલોની પણ પોતાની ખુશી રોકી શક્યા નહોતા. તેમણે તાત્કાલિક સોશિયલ મીડિયા પ્લેટફોર્મ પર આ અંગેની પોસ્ટ શેર કરીને PM મોદીનો દિલથી આભાર વ્યક્ત કર્યો હતો.
મેલોનીએ લખ્યું- 'થેન્ક યૂ ફોર ધ ગિફ્ટ' અને ચોકલેટ થઈ ટ્રેન્ડ!
જ્યોર્જિયા મેલોનીએ સોશિયલ મીડિયા પર ચોકલેટની તસવીર સાથે “Thank you for the gift” (ભેટ માટે તમારો આભાર) લખતી પોસ્ટ શેર કરી હતી. આ પોસ્ટ મિનિટોમાં જ વાયરલ થઈ ગઈ હતી અને માઇક્રોબ્લોગિંગ સાઇટ 'X' (ટ્વિટર) તથા ઇન્સ્ટાગ્રામ પર “Melody” ચોકલેટ ટોપ ટ્રેન્ડમાં આવી ગઈ હતી. હજારો યુઝર્સે આ પોસ્ટ પર અત્યંત રસપ્રદ અને રમુજી પ્રતિક્રિયાઓ આપવાનું શરૂ કર્યું છે. લોકો કમેન્ટ્સમાં લખી રહ્યા છે કે, " PM મોદી સાચે જ સોશિયલ મીડિયાના ટ્રેન્ડ્સ અને ફેન્સની લાગણીઓને સારી રીતે સમજે છે."
રોમ પહોંચતા જ મેલોનીએ PM મોદી સાથે લીધી 'શાહી સેલ્ફી'
આ પહેલા મંગળવારે સાંજે વડાપ્રધાન નરેન્દ્ર મોદી જ્યારે ઇટાલીની રાજધાની રોમ પહોંચ્યા, ત્યારે જ્યોર્જિયા મેલોનીએ તેમનું અદભુત અને ઉષ્માભર્યું સ્વાગત કર્યું હતું. મુલાકાતની શરૂઆતમાં જ મેલોનીએ PM મોદી સાથે પોતાના ઓફિશિયલ સોશિયલ મીડિયા હેન્ડલ પર એક ખાસ અને સ્માઇલિંગ સેલ્ફી શેર કરી હતી. આ ફોટોની સાથે તેમણે કેપ્શનમાં લખ્યું હતું, “Welcome to Rome, my friend” (મારા મિત્ર, રોમમાં તમારું સ્વાગત છે). આ શાહી સેલ્ફી સોશિયલ મીડિયા પર આગની જેમ ફેલાઈ ગઈ હતી અને બંને નેતાઓની અતૂટ દોસ્તીની ચર્ચાઓ ફરી વૈશ્વિક સ્તરે શરૂ થઈ ગઈ છે.
મિત્રતાની સાથે અબજો ડૉલરના રાજદ્વારી સંબંધો પર નજર
જોકે, PM મોદીની આ ઇટાલી મુલાકાત માત્ર સોશિયલ મીડિયા પર ટ્રેન્ડ થવા પૂરતી કે મિત્રતાના સંદેશા પૂરતી મર્યાદિત નથી. ભારત અને ઇટાલી વચ્ચેના રાજદ્વારી અને વ્યૂહાત્મક સંબંધોને આગામી પાંચ વર્ષ માટે એક નવી ઊંચાઈ પર લઈ જવાના દૃષ્ટિકોણથી આ પ્રવાસ અત્યંત મહત્વપૂર્ણ માનવામાં આવી રહ્યો છે. આજે યોજાનારી સત્તાવાર દ્વિપક્ષીય બેઠકમાં બંને નેતાઓ વચ્ચે સંરક્ષણ (Defense), ટેક્નોલોજી ટ્રાન્સફર, મ્યુચ્યુઅલ ટ્રેડ (વેપાર) અને ગ્લોબલ સપ્લાય ચેઈન જેવા ગંભીર મુદ્દાઓ પર ઊંડી ચર્ચા થવાની પૂરેપૂરી શક્યતા છે.
